¹ Kisha Malaika achinonyesha muho wa mudzi ga uzima, madzi garigokala ganang’ala here wa bilauri. Gekala gachitiririka kombola kahiza chihi cha enzi cha Mulungu na cha mhwanang’onzi. ² Gachichirira kahikahi ya mutaa wa mudzi kahi za chila upande wa muho khwekala na muhi wa uzima uvyalao aina kumi na mbiri za matunda na ni kuvyala matunda chila mhwezi. Makodza ge ni khwa ajili ya uhozwo wa mataifa. ³ Wala kakundakala laana yeyosi keheri. Chihi cha enzi cha Mulungu na cha mhwanang’onzi chindakala ndani ya mudzi, na atumishie vhandamuhumikira. ⁴ Vhandamona uso we na dzina rerindakala dzulu ya vipaji vya nyuso zao. ⁵ Kahandakala na hitaji ya mhwangaza wala taa au dzua khwa sababu Bwana Mulungu andalangaza dzulu yao. Nao vhandatawala milele na milele. ⁶ Malaika achinambira, “Maneno gaga ni ga kuaminika na jeri. Bwana Mulungu wa roho za manabii wemuhuma Malaika we kuvhaoyesa atumishie chindeomborera vivi karibuni. ⁷ “Lola! Nadza upesi! Adzibarikiwa iye atiiye maneno ga unabii wa chitabu chichi.” ⁸ Mimi Johana ndiye niriyesikira na kugaona mambo gaga. Nirihogasikira na kugaona neghwa tsini mhwenye mbere za magulu ga Malaika kumhwabudu, Malaika ariyenonyesa mambo gaga. ⁹ Achiniambira usihende vivyo! Mimi nami nimutumishi munzio, hamhwenga na ndugu zo manabii, hamhwenga na vharatu ambavho vhanatii maneno ga chitabu chichi. Mhwabudu Mulungu. ¹⁰ Kisha achinambira, “Usigenjize muhwi maneno ga unabii wa chitabu chichi, maana wakati udzifika hehi. ¹¹ Ariye si mhwenye haki aenderere kubaki vivyo. Ambaye ni muchafu chi maadili aenderere kukala muchafu. Mhwenye haki naenderere kukala mhwenye haki. Ariye mutakatifu aenderere kukala mutakatifu. ¹² “Lola nadza upesi. Ujira wangu uhamhwenga nami, kumuriha chila mumhwenga kulingana na arichochihenda.” ¹³ Mimi ndimi Alfa na Omega wa khwanza na wa mhwisho, Mhwanzo na Mhwisho.” ¹⁴ Vhadzibarikiwa vharatu vhafulao mavazi gao ili khwamba vhapate kurya kula khwa muhi wa uzima na khwenjira mudzi wa kuchirira muyangoni. ¹⁵ Nze kuna kuro, atsai, azinzi, aolagi vhaabuduo sanamu na chila ahenzaye na ashuhudiaye Ushahidi wa ulongo. ¹⁶ Mimi Jesu nidzimuhuma Malaika wangu kuvhashuhudia kuhusu mambo gaga khwa makanisa. Mimi ni muzi ya uzao wa Daudi, nyenyezi ya madzacha ing’alayo. ¹⁷ Roho na bibi arusi vhanamba, “Nzo! Na iye asikiraye agombe “Nzo!” Yeyosi ariye na chihu nadze na yeyosi agatamaniye agapate madzi ga uzima bule. ¹⁸ Namushuhudia chila mutu asikiraye maneno ga unabii wa chitabu chichi. Chamba yeyosi andaonjeza kahi za gago Mulungu andamonjezera mabigo garigoandikhwa kahi za chitabu chichi. ¹⁹ Khwamba mutu yeyosi andiyeusa maneno ga chitabu chichi cha unabii, Mulungu andausa sehemu kahi za muhi wa uzima na kahi za mudzi mutakatifu ambao habari ze zidziandikhwa ndani ya chitabu chichi. ²⁰ Iye ashuhudiaye mambo gaga anamba, “Ndiyo nadza upesi, Amina nzo, Bwana Jesu.” ²¹ Neema ya Bwana Jesu ikale na chila mutu. Amina.