¹ Pantsicu ziwiri zikamirira cuda cuitwa Pasika naMutambo weMapau hana Isiti. Apo wakulu wamapirisita wanyori wakafamba watchitswaka zvakuita zvakubisika cuti wamuulaye. ² Apo wakadzalanga: "Ne pangani yaPasika, cuti pareke cuoneka boyowoyo pakati pawanhu". ³ Djeso akali paBetania pamui waSimao, nyamaperembuzi, iye akatsulima kumeza, adafendera mukadzi mubodzi namutete ukana mafuta akudiwa maningui, akudula maningui . Iye adaska mutete adatululila mafuta pamusolo paDjeso, ⁴ wakalipo wanango wakadakalipa nazvo. Iwo wakalanga patchawo: "Thangwe ranyi atsayi mafutu akudiwa? ⁵ Mafuta aya angadaita cugulisa cupinda madenari zvuru zvitatu wangadapa wanyakubonera". Apo iwo wakashola. ⁶ Apo Djeso adalanga: "Musiyeni akale ntendere. Thangwe lanyi munamushupa? Iye aita zvakudeka cuna Ine. ⁷ Pakati panu panawoneka wanyabonera imwe mungada kana kuita zvakudeka kuna iwo, imwe hamulambi munaIne cukala-nacukala. ⁸ Iye adaita zvikada kuitiwa, adandidzola mafuta handisati ndaikiwa. ⁹ Tchaditchadi ndinakulangilani, mbuto yentse idaparidziwa Evangeri pantsi pentse, zvidaita mukadzi uyu zvinawerengwa, cuti titchamutsalakana nazvo. ¹⁰ Napenepo Djudasi Iskarioti, mubodzi wawakumi nawawiri, adaenda kunawaku wamapirisita cuti apereke Djeso cunaiwo. ¹¹ Apo mapirisita wadabva izvi wadadekerha wadamubvunza cuti tinakupa mari. Iye adatanga cutswaka cuti ndinaita ndimupereke Djeso. ¹² Nantsicu yakutanga yaMutambo waMapau haana Isiti, apo wadapereka bira laPasika, wafunzi Watche wadadzalanga: "Cupi cungaite cudonzera poso yaPasika?". ¹³ Iye adatumila wawiri wawafunzi Watche adalanga: "ndokoni culuwani apo mamuna mubodzi akadatwala jaro yamandzi tinadzaonana. Mutewereni. ¹⁴ Munenge mukupinda iyemo mutewereni mubvunzeni mwenetchiro nyumbayo: Mufpunzisi alanga: cupi cunagala mbuto kwato tinadyira kurha kwaPasika nawafpunzi Wangu?. ¹⁵ Napenepo Iye anadzacupanguizani mbuto iculu mbuto yamudzaulu cuti yadi donziwa. nditchaita kweneco cugadzilira kwangu. ¹⁶ Wapfunzi watche wadabuda futi watchiyenda cu luwani; wadawona zvense wabvunzaiye futi adagadzira cudya kwa phasica. ¹⁷ Inga hwadi usicu Iye aduya na kumi nawairi. ¹⁸ Pawo wakadagala watchi tsamira thebo watchidya, Djeso adalanga: " tchaditchadi Ine ndinacubvunzani, mubodzi wanu, cuti alicudya Naine, adzadzandi pandukira". ¹⁹ Wense watsukwala nazvo futi mubodzi namubodzi wadalanga: " apo cuti ndine? ²⁰ Djeso, adadaira,adawati: "Ndimubodzi pawacumi nawairi, uyo cuti tchintchino arikurha naIne pau muparato ibodziyene. ²¹ Thangwe mwana wamunhu anaenda ninga zvidalembwa mumalembwa analanga thangwe laIye; cuna uyo atchandipandukira!. Zvikadadeka cubvi hakana kubarha". ²² Pawakarha, Djeso adabata pau, adakombolera, adabedula adawapasa. Napenepo adalanga: "Tambirani uyu ndiwo muiri Wangu". ²³ Iye adabata ndico, adati maita