^{2 1} Ne kecha kava vari lwa Yeso yali niyakhamala okhurusia elilaka khu aveki vave ekhumi na vavili, yarekukha okhurula avwene yawo okhucha okhusomia niyelwacha mumatokho kavo. 2 Anga Yohana yawulila nali muchela emilimo kia Yeso, yaruma vavili khu veki vave, ³ Vamureve vari, Niwe ulia walecha, nohomba khulinde owundi? ⁴ Yeso wavachiva ne wavasungila ari, Chee ne mwekesie Yohana khandi amakhuwa kalia kamwalawulilanga nende kamwalalolanga: ⁵ Avavofu valalolanga, ne avalema valakendanga, avamachele valatakasiwangwa, ne avasilu valawulilanga, avafuu valalamukhanga, ne avatakha valelwachilwangwa amakhuwa amalayi. ⁶ Ne uneyikhavi, ulia yesi ukhalesicharasia sikila esie. ⁷ Ne anga varekukha, Yeso yachaka okhusungila olukhumulo okhulondokhana nende Yohana ari, muchile elwanyi musiangalamwe okhulola sina? Elikhindu lie eyimboo yalasisikhanga? ⁸ Nikakhali enywe mwachile elwanyi okhulola sina? Omundu wifwalile echinguvo cho ovukusi? lola, valia vafwalanga echinguvo cho ovukusi vavechanga muchinju cha avaruki. ⁹ Nikakhali enywe mwachichanga elwanyi okhulola sina? Omung'osi? eeh, namusungilanga enywe, ne uno uvirilekho omung'osi. ¹⁰ Nono wuno niye , wakandikwa vari, Lola, Narumanga omurumwa wanje evweni wuwo, walanyowa okhukhulombela ewe eyinjila. ¹¹ Kang'ali namusungilanga enywe, Khu valia vosi vevulwa nende avakhasi, avulakhowo wachingulwa ikulu anga Yohana Omubatisi tawe: navusa uli omutiti khu vosi mu ovwami vwo mwikulu nomukali okhumuvura. ¹² Ne okhurula echindalo cha Yohana Omubatisi okhutukha vulano vuri, ovwami vwo mwikulu nivwo esilufu, ne vesilufu nivo valavuvukula. ¹³ Nono avang'osi vosi nende elilako varusia ovung'osi okhwola khu Yohana. ¹⁴ Ne nomwiyama lino,wuno niye Eliya, wenyekhananga yeche. ¹⁵ Wulia uli na amarwi ko okhuwulila, lekha awulile. ¹⁶ Nikakhali efwanilisie eselukho yino nende sina? Ivele anga avana vekhale khu soko, ne valalangilisianga vasiavwe, ¹⁷ Nivasunga vari, Khumupile emilele kie sikhoyelo ne simukhinile tawe; khwimbile cha amasika, ne simwikhulile tawe. ¹⁸ Nono Yohana yecha nakhalichanga nohomba nakhanywechanga tawe, navo vamusunga vari, Une sisieno. ¹⁹ Wo Omwana wo mundu yecha nalalichanga ne nalanyw'echanga, ne vasunga vari, Lola omundu omukhalukha, khandi omumesi, omusale wa avasololi vo ovushuru nende avooni. Nikakhali ovechesi vulolekhanilanga muvung'ali vwa avana vavwo. ²⁰ Nono naye wachaka okhuvakondokhela vo mumatokho valia wayava nakholile emilimo kikie eminyingi, sikila sevayekanila tawe. ²¹ Nesilamo khwinywe, Korasini, nesilamo khwinywe Betsisaida! nikakhavele emilimo emikali, kiekholekhana mwinywe, kiakhekholekhane Tiro nende Sidoni, andi vayekanila khale nivefwimbile amakunia nende okhwivakha elikokhe. ²² Nikakhali navasungilanga enywe, kaliva amangu khu Tiro nende Betsisaida khuyindalo yelikhalakilwa okhuvira enywe. ²³ Ne enywe, Kapernaumu, mwayeninia khwola mwikulu, mwalekhisivwa okhwola musiatisi: nikakhavele emilimo eminyingi, kiekholekha mwiwe, kiakhekholekhe Sodoma, yakhavelewo khwola eyindalo ya vulano. ²⁴ Nikakhali navasungilanga enywe, Kalava amatinyu khwinywe eyindalo yelikhalakilwa, okhuvira esivala sia Sodoma. ²⁵ Khusikha sienesio Yeso wavachiva ne wasunga ari, Ooh Papa, Omwami we likulu nende elilova, ekhubila orio eyingali, sikila ewe wakisa amakhuwa kano okhurula khu avachesi nende avarekelefu, ne ufunulile avana avatiti. ²⁶ Kakhava kario Papa: nono anga kakhuyanjisie wamwene evweni wuwo. ²⁷ Papa wumbelesie evindu viosi: ne avulawo omundu wumanyile Omwana tawe, nikakhali Papa; nohomba avulawo omundu umanyile Papa tawe okhurusiakho Omwana, nende khuwulia yesi wo Omwana alamufunulila okhumumanya ²⁸ Yiiche khwisie, enywe mweesi munyakhananga nende okhuyekhelwa nemisiko emisiro, ne nasie namuwulusia. ²⁹ Fwale omuyoki kwanje ne mweke okhurula khwisie; okhuva esie nivele omuwolu khandi wokhwitutuya mumwoyo: nanywe mwalanyola okhuwulukha mumioyo kienyu. ³⁰ Omuyoki kwanje kwayangua, khandi omusiko kwanje nomwangu.