¹ Kisha Bildadi kutoka kabila la Washuhi akajibu na kusema, ² "hata lini wewe utasema mambo haya? Kwa muda gani maneno ya kinywa chako yatakuwa kama upepo wenye nguvu? ³ Je Mungu hupotosha hukumu? Je Mwenyezi hupotosha haki? ⁴ Watoto wako wametenda dhambi dhidi yake; tunalifahamu hili, kwa kuwa amewatia mkononi kwa makosa yao. ⁵ Lakini wewe unaonaje ukimtafuta Mungu kwa bidii na kufikisha haja yako kwa huyo Mwenyezi. ⁶ Ukiwa wewe ni msafi na mkamilifu, hakika angeamka mwenyewe kwa niaba yako na kukurudisha kwenye makazi ya haki yako. ⁷ Japokuwa huo mwanzo wako ulikuwa ni mdogo, hata hivyo hali yako ya mwisho itaongezeka sana. ⁸ Tafadhari uwaulize vizazi vya zamani, na utie bidii katika hayo mababu zetu waliyojifunza. ⁹ (Sisi ni wa jana tu na hatujui chochote kwa kuwa siku zetu duniani ni kivuli). ¹⁰ Je hawatakufunza wao na kukuambia? Je hawatatamka maneno yatokayo mioyoni mwao? ¹¹ Je miti ya mafunjo yaota pasipo matope? Je mafunjo yaota pasipo maji? ¹² Wakati yakiwa bado ya kijani na hayajakatwa, hunyauka kabla ya mmea mwingine. ¹³ Hivyo pia njia ya wote waliomsahau Mungu, na matumaini ya asiyeamini Mungu yatatoweka. ¹⁴ Ujasiri wake utavunjika, na matumaini yake ni dhaifu kama utando wa buibui. ¹⁵ Ataitegemea nyumba yake, lakini haitamsaidia; atashikamana nayo, lakini isidumu. ¹⁶ Yeye huwa mti mbichi chini ya jua, na machipukizi yake huenea katika bustani yake yote. ¹⁷ Mizizi yake hujifunga funga kwenye rundo la mawe; huangalia mahali pazuri katikati ya mawe; ¹⁸ Lakini mtu huyu aking'olewa mahali pake, kisha mahali pale patamkana, na kusema, 'mimi sikukuona.' ¹⁹ Tazama, hii ni "furaha" ya mtu mwenye tabia hiyo; mimea mingine itachipuka toka katika udongo ule ule mahali pake. ²⁰ Tazama, Mungu hatamtupa mtu asiye na kosa; wala hatawathibitisha watendao uovu. ²¹ Yeye atakijaza kinywa chako na kicheko, midomo yako na shangwe. ²² Wale ambao wanakuchukia wewe watavishwa aibu; nayo hema yake mwovu haitakuwepo tena.