¹ Kwa vivyo ninamuvoya, enehu, kwa mbazi za Mulungu ilavyeni miri yenu ikale sadaka iriyo moyo, tsunyu, ihenzwayo ni Mulungu. Ii ndo ibada yenu ifahayo. ² Wala musituwizire njira za dunia ii ela mugaluzwe kwa kuhendwaa luvya nia zenu. Hendani vivi muweze kumanya mahenzo ga Mulungu garigo madzo, gakumufahiza na gakukamilika. ³ Kwa kukala namba, kwa chausa cha neema niriyohewa, kukala chila mutu ariye yu kahiyenu kafaha kwaza Zaidi dzuluye mwenye kuriko ihenzekanavyo kwanza. Ela, yunafaha kwaza kwa hekima, here arivyo Mulungu yudziavha chila mumwenga chasi cha Imani. ⁴ kwa kukala huna vilungo vinji kahiza mwiri mmwenga, Ela si vilungo vyosini kukala vina kazi mwenga. ⁵ Vivyo vivyo, siswi hurio hu-anji hu-mwiri mmwenga kahiza Kristo, na vilungo chila mmwenga kwa muyawe. ⁶ Huna vipawa visivyo halana kulingana na muriyohewa. Ichikala chipawa cha mutu ni unabii, na ihendeke kulingana na imaniye. ⁷ ichikala chipawa cha mtu ni kuhumika, ni ahumike. Ichikala muyawe yuna chipawa cha kufunzya, afunzye. ⁸ Ichikala chipawa cha mtu ni kabumamoyo, abumemoyo. Ichikala chipawa cha mtu ni komboza, ahende vivyo kwa umbazi. Ichikala chipawa cha mtu ni kulongoza, ahende kwa kukala matso. Ichikala chipawa cha mtu ni kahiza konyesa mbazi, na ahende kwa nyemi. ⁹ Henzo risikale ra ulongo, kahalani ui, mugwirire garigo madzo. ¹⁰ dzulu ya uhenzo wa ndugu, henzanani mwimwi kwa mwimwi. Dzulu ya hishima, hishimianani mwimwi kwa mwimwi. ¹¹ Kuhusu chadi, musikala akaha. Kuhusu Roho, kalani na pola. Kuhusu Bwana mhumikireni. ¹² Kalani na nyemi ungumbau mrionao kuhusu tsiku zidzazo. Mukale na kutariza kahiza tabu zenu. Mukale kahiza kuvoya. ¹³ Mdzombozera kahiza mahitaji ga aumini. Yeyani njira nyinji za konyesa umbazi. ¹⁴ Ahenzereni baraka osini amusirimisao ahaseni wala musi-alavhize. ¹⁵ Kalani na nyemi vhamwenga na enye nyemi, rirani vamwenga na arirao. ¹⁶ Mukale na nia mwenga mwimwi kwa mwimwi. Musi-aze kwa kudzivunya, ela muhenze kudzi-shuhulisha na mauti manyonge. Musikale na hekima dzulu ya mazo genu enyee. ¹⁷ Musimurivhe mutu yeyosi rii kwa rii. Hendani mautu madzo matsoni va atu osini. ¹⁸ Kala indawezekana, dzahere irivyoi kwa kwenu, mukale na reri na atu osini. ¹⁹ Ahenzwi, msidzirivizire chisasi enyee, elaipiseni koro ya Mulungu. Kwa kukala idzandikwa “chisasi ni changu; mimi nindriva; yunena Bwana.” ²⁰ “Ela ichikala adui wa kwako yuna nzala, murise. Achikala na chiru, munywese. Kwa kukala uchihenda vivyo, undamupatikira makala ga moho dzulu ya chitswache.” ²¹ Usishindwe ni ui ela ushinde ui kwa udzo.