¹ Vakhwalyawe Sawuli, Davidi ahuhokolowa waweralyawe atthu Amaleki, khukhala mahuku meli oZikilagi; ² Nuhuku nooneraru, ahuwa nlopwana akhumale okhottoni wawanawe Sawuli, awaralene ekuwo tjothala, ni mmuruni mwawe mwahutjareya ntthupi: ni waphiyalyawe wari Davidi, ahukokhora uramaka mpakha vathi, anttittimihaka. ³ Ni Davidi ahunkoha wira: Mwinkhuma vayi? Ni owo ahakhula wira: Miyo kitthyawale okhottoni omaxaxani w'atthu a Israyeli. ⁴ Ni Davidi ahunkoha-tho wira: Ekhumelelale exeni? Kinnulapelani nkihimerye tjotene. Ni owo ahakhula wira: Anakhotto otene amwaraxiya khutthyawa, ni atthu entji akhwatja: Sawuli-tho ni mwanawe Yonathani ahinviya. ⁵ Davidi ahunkoha mmiravo owo an'himeryale maxakha ala wira: Ntjuwelale tjayi wira Sawuli ni mwanawe, akhwatja? ⁶ Mmiravo owo ahumwakhula wira: Miyo kanavira vamwako Gilbowa, ni khumona Sawuli uramelalene nivaka nawe, ni ottuli tjaniwa ikaro n'anakhavalo yanimphunya. ⁷ Owo arukunuwaka, ahukiweha khukihana; ni miyo kahumwakhula wira: Miyo va. ⁸ Owo ahukikoha wira: Nyuwo ,wa pani? Ni miyo kahumwakhula wira: Miyo k'intthu Amaleki. ⁹ Owo khuhokolela olavula iraka: Miyo kinnulapelani wira, nwe nkiluhe va, miyo nkirere ovulalihiya, nto nanlelo kinnimumula. ¹⁰ Vano miyo kahumwattama, khunluha, okhala wir kahitjuwela wira avulalihiyene tjitjammo khawerya wopowa: ni kahinrula ekhara ya mwene mmuruni, n'inyattu yawaralyawe mmononi, ni kihuwanelani nyuwo pwiy'aka. ¹¹ Davidi ahukheratja ekuwo tjawe, nuripiya nrima; ni atthu yarinawe yahukheratja-tho ekuwo tjaya. ¹² Yahitjikula ni wunla, ni yahitthukwatja mpakha makaripi, waha wa Sawuli ni mwanawe Yonathani, ni mwaha w'atthu APWIYA, ni nloko na Israyeli: yakhwatjale okhottoni. ¹³ Ni Davodi ahunkoha mmiravo ole anwanelale ehapari ela iraka: Nyuwo mwinkhuma vayi? No owo ahakhula iraka: Miyo ki mwana Amaleki, ni nanuuwa. ¹⁴ Ni Davidi khwira: Mwirale tjayi n'hovaka omwinva mwene ottikittheliye n'APWIYA? ¹⁵ Nave Davidi ahumwihana nrumeyi awe mmotja, khun'himerya: Mwintuphele ola, ni mmwinve. Ni owo ahintuphela, khumwinva. ¹⁶ Ni Davidi ahun'himerya wira: Ephome awe yutakhaleleni nyuwo emwarele mmuruni mwinyu, vano eyano tjinyu tjihuhimyakatjani nyuwo mmantjinyu, tjiraka: Miyo komwinva ntthu ottikittheliye n'APWIYA. ¹⁷ Ni davidi ahipa ntjipo nna na mahithi amunlelaka Sawuli ni Yonathani mwana a Sawuli owo. ¹⁸ (Ntjipo nna nilepiye mulivuruni mwa naxariya. Wira yinttutjihiye atthu a Yuda:) ¹⁹ Atthu owuluvala a Israyeli yahukhwela va mwako! Alipa a ekuru yinviye tjayi! ²⁰ N'hilaleye etthu ela oGathi, N'hilaleye mwinttettheni mwa wAxikeloni; wira athiyana aFilisti ehitthape, wira axarasu alukhu ale ehope makuphi. ²¹ Nyuwo miyako tja oGilbowa, n'himme-tho okame nnakhala n'hirupeliyeke-tho epula, etthay'inyu ehimeleke etthu; okhala wira vatjulu vinyu yahuvehiya mavaka alipa a ekuru, Nivaka na Sawuli khinattikittheliye ni makhura omwene. ²² Nattikittheliye ni ephome, ni makhura awanani awe, mura wa Yonathani wanuwanela okhwa, Xowa a Sawuli khanathololiye mahala. ²³ Sawuli ni Yonathani, atthu ofenteya ni orerexa khamwalanantse ekumi aya yotene, nnakhala khiyamwalanyihiye nukhwa: Awo yari oveyaveya onvikana xaka , yari a ekuru onvikana kharamu. ²⁴ Nyuwo athiyana a Israyeli, munleleni Sawuli, yowo oowarihani ekuwo tjorerexa, yowo ophwanelihani ni malya ni ewero. ²⁵ Atthu a ekuru yahukhwela okhottoni! Yonathani ahukhwela omwako! ²⁶ Yonathani nyu, munnaka, kinnuhawelani nyuwo nuxanka: Nyuwo mwanikitjivela ventji, okifenta winyu wari wothamaliha, wanivikana ofentiya ni nthiyana. ²⁷ Atthu a ekuru yapweteiye tjayi, ni mavaka aya a ekhotto yamorale tjayi!