¹ Ahukhala nlopwana mmotja ntjina nawe Elikana, a nihimo na Efrayimi, akhala mwinttettheni w'oRama omiyakoni w'Efrayimi, mwana a Yerohami, otjulu wa Elihu, etthoko ya Tohu, a nloko na Sufi, a nihimo na Efrayimi. ² Owo ahukhalana axarawe eli; nkina ntjina nawe Hanna, nkina Pineha. Pineha owo ahukhalana a'nawe, vbano Hanna kharina mwana. ³ Iyakha tjotene Elikana anuvenya nttetthe awe, arwaka oSilo wira akokhorele APWIYA owerya tjotene, ahelelaka nkuttho, oSilo wonwo ana eli a ELI, matjin'aya Hofoni ni Pineha, yari alipa a nkuttho yarumelaka APWIYA. ⁴ Okathi Elikana ahelawe nkuttho, ahulamalela onkawela enama mwarawe Peninna, n'anawe axoilopwana n'axithiyana, wa khula ntthu mphantti awe. ⁵ Vano ahunvaha Hanna mphannti wothanliya; tthiri owo anunfenta Hanna, ohiya wira APWIYA khiyanvahale mwana. ⁶ Peninna anunthanya hanna, anunveiha, okhala wira APWIYA khiyanvahale mwana. ⁷ Ni tjitjammo okathi wotene warwaya wkokhorela APWIYA: Elikana anira tjitjammo, vano okathi nkina Pineha onveiha Hanna; Hanna owo ahupacera wunla, khunyanyala yolya. ⁸ Elikana in'yawe ahunkoha wira: Hanna, nnunlelani? Mwinkhottelani yolya? Eseni yuripihaleni nrima? Miyo nkinuphiyeryani ovikana aana muloko? ⁹ Vamalihalyawe olya n'uwurya Hanna ahuvenya arwaaka mumpani mw'APWIYA; nlipa a nkuttho Eli ira okomalene vamunyukhuni vawe vankhora w'enupa y'APWIYA, ¹⁰ Hanna aripiyene nrima ventji ahalompa APWIYA, anlaka ni aipulelaka. ¹¹ Owo ahummana natiri, iraka: Nyuwo APWIYA muniwerya tjotene, nkiwehe miyo nrumey'inyu otakhaliya, nkimorele ekhiriri, mwihinliyale nrumey'inyu, nkivahe mwana mwanlopwana, mwakivaha miyo kinamuvahani mwan'owo nyuwo APWIYA akhale awinyu mahuku otene ekumi awe, owo khanimetthiyaka ikharari tjawe mmuruni mwawe. ¹² Atepaka tjitjammo walompa APWIYA, Eli ahuweha eyano awe. ¹³ Hanna anilompa ni nrima, nihinwanyeyaka ntju nawe, atannya eyano tjawe pahi; Eli anupuwela wira anuhapaliya. ¹⁴ Tivo ahun'himerya wira: Mwinrwaa ohapaliya mpakha lini? Epacereke owukuluwani evinyu. ¹⁵ Hanna ahumwakhula, wira: Nnari, pwiy'aka: Miyo nkihapaliye: miyo nkiwuryale etthu enihapala, kinutakhaliya pahi vano kinahimerya ovelavela waka APWIYA. ¹⁶ N'hupuwele wira miyo nrumey'inyu kinuthwelela: Miyo kotepa ovalavela n'uripiya nrima tivo vanlompaka tjitjammo. ¹⁷ Eli ahun'himerya, wira: Nrweeke ni nrettele, Muluku a Israyeli ovaheni enlapelinnyu. ¹⁸ Hanna khwira: Miyo nrumey'inyu kitjaliye ni nyuwo mahuku otene. Hanna ahuvenya khurwaa, ni ahulya, owitho wawe wahunkokola. ¹⁹ Vaxiyaya Elikana n'axarawe yahuvenya, yahakokhorela-tho APWIYA, khuhokolela, owannyeya oRAMA. Elikana ahikhumela ni warawe Hanna, vano APWIYA yahinwa olompa wawe. ²⁰ Vaviralyaya miyeri mithanu na mitjese, Hanna anari ni ehamela, ahun'yara mwanawe mwanlopwana, khunvaha ntjina na Samuweli, ahimyaka: Tthiri mia kalompale APWIYA. ²¹ Eyakha yeyo-tho Elikana, n'itthoko awe yotene, ahilikanyiha orwaa wahelela APWIYA nkuttho awe, nuntaphula natiri. ²² Vano Hanna ahikhotta orwaa, an'himeryaka n'yawe wira: Kinamwalittiha mpakha onttarusa mwan'ola wamwa; okathi owo kinunrwaana wira kathonyerye APWIYA, akhaleke wonwo mahuku otene. ²³ Elikana n'yawe ahumwakhula wira: Mwireke vanonelinnyu orera; n'haleke mpakha onttarusa mwan'owo wamwa; vano APWIYA emaliherye tjahimaly'aya. Hanna ahuhala owani, amwamwihaka mwanawe mpakha mwan'owo ottharuwa wamwa. ²⁴ Vanttarusalyawe wamwa, Hanna ahunrwaana mwanawe oSilo, ankusaka-tho mwanyompe a iyakha ttharu, mphimo mmotja w'otthu, ni ekanatta emotja ya evinyu, vano ahunkeliha mwanawe mumpani mw'APWIYA: ni mwan'owo ira anari nkhani. ²⁵ Van'helalyawe mwanyompe nkuttho, yahunrwaana mwan'ole w'Eli. ²⁶ Hanna khwira: Khoo APWIY'Aka! mwinnikupuwela? Miyo k'inthiyana yole awale vava alompaka APWIYA, vamethoni vinyu. ²⁷ Kanlompa mwanak'ola, ni APWIYA akinwa khukivaha yalapelaka. ²⁸ Vano, ni miyo-tho, kinnavaha APWIYA mwanak'ola: akhaleke awaya APWIYA mahuku otene ekumi awe. Ni khwa kokhorela APWIYA.