¹ Mbo ng'eetaabiya, onketee akweek kule manaawo buch ruutooyto nyoo kikeekwoonii acheek wolooto. ² Onkete wolee kisimkeewusteech ankintosuurteech am kiriinketaab Filibi.ankoo kikeekwiileech misiin,kikooneech Yeyiin nkuruuk kyoomwook lokooychii chee koroomeech. ³ Okas kule kimakyoomtooy ng'al chebo ng'wiiynan nto kikiisoote ng'al chee makoroomech nto kikeebere kule keekonwook. ⁴ Kichamteech Yeyiin ankootoorweech lokoywechu koroomech. Kunyi, meebere kyoomtooy lokooywechu kule sikiing'ereech biiko, nteenee kyoomtooy kule sikiing'ereech Yeyiin nyoo inkete kaasooteyweekyoo. ⁵ Onkete akweek kuchurta kule meebere kikeekwaante acheek ng'aleek chee kikeeleebleebeenook nto kikeekwaante ng'al chee iyeele mooyeetyoontiit nyee keeboonte. Roobeech mbo Yeyiin kurubta keey ak ng'aleechu. ⁶ Manaakeesyeem kule nto okaasteech akweek nto kuu chii ake tukul, ⁷ ankoo kiyemaat keenyikisyook acheek keeyeku lebkeyiikaab Kiriisto. Nteenee yu kikeeboonte keey akweek, kikeeyibook nyee karaam kuu woloo yibtooy cheebyoosya nyee ruroot moo lokokyii kuriibe. ⁸ Kikeemache miisin kiibuurte keey akweek nyee meebere kikeekoonook lokooywekaab Yeyiin baateey,nteenee kikiiboorwook ng'aleek chee rubtooy keey ak soboonwekyoo, kuuyu kikeechamaak miisin. ⁹ Mbo ng'eetaabiya, maanii onkete wolee kikeeyiyte yiisyeet ak wolee kikyoomtooy booryeet. Yooto kikeeyieyiisyee beet ak kweemooy. Kikeeyeye kuu nyooto simakeenyikisyook yookikeemwoowook lokooywechoo bo Yeyiin. ¹⁰ Yoo kikeeboonte keey akweek, choo oyeenchine Kiriisto, kyookas ankiikukas nkinee Yeyiin kule keeyekuu acheek biich chee keechurtootiin, chee bo man, amakeeboonte leelis. ¹¹ Onkete mbo kule kiikeeyibook acheek kuu woloo yibtooy boyoo lokokyii. ¹² Kikiititiirook ankiikiimchook kule oyeye ng'aleek chee ing'ereeche Yeyiin nyoo kuurook boobuur tukul oyemte baytooyiisyeenyii akoo wooyinnyii. ¹³ Keebirchine Yeyiin koonkoy akookoy, kuuyu yoo kikeeyikwook lokooyweekyii okas ankoocham meebere kuu lokooy chebo chii buch, nteenee bo Yeyyin. Man, yeyiisye ng'alyoontoonooto am ariing'woong' akweek choo oyeenchine Kiriisto. ¹⁴ Kyoonyooru akweek, mbo ng'eetaabiya ng'aleek chee kerkeey akoo choo kinyooru biikaab Kiriisto choo mii Yuuteeya. Kiinyaliilaak biikwook kuu yoo kiinyaliile icheek Yuutayeek ¹⁵ choo kibekeche Mokoryoonteet Yeesu akoo workoyikaab Yeyiin ankukweteech acheek. Meeng'ereeche bichoo Yeyiin ankukwiile chii ake tukul. ¹⁶ Kisyeem mbo kule kukerekteech kyoomchi lokooywek biiko choo ma Yuutayeek, lokooy chee makuyey kiiraraach bichoo. Nteenee mii kutasyine Yuutayeechaa ng'ookiswookik alak am chooto boonto. Kunyoo, kookoong'woonchi icheek Yeyiin. ¹⁷ Mbo ng'eetaabiya, ankoo kookuyeyeech biiko keebakaakte keey kisich am boorwek, kiisootook akookoy am tamirmiryeet. Kaakwaameech yeemooteet miisin keekasaak subak. ¹⁸ Kiyooto nyee kiyeyeech keemach kiiyeewu woloo omiite. Kyaasyeem anii Bawulo kunyil areet chee chaang' kule nto ayeewu woloo omiite nteenee kikerekteech kibrokosyoonteet. ¹⁹ Mbo ng'oo chee kiikenee keey acheek anku ng'oo chee keeng'ereechee, nto ku ng'oo chee keeng'asee keey yoo makeetuweneech am taayeetaab Mokoryoonteenyoo Yeesu besyoonoo iyeewu? Ma akweek? ²⁰ Kubooyiit ma, akweek chee keeng'asee keey ankeeng'erechee.