basa, adawapasa wentse wadamwa. ²⁴ Napenepo adalanga: Itchi tchiropa Tchangu tchinabatanizani patswa, tchiropa cuti tchidaerera pakubvunulila wentse. ²⁵ Tchaditchadi ndinacubvunzani handitchadzamwizve misapo cuswikira ntsiku yangu nditchadzamwa vinho itswa cuukulu haMulungu Cudzaulo". ²⁶ Mumasure makuimba nyimbo, wadaenda cuBango laMiolivi. ²⁷ Djeso adalanga: "Imwe mwentse mutchadzanditawa, thangwe zvidalembiwa: Nditchakonza Macabuswa mabira atchabaralika. ^{28 29} Napenepo mumasure mwakudzamuka Kwangu, Ine nditchadzacala cumberi cwanu cuenda cuGarireia". Petulu adati: "Podi zvawo wentse watchikutawani ine handidzakusiyeni". ³⁰ Djeso adati cunaiye: "Tchaditchadi Ine ndinakubvunza cuti usiku huno, djongwe halisati lalila cairi, iwepo utchadzandilamba catatu". ³¹ Napenepo Petulu adati: "Podi cungati nkufa naImwe, handidzakulambini". Wentse wadatembesa zvibodzibodzizvo. ³² Iwo wadaenda pambuto inango idadaidziwa Getsimani, napenepo Djeso adati cuna awfpunzi Watche: "Calani pano Ine ndirikuenda canamata". ³³ Iye adatola Petulu, Tiago naJuwawu, napenepo adatanga cucala nacutya. ³⁴ Djeso adawabvunza: "Mizimu Wangu udatsukwala maningui, zvakubvadakufa. Musabude pano mucalile pano". ³⁵ Djeso adaenda cumbuto icali cutali, adagodama pantsi, adanamata,deca cuti zvikadakwanisika, ngani i ipinde cuna Iye. ³⁶ Iye adati: "Aba, Baba, zventse zvinhu zvinapusikacuna Imwe, budisani ndico i cuna Ine. Napenepo, culeke cuita nacuda cwangu apo nacuda Cwanu". ³⁷ Iye adahirira, adaswikira wakadagona, adati cuna Petulu: "Simao iwe udagona? Hamupusi cucalila pangani ibodzi? ³⁸ Calilani munamata cuitira cuti musaswike pakuyeseliwa. Muzimu udagadzilila apo nyama ndiyo idaneta". ³⁹ Patswa Iye adafundukirazve adanamata, adasewenzesa masoco mabodzibodziwo. ⁴⁰ Mhindo inangu adauyazve Djeso cuna wafpunzi adawaswikirazve wadagona; matso awo akadaneta iwo hawakasi kudziwa cuti tinalanganyi. ⁴¹ Iye adauya pamhindo yatchitatu Iye adawabvunza: "Mudagonazve basi muli cupuma? Zvakwana! Ngani yaswika. Cuti Mwana waMunhu aperekiwe mumanza awanyangazi. ⁴² Mukani, tendeni! Uyo wangundidati Alicundipindukira ari duze". ⁴³ Tchilipolipotcho, pangani icalanga Iye, Djuda, mubodzi wawacumi nawairi, adaswika nambumba iculu ikanaiye; wakada gadzirira macatana nanchinjiri zamiti, pacundu pawaculu-waculu wamapirisita, wanembi namadikoni. ⁴⁴ Mupanduki adapasi tchipangiziro, atchilanga: "Ndiye Uyo ndinapasa beju". Musungeni mumutole kuenda cuna walindi". ⁴⁵ Patche Djuda adaswica tchilipolipotcho adaenda cuswica cuna Djeso iye adati: "Rabi" iye adaMupasa beju. ⁴⁶ Napenepo iwo wadamubata wadaMusunga. ⁴⁷ Apo mubodzi cuti akali penepo adabudisa catana yatche, adatcheka musewenzi wawaculu wamapirisita adagwanda cutu latche. ⁴⁸ Djeso adawabvunza: mauya cudzandisunga ninga mbava, namacatana