¹ Uu ni ufunulo wa Jesu Kristo ambao Mulungu wemupa ili kuvhaonyesha atumishie mautu ambago lazima gahendeke karibuni.Wegahenda gamanyikane khwa kumuhuma malaikawe khwa mutumishiwe Johana. ² Johana weomboza ushuhuda wa chila chitu arichoona kuhusu neno ra Mulungu na khwa ushuhuda urioombozwa kuhusu Jesu Kristo. ³ Webarikiwa iye asomaye khwa sauti na vharaa vhosi vhasikirao maneno ga unabii uu na kutii chirichoandikhwa mumo, khwa sababu muda udzikaribia. ⁴ Johana, khwa makanisa mafungahe garigoko Asia. Neema ikale khwenu na amani kula khwakhwe ariyeko, ariyekalako na andiyekudza, na kula khwa Roho fungahe zirizo mbere ya chihiche cha enzi, ⁵ na kula khwa Jesu Kristo ambaye ni shahidi mwaminifu, muvyalwa wa khwanza wa vhariofwa, na mutawala wa afalume a dunia ii. Khwakhwe iye ahuhenzaye kuhonjesha dzambi zehu khwa milatsoye, ⁶ adzihuhenda kukala ufalume na makuhani ga Mulungu na Babaye- utukufu na ubomu unaiye ta milele na milele. Amina ⁷ Lola, anadza na maingu; kila dzitso rinda mona, hamhwenga na vhosi vhariomutsoma.Kabila zosi za dunia vhandaomboleza khwa sababuye. ⁸ ''Mimi ni Alfa na Omega,'' anamba Bwana Mulungu,''Iye ariyeho na ariyekalako na ambaye andakudza, mhwenye nguvu.'' ⁹ Mimi Johana- ndugu yenu na mumhwenga ashirikiye hamhwenga nanwi kahi za mateso na ufalume na uvumirivu kamili urio kahi za Jesu; Nekala kahi za chisiwa chehewacho Patimo khwa sababu ya neno ra Mulungu na ushuhuda wa Jesu. ¹⁰ Nekala kahi a Roho siku ya Bwana.Nesikira nyuma yangu sauti ya dzulu here ya tarumbeta ¹¹ Ichamba,'' Andika kahi za chitabu gago ugonago, naugahume khwa makanisa mafungahe, khwenda Efeso, smirna, Pergamo, Thiatira, Sardi, Filadelfia na Laodikia.'' ¹² Nichigaluka kona ni sauti yaani ariyekala achinena nami, na nirihogaluka nichoona chinara cha dhahabu cha taa fungahe. ¹³ Kahikahi ya chinara cha taa wekalamo mumhwenga here mwana wa Adamu, avala kanzu nyire iriyofika tsini ya magaluge na mukanda wa dhahabu kuzunguluka chifua che. ¹⁴ Chitswache na nyereze zekala nyeruhe here sufu, nyeruhe here theluji, na matsoge gekala here mngalo wa moho. ¹⁵ Nyayoze zekala here shaba idziyosuguiwa sana, here shaba ambayo tayari ichizwa kahi za moho, na sautiye yekala here sauti ya madzi manji gateremukago khwa malo. ¹⁶ Wekala adzighwira nyenyezi fungahe kahi za mukonowe wa kurya, na kula mulomoni mhwe khwekala na panga kali renye makali kosi kosi.Usowe wekala uchingala here mulangaza mukali wa dzua. ¹⁷ Niriho mona nenghwa maguluni mhwakhwe here mutu adziyefwa.Achika mukonowe wa kurya dzulu yangu na achamba,''Usogohe! mimi ni wa khwanza na wa mhwisho, ¹⁸ na ambaye ninaishi.Nekala nidzefwa lakini lola, ninaishi milele! Na ninazo funguo za mauti na kuzimu. ¹⁹ Khwa vivyo, gaandike udzigogaona, garigoko sasa, na gandagokudza baada ya gaga. ²⁰ Kuhusu siri ya nyenyezi fungahe urizozona kahi za mukono wangu wa kurya, na viraa vinara fugahe vya dhahabu. Nyenyezi fungahe ni malaika a garatu makanisa mafungahe, na chinara cha taa fungahe ni garatu makanisa mafungahe.