¹ Ne olwa inyanga ya pentecote yali niiyulile,bali bosi mubulala habundu halala ² ne kwarulira mumuyeka omwoyo omukhongo okhurula mwikulu, shinga imbumbuyeka ikhongo, niitsula munzu yabali nibekhalemwo. ³ Ne tsilolekha khubo, tsinimi shinga tsiomulilo, nitsiashila buli mulala khubo. ⁴ Nabo boosi nibetsulwa nende Roho mulafu, nibachaaka okhuboola mutsinimi tsindi shinga olwa Roho yabaheresia obuboli. ⁵ Ne khwaliyo nende abaYahudi bamenyanga Yerusalemi, berusia, okhurula buli mwihanga mushialo shiosi hasi we liuba. ⁶ Ne olwa kano kaulirikha erwanyi, abandu bosi betsa, nibalamanyirisia ta, okhuba buli mulala yabahulira nibaboola mutsinimi tsiabwe abene, ⁷ nibauchisibwa, nibahuka, nibabolanira, lole ababoolanga bano bosi shibali abaGalilaya? ⁸ Mbushina nikhuhulira buli mulala naboola mutsinimi tsiefwe etsia khwebulwo mwo? ⁹ Abapathia, Pamfilia, Abamedi, Abalemi, nende Abamenyi ba Mesopotamia, nende Yudea, Kapudesia, nende Pontia Ashia. ¹⁰ Figia, Pamfilia, Emisiri, nende tsingongo tsia Libia, hambi Sereni, nende abacheni baRoma, abaYahudi nabebifwalo ebilafu. ¹¹ Abakirete, Abarabu, boosi khwubahulira nibaboola mutsinimi tsiefwe, ebikhole ebikhongo biaNyasaye. ¹² Nabo bosi nibahuka,nibaba nokhuhayahaya, nibaboolerana, lino limanyisia shi? ¹³ nabo abandu nibabanyokhosia, nibaboola mbu, abandu bano bamerire amalwa. ¹⁴ Naye Petero nasinjira nende ekhumi nende mulala nachinguula omwoyo naboola," enywe abandu baYuda, nende bosi abamenyanga Yerusalemi, murecheresie obulayi amakhuwa kanje ¹⁵ Okhuba abandu bano shibamerire shinga olwa muparaanga ta, okhuba kushili mumabwibwi isaa yakhataru. ¹⁶ Ne lino nilio eliaboolwa nende omulakusi Yoeli, ¹⁷ mbu mutsinyanga tsiokhumalilikha, ndalatsukha Roho wanje khubuli womubili, ne abasiani nabakhana benywe balalakula, nabo ababukha balalola amalolelo, nabo abakofu bala lora amaloro. ¹⁸ Nekhubasumba banje, nende abakhalabani, ndalatsukha mutsinyanga etso Roho wanje, nabo bakhalakule. ¹⁹ Ndakhalolesie amangalimwa mwikulu nende khushialo, nende hasi weshialo, amatsayi, omuliro, nende omuya kwomwosi. ²⁰ Nalo eliuba liakhakalukhasibwa okhuba eshirima, nokwo omwesi kuliba amatsayi, inyanga ikhongo yo Mwami niishiri okhuula. ²¹ Ne kaliba mbu, yesi oulanga khulira lioMwami, alihonibwa. ²² Enywe abandu ba Israeli, wulire amakhuwa kano, Yesu wa Nazareti, omundu owasubisibwa nende Nyasaye mwinywe mubikhole biamangalimwa ebia Nyasaye yakhola muye hakari wenywe, shinga olwamwesi mumanyire. ²³ Nahanwa shinga olwa kakasibwa nende obumanyirisi nobupari bwa Nyasaye,mwabukula,ne mumakhono amabii mumukhoba. ²⁴ OwaNyasaye yalamusia okhurula mubafu, narusia obululu bwokhufwa, okhuba shikakhanyaliishe mbu, lifwa limuhule ta. ²⁵ Okhuba Daudi