nanchinjiri zamiti? ⁴⁹ Pangu ndikana imwe nditchifpunzisa ntsicu zentse muntchetche, hamuna cundisunga. Apo izvo zvaitika cuti Malembwa azazikisiwe". ⁵⁰ Wentse wakana Djeso wadaMusiya wadatawa. ⁵¹ Mupale mubodzi adamuteera, iye akadapfeka nguwo basi ikadamufumbukiza; iwo wadamubata, apo ⁵² mupaleyo adasiya itchigwa nguwuyo adatawa ali pezi. ⁵³ Wadatola Djeso cuenda cuna muculu wamapirisita. Wadaungana wentse waculu wamapirisita, madikoni nawalembi. ⁵⁴ Pangani iyi, Petulu akazviona zventse alikutali, cuswica mukati mawaculu wamapirisita. Iye adakala pakati pawalindi, wacali duze namoto, cuti wathumirhe. ⁵⁵ Waculu waculu wamapirisita naWatongi wakasaga wanyaumboo naDjeso, cuti waone cuMuulaya. Apo iwo hawana cuhuona, ⁵⁶ napenepo wadauya naumboo wacupwata cuna Iye, napenepo podi zvawu nawanyaumboo awa zvikadasiyana. ⁵⁷ Wenango wada muca watchiuisa umboo hacupwata cuna Iye; Iwo adilanga: ⁵⁸ "Ife tidamubva atchilanga: Ine ndinadzafudza nchenchei idaithwa na manza yawanhu pantsicu zitatu ine nditchidzawaca inango, haiithwi na manza yawanhu". ⁵⁹ Podi zvawo naumboo hawoho haukasi cupirana nawenango. ⁶⁰ Napenepo muculu wawa pirisita wadamuca pacati pawo adabvunzisa Djeso: "Iwepo haudairi nkabe? Zvawo wanhu walicucuikira cuna iwezvi?" ⁶¹ Iye akali zii hakasi cudaira. Wadabvunzazve muculu wapirisita: "Iwepo ndiwe Kirisito, Mwana wa Mulungu waCudzaulu?" ⁶² Djeso adati: "Ine ndine. Futi mutchadzaona Mwana waMunhu atchikala cumarjo Kwansimba atchiuya namumacuti acudzaulu". ⁶³ Cumberi kwaizvi, muculu wawapirisita wada adakedza nguwo zatche wadalanga: "Titchicuda basi wanyaumboo? ⁶⁴ Imwepo mwazvibva zvaponya iye. Apo ntswanyi zvanu mungamutongere?". Wentse wadatongera Djeso inga munhu wakutemera kufa. ⁶⁵ Wenango wadathoma cuMupfirira mata wachimusungira nguwo cumatso, wakaMunera watchilanga: "Bvumbira!" Walindi wadamutora watchiMunela. ⁶⁶ Patche akali Petulu duze patambwe munyantsi, mubodzi wawasewenzi wawaculu wawapirisita adaenda pakana iye. ⁶⁷ Iye padaona iye Petulu duze namoto pakawota iye moto,adamulingisisa atchibvati: "Naiwepo ukali pabodzi naMunazareta, Djeso". ⁶⁸ Apo iye adalamba, adati: "Ine handidziwi futi handisi cuzvibva zvako iwe ukulangazvo". Napenepo iye adabuda cuenda cutambwe. ⁶⁹ Apo penepo, nyamubasa adaona adatangazve culanga cuna wakali penepo: "Munhui ndimubodzi wawo!" ⁷⁰ Napenepo iye adazvilambazve zvenezvo. Napenepo cuna vakali penepoo wadati cuna Petulu: "Natchaditchadi uyo ndimubodzi wawo,futi ndimuGalilia". ⁷¹ Napenepo iye adatanga cutuka atchidumbira adati: "Ini handimudziwi munhu wako ulikulangayo". ⁷² Napenepo tchilipolipotcho djongwe lidalila pamhindo yatchiwiri. Petulu napenepo adatsalakhana pamasoco Djeso akadamulangila: "Lisati djongwe culila cairi, mhindo zitatu utchadzaNdilamba". Iye adacala wacutsukwala adatoma culila.