¹ Anii ku Bawulo ankaaboonte keey Siila akoo Temeteewo. Asiirwook akweek kaniseet amTeesaloonike choo obooye Baaba Yeyiin ak Mokoryoonteet Yeesu Kiriisto. Leyye, kooberuurook Yeyiin ankoonyooru kaalyeet. ² Keebirchine Yeyiin koonkoy akookoy kubo akweek tukul yoo keesoowook. ³ Kiisootook am yiisyeet nyoo oyeye okoosee keey inee ankoboonte chamateet. Keebirchine Baaba Yeyiin koonkoy subak, kuuyukyookiimchi keey okenee keey Mokoryoonteenyoo Yeesu Kiriisto. ⁴ Mbo ng'eetaabiya, kiinkete kule kiikukweyaak Yeyiin nyoo chamook, ⁵ Kuuyu yoo kikyoomwook lokooywek chee karoomech meebere ki ng'al buch, nteenee kibo kaamukey kuboonto keey Tamirmiryeetaab Yeyiin soochamte akweek manta. Onkete akweek mbo wolee kikiibuurtooy acheek yoo kikeeboonte keey tukul. ⁶ Kyoocham oyechi Yeyiin yiisyeet kuu acheek. Kyootaach lokoywechoo am ng'erekweekaab Tamirmiryeetaab Yeyiin ankookuyeyaak keewusook. ⁷ Am yooto nanyuun, oyeku kaaneeteywoo am wolee mii biiko tukul chebo yeemeetaab Maketooniya akoo Akaaya choo iyeenchine Kaarorookiinteet. ⁸ Meebere kiyit lokooyweekwook choo bo mokoryoonteet yeemeetaab Maketoniya akoo Akaaya baateey, nteenee kikas kooreet tukul kule okoosee keey Yeyiin. Kunyoo, mamii kiy nyee takumachaktoos keemwaay. ⁹ Ng'aloole bichooto tukul wolee kyoochamte ng'aleekyoo ak wolee kyootayte aynatoos ankoorub Yeyiin nyoo bo manta. ¹⁰ Nto yooto okanyoonu lakwaanyii koyewunee kibkonkooy. Nyooto ku Yeesu nyoo king'eete Yeyiin meet. Inee nyee makuyeeteech simakiing'wooncheech.