¹ Djeso adabuda penepo futi adauya cudzico lida baliwa iye, futi wafpudzi watche wadamuteera. ² Palo idzaswica Sabudu, Iye adapfunzisa cusinagoga. Wazinji wadamubva futi wadakala natchidzumo. Iwo wakalanga: "Ndicupi kwatche iye adapfunzira cupfunzisa ucu?". "Cudziwa kwanyi kwenecu kwatche adapasiwa iye?". "Ndizvidzumo zvanyi zvenezvi cuti iye anaita na manza yatche?". ³ "Hasi muntcheki wamatabwa uyu, mwana wa Malia, futi bale wa Tiago, Jose, Djuda na Simioni? Awasi naife wabale watche?". Futi iwo wakananyinzica na Djeso. ⁴ Futi Djeso adawabvunza: "Mumbuto ibodzi na ibodzi cuti mupolofita akodziwi cudzico latche la cubaliwa, futi pacati pawabale waco, futi pamui paco letu". ⁵ Iye deca hana cuita tchiritchense tchidzumo penepo, cunza kwa wenango watenda thangwe izvo Iye adaiga manza yatche futi watchiwaponesa. ⁶ Nacugomba cuthemba kwawo wadamusiya wacuchamisica. Futi iye adabuda mumaluwani atchipfunzisa. ⁷ 7Iye adadaidza wa Kumi na wairi futi adatoma cuwapasa, waiiri na waiiri; futi adawapasa utongi pamizimu yacunyangala, ⁸ futi Iye adawapfunzisani cuti apana tchinatoliwa munjira, nkabe cukala nswimbo: ne pau, ne saka, ne male, mubande mwao, ⁹ kwatche deca mudapfeca machango futi nkabe cupfeca madirerizi mairi. ¹⁰ Adawalangazve: "Pensepense cana mucupinda munyumba, kalani mwenemo cuswikira mabuda mbuto ino. ¹¹ Futi cana mbuto inango aisi cucutambirani ne cudzacubvani, cana mungadzabuda penepo, ndinadzacupudza pfumbi napansi pamwendo yanu, paumboo hatchiphindukira iwo". ¹² Iwo wadabuda futi watchidaidzira cuti wanhu deca wadatsumba zvacunyanala zvao. ¹³ Futi akabudisa madimoni mazinji, akadzola watenda wazinji na mafuta futi watchiwaponasa. ¹⁴ Umambo ha Herodi udazvibva izvi, thangwe dzina la Djeso lakadakala lacudzikwa manigi. Wenango akalanga: "Juwau, Mubatidzi, adatoliwa pacati pawa cufa futi thagwera izvi, nsimbaizi zacudzumisa ziri cumusewenzera". ¹⁵ Wenango wakalanga: "Iye ndi Eriya". Futi wenango wakalanga. "Iye ndi muplofita, ninga wenango waplofita wacalewale". ¹⁶ Kwatche padzati Herodi azvibva izvi, adalanga: "Juwau, wangu ndidati ngagwandiwe musolo, amucazve". ¹⁷ Thangwe Herodiyo akada tuma cuti wabate Juwau futi wadamuiga mucadyaboso thagwera herodi (nkadzi wambale watche Firipi), thangwe akada loliwa naiye. ¹⁸ Thangwe Juwau akalanga cuna Herodi: "Azviiti cuti ugone nancadzi wambale waco". ¹⁹ Napenepo, Herodia akacoya phundu na Juwau futi akadzamufungira cumuulaya, deca hana cuita, ²⁰ Thangwe Herodi akatchya Juwau, akadziwa cuti iye akali mwamuna watchakwadi na wamuzimu wacutchena, futi akamucoya. Pacubva Juwau, Herodi akadzakala atchifungidzira, napenepo adamubva natchido. ²¹ Apo, pansicu ibodzi, thangwera cuswikisa magole yatche, Herodi adamupasa tchacudya waculemerera watche, waculu na wanyakwawa wamuGalileya. ²² Mwana wankanzi tchaiye waHerodi adauya atchibvweraiye futi iye adamudekedzera Herodi nawadaidzi watche. Mambo adabvunza nsicana: "Ndicumbire tchiritchense tchinhu tchaco ulicuda ine ndina cupasa". ²³ Iye adamudumbirira atchilanga: "Tchiritchense tchinhu tchaco unandicumbira ndina cupasa, futi na phisi la uculu wangu". ²⁴ Iye adabuda atchibvunza mai watche: "Ntchanyi tchangu ndingamucumbire?" Iye adadaira: "Musolo waJuwau, Mubatizi." ²⁵ Iye tchilipolipotcho adatchimbiza cuhirira cuna mambo futi adamucumbira, atchilanga: "Ndiricuda cuti mundipase, ntchitchinoletu, mupuleti, musolo waJuwau, Batidzi". ²⁶ Mambo adatsukwala zvacuwanda, apo thangwera cuzvipira kwatche