¹ Katika kitabu cha kwanza,ewe ndugu Theofilo, nilikiandika nikisema yote Yesu aliyoanza kufanya na kufundisha, ² mpaka siku ambayo Yeye alipokelewa juu.Hii ilikuwa baada ya kutoa amri kupitia Roho Mtakatifu kwa mitume aliokuwa amewachagua. ³ Baada ya mateso yake, alionekana kwao akiwa hai pia na vithibitisho vingi vikishuhudiwa. Kwa siku arobaini alijionyesha kwao, na alizungumza kuhusu ufalme wa Mungu. ⁴ Alipokuwa akikutana pamoja nao, aliwaamuru wasiondoke Yerusalemu, lakini wasubiri kwa ajili ya ahadi ya Baba, ambayo, alisema, "Mlisikia kutoka kwangu ⁵ kwamba kwa hakika Yohana alibatiza kwa maji, lakini mtabatizwa kwa Roho Mtakatifu kwa siku chache zijazo." ⁶ Na walipokuwa wamekutanika pamoja walimuuliza, "Bwana,je, huu ndio muda utakaowarudishia Israeli ufalme?" ⁷ Yeye akawaambia, "Siyo sawa kwenu kujua wakati au majira ambayo Baba amekusudia kwa mamlaka yake mwenyewe." ⁸ Lakini mtapokea nguvu, wakati Roho Mtakatifu atakapokuja juu yenu,nanyi mtakuwa mashahidi wangu kote katika Yerusalemu na Yudea yote na Samaria mpaka mwisho wa dunia." ⁹ Bwana Yesu alipokwisha yasema haya, wakiwa wanatazama juu, aliinuliwa juu, na wingu likamfunika wasimwone kwa macho yao. ¹⁰ Wakati wanatazama mbinguni kwa makini akienda, ghafla, watu wawili walisimama katikati yao wamevaa mavazi meupe. ¹¹ Walisema, "Enyi watu wa Galilaya, kwa nini mnasimama hapa mkitazama mbinguni?" Huyu Yesu aliyepaa juu mbinguni atarudi kwa namna ile ile kama mlivyomuona akienda mbinguni. ¹² Ndipo wakarudi Yerusalemu kutoka kwenye mlima ambao unaitwa wa mizeituni, ambao uko karibu na Yerusalemu, kiasi cha umbali wa kutembea mwendo wa siku ya Sabato. ¹³ Walipofika walikwenda ghorofani walikokuwa wakikaa. Nao ni Petro, Yohana, Yakobo, Andrea, Filipo, Thomaso, Batholomayo, Mathayo, Yakobo Mwana wa Alfayo, Simoni Zelote na Yuda Mwana wa Yakobo. ¹⁴ Wote walikuwa wamejitolea kwa nia moja kuomba, miongoni mwao walikuwemo wanawake,Mariamu Mama yake Yesu, na kaka zake. ¹⁵ Katika siku zile,Petro alisimama katikati ya ndugu, kama watu 120, akasema, ¹⁶ Ndugu, ilikuwa lazima kwamba maandiko yatimizwe, ambapo zamani Roho Mtakatifu alisema kwa kinywa cha Daudi kuhusiana na Yuda, ambaye aliwaelekeza wale waliomkamata Yesu. ¹⁷ Kwa kuwa yeye alikuwa mmoja wetu na alipokea fungu lake la faida katika hii huduma hii." ¹⁸ (Sasa mtu huyu alinunua eneo kwa kile alichokipokea kwa uovu wake na hapo alianguka akitanguliza kichwa, mwili ukapasuka na matumbo yake yote yakamwagika. ¹⁹ Wote walioishi Yerusalemu walisikia kuhusu hili, hivyo eneo hilo wakaliita kwa lugha yao "Akeldama," kwamba ni "Shamba la Damu.") ²⁰ "Kwenye kitabu cha Zaburi imeandikwa, 'wacha eneo lake liwe mahame na asiruhusiwe hata mtu mmoja kuishi pale Acha mtu mwingine achukue nafasi yake ya uongozi.' ²¹ Ni muhimu, kwa hiyo, kwamba mmoja wetu ambaye aliambatana nasi wakati wote Bwana Yesu alipotoka na kuingia kati yetu, ²² kuanzia kwenye ubatizo wa Yohana mpaka siku ile alipotwaliwa juu,awe shahidi wa ufufuo pamoja nasi. ²³ "Wakaweka mbele wanaume wawili, Yusufu aitwaye Barsaba, ambaye pia aliitwa Yusto, na Mathia. ²⁴ Wao waliomba wakisema, "Wewe, Bwana, ujuaye mioyo ya watu wote, hivyo weka wazi yupi kati ya wawili hawa ambaye umemchagua ²⁵ kuchukua nafasi katika huduma na utume, ambapo Yuda alitenda uovu na kwenda mahali pake." ²⁶ Wakapiga kura kwa ajili yao, na kura ikamwangukia Mathia ambaye alihesabiwa pamoja na wale mitume kumi na moja