¹ Ucu ndico cutoma cucusa fpala kwaDjesu mucristo, mwana wa Mulungu. ² Ninga zvida nembiwa mubuku la mprofita Isaia: "Ndipo penepo pangu nditchatumira nyamasoco Wangu pamberi Paco cuti udonze ngira yaco. ³ Fpala launango litchakuwa mubango: Donzani ngira ya mulungu, vulani ngira zatche zacutewezeca"; ⁴ Juwau adauya, adababatidza mubango futi adadaidzira batismo libodzi lacubweke cuti walekererwe zvacunyangala. ⁵ Wense wamuprovincia ya Judeya nawense wagali wamu Djerusalema wadauya cuna iye. Iwo wakali wacubatizariwa na iye muludzi rwa Djorodani, watchibweca unyangazi wawo. ⁶ Juwau akabvala nhembe zamakamera, akana bande lakanda futi akadya nhete nauchi zvamutsanga. ⁷ Iye akadaidza, atchilanga: "Munango alicuya cumasule kwangu, mbani adalemerera cupinda ine, apo andisi wacuthemera cuti ndidzike ndidzatsudzule nzoi zachango Zatche. ⁸ Ine ndidacubatizarini namadzi, kwatche Iye atchacubatizarini na Muzimu Wacutchena". ⁹ Zvidaitica cuti, pansicu zenezo, Djeso adauya cubuda cu Nazareta pa Galileiya, futi adadzabatizariwa na Juwau muLudzi la Jorodani. ¹⁰ Padadzati Djeso abuda mumadzi, Iye adaona mudzaulu mutchifunguca nadyalo Muzimu udzatchitha pa Iye ninga nkangaiwa. ¹¹ Fpala libodzi lidauya mudzaulu: "Iwe ndiwe Mwana wangu wacuda. Ine ndiricudekerha cuna Iwe". ¹² Apo Muzimu tchilipolipotcho wudamutola watchienda cubango. ¹³ Iye akali mubango makumi manai yantsicu, nazvenezvo ayezeriwa na Sathani. Iye akanazvirombo zvamutsanga, na ngirozi zikamusenzesa. ¹⁴ Mumasule mwa Juwau patche adaenda mucadyaboso, Djeso adauya cuswica mu Galileya, wakadaidzira fpala la Mulungu, ¹⁵ atchiranga: "Ngani idaswica, futi uculu a Mulungu ulipadhuze. Tsumbani futi mu pinduke na pfala". ¹⁶ Watchienda wense cubala la Galiliya, Iye adaona Simioni na andirya, mubale wa Simioni, atchithusa mambule mubala, napenepo wakali wamedzi. ¹⁷ Djeso adawabvunza cuti: "Uyani, nditewereni, nditchacuitani wa medzi wa wanhu". ¹⁸ Tchilipolipotcho wadasiya mambule watchimuteera. ¹⁹ Futi Djeso, atchifamba padoco pa mberipo, adaona Tiago mwana wa Zebedeu, na Juwau mubale watche; iwo wakali mu mwadiya watchitea mambule. ²⁰ Futi napenpo adawadaidza, iwo wadamusia bambowao, Zebedeu, nawasewenzi wakali mumwadia Iwo wadamuteera. ²¹ Wadapinda mu Cafarnaum, na mu sabudu Djeso adapinda mu Sinagoga futi atchipfunzisa. ²² Iwo wakali natchidzumo na upfindzisa, kwatche thangwe Iwo wakadzapfundzisa ninga unago anautongui futi nkabe niga walembi wa mitemo. ²³ Futi penepo, mu Sinagoga, mukana mwamuna mubondzi akana muzimu wacunyangala akakuwa akati: ²⁴ "Tinanyi ife naiwe, Djeso wacu Nazareta? wauuya cudzatifudza? Ine ndicudziwa cuti iwe ndiwe wani. Iwe ndiwe Wacutchena wa Mulungu!" ²⁵ Djeso adapasa mutemo dimoni futi adalanga: "Matama futi buda cuna iye!". ²⁶ Futi muzimu wacunyangala udamubzwa pansi futi tchidabuda paiye tchitchikuwa na fapla lacukuwa. ²⁷ Wense wanhu wakadadzuma futi wakabvundzisana mubondzinamubodzi: "Ntchanyi tchenetchi? Cupfundzisa cutsva na utongi? Iye adapasa mutemo cuswica cumizimu yacunyangala, futi iwo wadamuteerera". ²⁸ Tchilipolipotcho masoco thangwera Iye yadabalalisiwa paense mimitunhu ya Galileya. ²⁹ Tchilipolipotcho pawo wabuda cu Sinagoga, wadaenda cumui kwa Simoni na kwa Anderea, na Tiago na Juwau. ³⁰ Madzwala wa Simioni akadagona, iye adabatiwa na cuconziwa. futi tchilipolipotcho wadalanga cuna Djeso zvaiye. ³¹ Apo Iye adauya, adabata na djanja futi adamuca; matenda ya damusiya, futi iye adatoma cuwatsidza. ³² Ninga ukali usiku, cumasule kwadzuwa cu thobica, iwo wadauisa wense awo wakaconziwa penango wa kabaticana na madimoni. ³³ Yense luwani lidasangana pamusuo. ³⁴ Iye adalapa wazinji cuti wakaconziwa na matenda ya cusiyana siyana futi adabudisa madimoni mazinji. Apo hana cutendera cuti madimoni ya langue. Thangwe iwo wa kamudziwa. ³⁵ Iye adamuca kweru manigui, naizvo ninga cukada swipa; adabuda, adaenda cumbuto inango adaenda cubango futi kweneko adanamata. ³⁶ Simoni futi na wenewale wakana Iye wadamutswaga. ³⁷ Iwo wadamuona futi watchimubvunza: "Wense walicutswaga Iwe". ³⁸ Iye adawabvunza: "Ambaini cumbuto zinango, kwa luani likaliduze, cuti ine ndicuse fpala kweneco. Ndizvo zvangu ndauira caita pano". ³⁹ Iye adaenda kwense cu Galileya, atchicusa cu Sinagoga yatche futi atchibudisa madimoni. ⁴⁰ Nyamapere bodzi adauya cuna iye futi adalomba nacugodama. Iye adalanga cuna Djeso: "mungati mulicuda, nditcheneseni". ⁴¹ Nacuda kwansisi, Djeso adathasamula boco latche futi adakuya, atchiranga: "Ine ndiricuda. Iwe utchatchena". ⁴² Tchilipolipotcho mapere ya damusia, futi iye adakala wa cutchena. ⁴³ Djeso adawatchenzesa tchadi futi adamuti ndoco, ⁴⁴ atchimubvundza: "Ona, usalangue cunawenango, kwatche ndoco futi zvipanguize cuna Sacerdodote futi pereca zvacubonera zwaco ninga Mosisi ada cupasa mutemo, ninga umboo wa iwo". ⁴⁵ Kwatche iye adabuda atchitoma cudaidzira wense iwo wadadzabalalisa fpala, na musambo ujinji cuti Djeso aleke cupinda na cupfansa paense mbuto. Iye akada cukala mumbuto zacutamiwa, nazvenezvo wanhu wakauya cuna Iye wamumbuto zense.