futi nawadaidzi, zvingadaitalini culamba cucumbira kwatche. ²⁷ Apo mambo adatumira musodja mubodzi mulindi watche adamupasa mutemo cuti auwise musolo waJuwau. Mulindi adaeda camugwanda mucadyaboso. ²⁸ Iye adauisa musolo watche mupalato futi adamupasa nsikana iye adapasa mai watche. ²⁹ Pacubva zvenezvo, wapfunzi watche wadauya watchitola tchitumbi tchawo futi wadaiga munhutu. ³⁰ Wafpunzi, watchiungana watchetenderera Djeso, wadapanganidzira zvense zvao wakadaita watchipfunzisa. ³¹ Iye adawati: "Uyani pakundu cumbuto zacuoma futi mutchipuma pangani ibodzi". Thangwe wazinji wakaenda watchienda futi iyo hawana cudzaona ngani ne cana tchacudya tchaio. ³² Apo wadaenda basi, mumwadiya, kwenda cumbuto zacuoma, ³³ Apo wazinji wadamuona atchibuda wadamudziwa, futi wadathamanga wense, na mwendo, pasense luwani, futi iwo wadaswika cumasule kwatche. ³⁴ Pawo wadzatchitha, Djeso adaona mbumba izinji futi adadzagala na nsisi naiwo, Thangwe wakali ninga mabira hana nyacuswa. Futi Iye adatoma cupfunzisa zvinhu zvizinji. ³⁵ Niga ngani ikali pamberi, wapfunzi watche wadauya cuna iye watchilanga: "Iyi ndi mbuto ya cuoma futi na ngani yadi pamberi. ³⁶ Wagoneke kuti ukwanise kwenda mutsanga na mamii paduze mugule zvinhu cuti mudye". ³⁷ Apo Djeso, atchidaira, adawabvunza: "Wapaseni zvinhu cuti wadye". Iwo wadamubvunza: "Cana kwenda tigule zvuluzviwiri denari za pau futi titchiwapasa cuti wadye?". ³⁸ Iye adawabvunza: "Ndimapau mangasi yanaimwe? Ndoconi caone". Pawo wadzati wazviona, wadamubvunza: "Pau zichanu na ntsomba ziwiri". ³⁹ Iye adawapasa mutemo cuti wense wakale wadaungana matsanga landovolo. ⁴⁰ Iwo wadakala wacuungana; wauungane zana wenango macumi machanu. ⁴¹ Iye, adabata pau zichanu na ntsomba ziwiri, adalingisa mudzaulu, adacombolera futi adagawanisa mapau adawapasa wapfunzi cuti waike pamberi pawazinji. Futi adagawanisa ntsomba ziwiiri pawense. ⁴² Wadadya watchikuta. ⁴³ Iwo adaunganiza maphisi yamapau yacugwandica, nsengwa kumiziwiri zacudzala, futi na maphisi ya ntsomba. ⁴⁴ Wakali zvuluzvichanu zvawanhu ndiwo wadadya mapau. ⁴⁵ Tchilipolipotcho Iye adaita wapfunzi watche wadapinda mumwadiya watchimuteera cumberi kwatche cuti waende cunango, cuna Betisaida, ninga Djeso akagonekesana nabumba. ⁴⁶ Pawo iwo wadabuda, Iye adakwira mubango cuti anamate. ⁴⁷ Nausicu adauya, mwadiya ukali duze pacati pabala, futi Iye akali ega pansi. ⁴⁸ Iye adaona cuti iwo wakachuphica pacutchapa, Thangwe mhepo ikali yacupinganizana. Napenepo, cumambakwetcha pangani yatchitatu yatchitanhatu ya usicu, Iye adauya paiwo, atchifamba mubala, futi akada cupinda pamberi pawo. ⁴⁹ Thangwe pawo adawaona atchifamba padzaulu pabala, wadafunga cuti akali tchiphoco wadakuwa. ⁵⁰ Napenepo wadamuona wadadzakala wacutyiswa. Kwatche tchilipolipotcho Iye adawabvunza: "Kalani wacuchingirira! Ndine! Musatchye". ⁵¹ Iye adapinda mumwadiya na iwo, futi mhepo idaema cufuliza. Iwo wakali wacudzuma, ⁵² thangwe hawana cubvesesa thangwera mapau; cana nazvenezvo, moyo yawo ikada oma. ⁵³ Wadapeza cubira, iwo wadauya pansi pa Genesare futi wadaemesa mwadiya. ⁵⁴ Pawo wadadzabuda mumwadia, wanhu tchilipolipotcho wadamudziwa Djeso. ⁵⁵ Wanhu wadathamanga pa mutunhu wense watchitoma cumuisira watenda pa mumamaka yawo, kwawo wakabva kwatche Iye akalipo. ⁵⁶ Iriense mbuto ikapinda Iye mumaluwani, muluwani penango mutsanga, iwo wakaiga watenda patchena, wakamucumbira cuti watendeziwe cukuya padoco mumherera mwahembe yatche. Futi wense pawo wakamukuya wakaponesiwa.