yaboola khuye, "ndalola omwami imbeli wanje, okhuba ali khumukhono kwanje musatsa, mbu shindalahendibwa ta. ²⁶ Kho omwoyo kwanje kwasangala, nalwo olulimi lwanje nilutsatsahala, khandi omubili kwanje kulahulukha mubusubiri. ²⁷ Okhuba sholanyala ̇okhulekha omwoyo kwanje emakombe ta, khandi shonyala okhwiyama omutsienukhuwo okhulola obusasishi ta. ²⁸ Ewe wachira nemanya tsinjira tsiobulunjishi, olanzitsusia obuyanzi bwobulamu khubwenibwo. ²⁹ Banabefwe, leshe ebaboolere habulafu khukakuka wefwe omuruchi Daudi, mbu, yafwa mana nayabirwa, nasho eshirindwashie shiri ninefwe hano okhula bulano. ³⁰ Okhuba yali omulakusi, namanyirisia imbeli mbu, Nyasaye yali niyetsuba khuye mbu, olwibulolwe lwomubili, lwakhamulamusie Kristo okhwikhala khushifumbi shioburuchi, ³¹ Naye nalutsi kano, yaboola khubulamushi bwa Kristo, mbu, nafusi ye, nomubilikwe shibili lola emakombe noho okhulola obusashishi ta. ³² Yesu oyo, Nyasaye amulamusiye, nefu fwesi khuli abaloli. ³³ Kho bulano nali omukhono musatsa kwa Nyasaye, naye namalire okhunyoola omulango kwa Roho mulafu, amalire okhukhola elia mulola nende okhuhulira lino. ³⁴ Okhuba Daudi shiyakulukha mwikulu ta, nebutswa yabolakhwo, Omwami Nyasaye yaboolěra Omwami wanje, ikhala hano khumukhono kwanje omusatsa, ³⁵ okhula olwa endakhola abasukubo bosi okhuba hasi webilenjebio. ³⁶ Kho, bulano leshe inzu ya Israeli emanyiire elala mbu, Nyasaye amakholire Yesu owamwabamba, okhuba Omwami khandi Kristo. ³⁷ Ne olwa bah ulira yako, batsunwa mumioyo chiabwe, nibabolera Petero, nende abarume bosi, abasatsa nende abana befwe, khukhole shina? ³⁸ Naye Petero, nakalusia naboola, Mwikalukhasie, mana mubatisibwe mulira lia Yesu Kristo, mbu munyale okhulesherwa tsimbi, nenyu mulanyoola eshihanwa shia Roho mulafu. ³⁹ Okhuba amalako kano nikhulwenywe, nende abana benywe, nende balia bosi abali ehale, Kata balia bosi bomwami alaanga. ⁴⁰ Halala nende amakhuwa kandi amanji, yarusia kobuloli, natinyirisia, naboola, mwihonie okhurula khulwibulo olubii luno. ⁴¹ Nabo balia abenjisia likhuwa mubusangafu, babatisibwa. Nayo khunyanga eyo, bametekha ebikhumira bitaru khubalia abasuubila. ⁴² Nabo nibatsirira mumani khumechesio kabarume, nende mubusanjirani, nokhulia omukate nende amasayo. ⁴³ Mana oburi nibutira bosi, nako amangalimwa nebilolero ebiekholekha okhuburira khubarume. ⁴⁴ Nabo bosi abasubiri bali halala, nibaba nebindu biosi mubulala. ⁴⁵ Nibakusia ebindu biabwe, nibaheresia abandu shinga olwa bali nobulemu. ⁴⁶ Nabamwitsira halala bulinyanga mubulala munzu nende Muhekalu, nibala omukate mutsinzu mubusangali bwobulala nomwoyo. ⁴⁷ Nibamwitsomia Nyasaye, nibanyola okhwiyamwa nabandu bosi. Naye Omwami nabameteranga khwikanisa abanji khulwokhuhonibwa.