¹ Kunyoo ii, mbo ng'eetaabiya, aber kiikiineetaak wolee kiibuurtooy sikiing'ereech Yeyiin ankuwuu nyooto wolee obuurtooy. Nanyuun, kiikaloone keemwoowook am kaayneetaab Mokoryoonteenyoo Yeesu kule, otas taay miisin oyey kuu nyooto. ² Onkete ng'aleek choo kikiiboorwook acheek kubununee kaamukeyweekaab Mokoryoonteet Yeesu. ³ Makyook Yeyiin otililiitu amoomartoote. ⁴ Kuyibe mureno ake tukul koorkeenyii am keelto nyee tiliil ankubo koonyit. ⁵ Mookany kutwaaraak muchastaab boorwoonikwook kuu bichoo meenkete Yeyiin. ⁶ Am ng'alyoo nyee wuu nyiitenyi, ma-alok chii ng'eetaabkaamet. Kisimkiisoowook kule makoong'woonchi Yeyiin biiko choo yeye rokosiitenyi. ⁷ Kimakuureech Yeyiin kule subokeemartoote, nteenee mache kule kiibuur kaabuurto nyee tiliil. ⁸ Kunyoo, yoo otaye kaaneeteyweechu meebere kootay chii, nteenee kootay Yeyiin nyoo koonook Tamirmiryeenyii. ⁹ Nto nanyuun ng'alyoo kurubta keey ak chamateetaab mbo ng'eetaabiya, mamachaktoos keesirwook kiy, kuuyu kiikooneetaak Yeyiin ochoomtoosii. ¹⁰ Kyoobuur nkakweek kuu nyooto ochame mbo ng'eetaabiya tukul choo mii Maketoniya. Kunyoo ii, mbo ng'eetaabiya, keesoomook kule ochoomtoosii miisin. ¹¹ Okas kule obuure am kaalyeet ankooyeye yiisyeemwoong' nkit o-ame kiyee koobirtee nkuruukwook kuu yoo kisikeemwoowook. ¹² Yoo koobuur kuu nyiitenyi, makukoonyitook mbo biiko choo meebere iyeenchine Mokoryoonteenyoo amamii kiy nyee makubotwook ¹³ Mbo ng'eetaabiya, keemache onket manta kurubtakeey ak biiko choo kiikubek simoomeeyse kuu biiko choo maboonto kiyee ikenee keey. ¹⁴ Keechamtooy kule kime Yeesu ankung'eetee meet. Kunyoo, keechamchiintoosii kule makoong'eetee Yeyiin meet biiko choo kiikubek kuu yoo kiing'eetee Yeesu. ¹⁵ Kaaneeteyweekaab Mokoryoonteet chu chee keemwoowook. Makiintooyee acheek choo keesobchootiin choo kiikubek besyoonoo choonii Mokoryoonteet. ¹⁶ Makuwookyi malayikeet nyee woo barak ankeekuut aryembuutaab Yeyiin. Yooto nanyuun mokuchoonee Mokoryoonteet kaab Yeyiin. Makiing'eetee meet kurook biikaab Kiriisto choo kiikubek. ¹⁷ Nto yityoo, kiiruruucheech acheek choo takeesobchootiin keetuuye ak bichooto keebeete keey woliin bo boolik bokeeyeme barak ak Mokoryoonteet. Kuchakee yooto nanyuun, makiibuurte keeyMokoryoonteet akookoy. ¹⁸ Kunyoo ii, leyye, otitiiree keey ng'aleechu.