¹ Amakhuwa kayahandika, Theofila, khukalia akaYesu yachaka okhukhola nende okhwechesia. ² Okhula inyanga yayabukulwa ikulu, olwa yali niyakhamala muRoho mulafu okhubaheresia amalako abayali niyaule, ³ khuyabo abayaloleshera, mubwatoto bwene, nalolwa ninabo tsinyanga amakhumi kane, nabolanga abindu abirondokhana nobwami bwoMwikulu. ⁴ Naye nakhung'anire halala ninabo, nabalachiriisia mbu, shibalarula Yerusalemi ta, ne mbu balinde okhula olwa banyoola omulako kwa Papa, okwa mwahulira khwisie, okhuba toto Yohana yabatisia namatsi, ⁵ nenyu mulabatisibwa nende Roho mulafu tsinyanga tsindutu okhurula bulano. ⁶ Ne olwa bali nibetsire halala, bamureba, nibaboola mbu,Omwami, witsa khubise bino okhukalusia oburuchi bwaIsraeli? ⁷ naye nababoolera, shikali khwinywe okhumanya, ebise nomba tsinyanga tsia Papa yara mumanike ta, ⁸ nebutswa mulanyoola amani, Roho mulafu olwayekha khwinywe, nenyu mulaba abaloli banje muYerusalemi, Yudea, Samaria nende khumwisho weshialo shiosi. ⁹ Ne olwa yali niyakhaboola kano nibamurerekhwo tsimoni, yabukulwa ikulu, nalo liresi nilimufunikha nibalamulola ta, ¹⁰ ne olwa bamulola, shinga olwa yatsia mwikulu, lole abandu babili mutsingubo tsindafu basinjira yaho, ¹¹ nabo nibaboola, inywe abandu baGalilaya, "mbushina nimusinjiire nimuhenga mwikulu? Yesu mulala uno oubukulwe khwinywe niyenjira mwikulu, khandi ailitsa munjila yene eyo, shinga olwa mulutsi natsia mwikulu. ¹² Nabo nibakalukha Yerusalemi okhurula khushikulu shiemzeituni, okhurula Yerusalemi oluchendo lwelichuma elala. ¹³ Ne olwa bola, batsia mushikoro shieikulu, ewa bamenyanga, Petero,Yohana, Yakobo, Anderea, Filipo, Tomaso, Batolomayo, Mathayo, Yakobo omwana waAlufayo, nende Simioni omuziloti, nende Yuda omusiani wabo Yakobo. ¹⁴ Bano bosi batsilila halala mubulala, mumasayo nende okhusaba, nende abakhasi, nende Mariamu, mama wa Yesu, nende abasiani babwe. ¹⁵ Mutsinyanga etso, Petero nasinjila hakari wabechi, naboola, bosi bali shinga imia nende amakhumi kabili. ¹⁶ Naboola, bana befwe nende abandu bosi, lihandiko lino okhula liusibwe, elia Roho mulafu okhuburira khuDaudi yaranjirira okhuboola khuYuda, owabemirira balia abamutira Yesu. ¹⁷ Okhuba yali mulala khwifwe, naye yali nende omukabo mubukhalabani buno", ¹⁸ ( Ne bulano omundu uno yakula omukunda nende amang'ondo kobubii, naye nakwiira omurwe,yatikhamwo, ne ebiomundabie nibirula erwanyi biosi. ¹⁹ Nako nikamanyikha mubamenyi boosi baYerusalemi, okhula omukunda oko nikulangwa khuliira mbu,"AkaliDama". Nikhwo okhubola mbu,omukunda kwamatsayi"). ²⁰ Okhuba kahandikwa muZaburi mbu, obumenyibwe bube obukhaya, naye omundu yesi shalamenyayo ta, nobukhalabanibwe, oundi abukule. ²¹ Khulwako, khubandu bano ababere ninefu, tsinyanga tsiosi, olwa Omwami yali ninefu, ²² okhurula khushibatisio shia Yohana, okhula khunyanga yokhubukulwa okhurula khwifwe,okhula mulala abukulwe okhuba omukobosheri wobulamushibwe. ²³ Nabo nibaula babili, Yusufu owalangwa mbu, Barisaba owakulikhwa mbu, Yusto, nende Mathias. ²⁴ Nibasaya, nibaboola, ewe Omwami oumanyile emioyo chiabandu, khuheresie mulala khubano, ²⁵ mbu anyale okhuba mulala khubukhalabani bwoburume, obwa Yuda, khulwa tsimbi tsie yakwa. Mbu anyale okhutsia abunduwe. ²⁶ Nabo nibakhola ikhaa, nayo ikhaa niimukwiira Mathias, naye nabasibwa okhuba mulala khubechi.