¹ Mbo ng'eetaabiya mamachaktoos keesirwook kurubta keey besyeet nyee choonee Mokoryoonteet, ² kuuyu onket akweek kule makumuung' kuu chooriin nyoo choonii kweemooy. ³ Besyeet nyoo mwooye biiko kule kaalya kooro ankeeriibootiin, ku yooto yee makiiserweetee bichoo. Machilile chii. Makumuunkyi bichoo ng'aleechaa kuu ng'oonin nyoo nyooru koorko nyoo mache kootuusyo. ⁴ Nteenee moomiite mbo ng'eetaabiya meenan nyee imuuche konyoorwook besyoonoo ku moochobootiin. ⁵ Obooye akweek tukul lebkeeyyeet ankoobooye beetuut. Makeebooye kweemowuut amakeebooye meenaneet. ⁶ Kunyoo, mamachakse keeruuye kuu biiko alak, nteenee machakse keeyeku biich chee kasunootiin ankeeriibe keey. ⁷ Bo rwoonik kweemooy anku kweemooy yee bookiitoos biiko. ⁸ Nteenee keebooye acheek beetuut, kunyi machakse keeriibe keey. Machaktoos kiiluumee keey kaakaaseet ak chamateet kuyek kariikaab booryeet choo kiilookyine teket, ankiilaach nkinee kaakeneet nyebo kaararaacheet kuu kuutweetaab booryeet nyoo kiilookyine met. ⁹ Manaakweyeech Yeyiin sukoong'wooncheech, nteenee mache sukooraraacheech kubununee Mokoryoonteet Yeesu Kiriisto. ¹⁰ Kime Kiriisto kubo acheek kule subokeeminy ak inee anku yoo takeesobchootiin ee, nto kukiikeebeku. ¹¹ Kunyoo, machaktoos otitiirii keey ankoosooysooye keey kuu yoo omiite oyeye kuunyiitenyi. ¹² Mbo ng'eetaabiya, keesoomook okoonyit bichoo kiikukwey Yeyiin choo ame booryeet koontoowook ankootitiirook am Mokoryoonteet. ¹³ Okoonyite bichoo miisin ankoochame am yiisyeet nyee yeye. Nto akweek, obuurte kaalyeet. ¹⁴ Kiikaloonwook akweek mbo ng'eetaabiya kule ochuule biiko choo tinye keweynateet, otitiir choo nyokoorech, oyechteechine choo kuskusech ankoomuytoochine chii ake tukul. ¹⁵ Okas kule momii chii nyee kaketyi ake miyootyeet, nteenee osyeeme akookoy oboorchine karaamateet biiko tukul. ¹⁶ Ong'ereche akookoy, ¹⁷ osooye asiiswek akookoy, ¹⁸ obirchine Yeyiin koonkoy am yeet ake tukul. Ng'alyoo nyi nyee makyook Yeyiin oyeye am Kaarorookiinteet Yeesu. ¹⁹ Moomiis Tamirmiryeetaab Yeyiin. ²⁰ Moochuur ng'aleekaab workooyik. ²¹ Orootoote tukuuk tukul ankooname choo karoomech ²² ankootayee keey kiy ake tukul nyebo rokos ²³ Kuyeyaak Yeyiin nyoo koonu kaalyeet otililiitu am keel ake tukul. Kuriibakoy tamirmiryeetaab chii ake tukul, soboonnnyi ak boornyii nyee momii leelis akoy yoo iyeewu Mokoryoonteenyoo Yeesu Kiriisto. ²⁴ Mawechweeche keey nyoo kikweyook anku makuyey kuu nyooto. ²⁵ Mbo ng'eetaabiya, osooweech acheek, ²⁶ Osuboowoo mbo ng'eetaabiya alak tukul nyee ong'erekyine. ²⁷ Amwoowok am kaamukeyweekaab Mokoryoonteet kule osumanchi mbo ng'eetaabiya tukul. ²⁸ Kooberuurook Mokoryoonteet Yeesu Kiriisto.