¹ Yoyosi a-aminiye kukala Jesu ni Masihi wevyalwa ni Mulungu, na yoyosi amuhenzaye paba pia wamuhenza mwana ariye vyalwa ni iye paba. ² Vivi ndivyo haweza hukamanya kukala hahenza ana a Mulungu: humuhenzaho Mulungu na kutua malakizoge. ³ Kpwa kukala riri ndiro henzo kpwa Mulungu: kukala hutue malakizoge. Wala malakizoge si musigo. ⁴ Kpwa kukala chila ariye vyalwa ni Mulungu ni ku-ushinda urimwengu. Na uu ndiwo ushindi udziwo ushinda urimwengu, hata imani yehu. ⁵ Nani aushindaye urimwengu? Iye a-aminiye kukala Jesu ni mwana wa Mulungu. ⁶ Yuyu ndiye ariye kudza kpwa madzi na mulatso: Jesu Masihi. Kadzire tu kpwa madzi bali kpwa madzi na mulatso. Iye Roho ndiye ashuhudiaye, kpwa kukala iye Roho ndiye ujeri. ⁷ Kpwa kukala ni ahahu mvashuhudiyao: ⁸ Iye Roho, gago madzi, na uwo mulatso. Mvamvo ahahu mva kahi ya makubaliano. ⁹ Ichikala niku hochera ushuhuda wa adamu, ushuhuda wa Mulungu ni mubomu kuriko uwo. Kpwa kukala uu ni ushuhuda wa Mulungu adziwo ushuhudia dzulu ya Mwanawe. ¹⁰ Yoyosi a-aminiye kahi za Mwana wa Mulungu anawo ushuhuda uwo ndaniye. Iye asemwamini Mulungu amuhenda kukala mulongo, kpwa kukala kadza mwamini ushuhudawe Mulungu dzulu ya Mwanawe. ¹¹ Na ushuhuda wenye ndiwo uu: Mulungu wehupa uzima wa milele, na uzima uwo u kahi za iye Mwanawe. ¹² Ariye na iye Mwana ana uzima. Asiye na iye mwana wa Mulungu kana uzima. ¹³ Nidzimva andikira maneno gaga ili mumanye kukala muna uzima wa milele- mwimwi mwaminio kahi za dzina ra Mwana wa Mulungu. ¹⁴ Na uu ndiwo ujasiri huriwo nao mbereze, kukala huchivoya chochosi kpwa mahenzoge, wahusikira. ¹⁵ Pia, huchimanya kukala wahu sikira- chochosi huchi malacho kpwakpwe- hamanya kukala hunacho chochosi humu voyacho. ¹⁶ Mutu andemona nduguye wahenda dambi isiyo olaga, lazima amu voyere, naye Mulungu andamupa uzima. Nanena dzulu ya mvamvo mvario dambi zao kazolaga. Kuna dambi iriyo majibuge ni chifo; sidza amba kukala avoye dzulu ya dambi iyo. ¹⁷ Mahendo gosi gasigo kala ga hachi ni dambi, ala kuna dambi iriyo kayolaga. ¹⁸ Hamanya kukala ariye vyalwa ni Mulungu kahenda dambi. Ala ariye vyalwa ni Mulungu ni kpwikpwa salama, na mwovu kaweza kumu dhuru. ¹⁹ Hamanya kukala hu a Mulungu, na hamanya kukala urimwengu wosi u kpwenye nguvu za iye mui. ²⁰ Ala hamanya kukala Mwana wa Mulungu wekudza achihupa akili kpwamba humumanye iye ariye ni ujeri. Pia, hu kahi za iye ariye ni ujeri, kahi za Mwanawe Jesu Masihi. Yuyu ndiye Mulungu wa jeri na uzima wa milele. ²¹ Anangu, dzitengeni na sanamu.