¹ Naye niyetsa Derube nende Lisitera, ne lole omwechi undi yaliyo, owalangwa mbu Timotheyo, omwana womukhasi wundi omuyahudi, nasubirira,ne samwana yali omuyunani. ² Abaherwa bali Lisitera nende Ikonia barusia obuloli obulayi khuye. ³ Naye Paulo yamubukula, namusheba khukwa abaYahudi abali ebweneyo, shichila bamanya mbu samwana yali omuyunani. ⁴ Ne olwa bali mwitokho,babalachirisia mbu babalinde balia abahulwa nende abarume nabakhulundu abali Yerusalemu. ⁵ Nako amakanisa nikatinya mubusubiri mubunji. ⁶ Ne olwa bali nibabirire, Figia nende Galatia, bakaywa nende Roho Omulafu okhuyaala oburume muAshia. ⁷ Olwaboola Misia, bambukha nibatsia Bithinia, naye Roho nalabafuchirira ta, ⁸ nibaburira Misia nibatsia emwalo Trao. ⁹ Amalolera nikamwitsira Paulo mumabwibwi, yalola omundu wa Makedonia namusaaya, naboola, "yitsa Makedonia okhukhonye. ¹⁰ Ne olunyuma lwamalolero, khwamala nikhurula nikhutsia Makedonia nikhumanyirisia mbu Omwami akhurumire khuberwatsire oburume obulayi. ¹¹ Kho nikhurula Trao,nikhulunjikha nikhutsia Samotheria ne inyanga yalondakhwo nikhuula Nekapoli. ¹² Nikhurula yo nikhutsia ebuFilipi,elili litokho likhulundu muMakedonia khandi , nikhubamwo tsinyanga tsinditi. ¹³ Ne khunyanga yeisabato, khwarula erwanyi welitokho, nikhutsia khulukuku liomwalo ewakhwali mbu khukhole amasayo, nikhwikhala hasi, nikhuboola nende abakhasi abamenyayo. ¹⁴ Naye omukhasi wundi welira mbu Ludia, owakusinjia tsingubo tsiekitani, womwitokho lia thiatira, owamwinamiranga Nyasaye,yahulira mbu khuliyo, owaNyasaye yekula omwoyokwe, naye narecheresia amakhuwa kosi kabolwa nende Paulo. ¹⁵ Naye nabatisibwa ye nende abeinzuye, nakhusaba mbu, nimuba nimulutsi mbu, khusubirire khumwami, yitse mumenye ninefu munzu, mana nibakhutinyakhwo. ¹⁶ Ne olwa khwali nikhutsitsanga mumasayo, omukhana wundi owali nebishieno biobufumu, yakhwakaniira, naye yareriranga omwamiwe obukhala obukhongo khubufumubwe. ¹⁷ naye nakhulondakhwo nende Paulo,naboolanga, abasatsa bano nabakhalabani bomwami womwikulu, narumbulaanga injiira yobuhonia. ¹⁸ Naye yakhola ario tsinyanga tsinyinji.Naye Paulo nahulira obululu mumwoyo kukwe, yamushukhanira, nayibira roho oyo, ekhulaka mulira liaYesu Kristo, rula, naye narulamwo ebise ebo. ¹⁹ Naye olwa Omwamiwe yaloola mbu obunayi bwobukholibwe buwere, batiira Paulo nende Sila nibabayira mushiiro khubaami. ²⁰ Ne olwa bali nibabayirire khubayasi, nibaboola abandu bano nabaYahudi, banyasia litokho liefwe muno. ²¹ Nabo bechesia amakhuwa akalali amalako kefwe shinga Abaroma. ²² Nako omukanda nikubashukhaniira, naye omuyasi nibarandula tsingubo, nalaka mbu bakhupwe. ²³ Nabo olwabali nibakhabakhupa emisharati eminji, babara mumboye, nibaboya nibabira abalindi babaenjeresie obulayi. ²⁴ Nabakhalachira bario, babara mumboye, nibababoya ebirenje biabwe neminyololo. ²⁵ Ne mushiro hakari Paulo nende Sila,basaaye nibemba tsinyimbo tsiokhwitsomia Nyasaye, nabo ababooye nibahulira. ²⁶ Mulwangu eshialo shiarenga, okhula emise chieimboye nichireenga.Nachio emiliango chiosi nichikukha, emikhono chiabandu nichibolokha. ²⁷ Naye omulindi olwa yabukha mundolo, nalola emiliango nichikushe, yakhwesa olukanga niyenya okhwiyira, mbu ababohe batsire. ²⁸ Naye Paulo nalira nomwoyo omukhongo, sholekhola libi ta, okhuba khuliho fwesi. ²⁹ Naye nahafia obulafu, niyetsa narengarenga, nakwa mumakulu ka Paulo, nende Sila. ³⁰ Naye nabarusia erwanyi naboola, abami, ekhole shina enyale okhuhonibwa? ³¹ nabo nibabola, subirira muMwami Yesu Kristo, nenyu mulahonibwa nende inzu yenyu. ³² Nabo nabasunjira likhuwa liaNyasaye nende bosi abali munzu. ³³ Naye nababukula mushiro, niyosia amakhupache kabwe, nabatisibwa ye nende inzuye. ³⁴ Ne olwa yali niyakhabarera munzuye, narera shiokhulia, nibasangala, okhusubirira muMwami nende inzuye. ³⁵ Ne olwa eshitere shiola, abayaasi baruma abandu mbu "balekhulwe". ³⁶ Naye omukhongo weimboye naboolela Paula nende Sila, "omuyaasi wenywe arumasiye mbu mulekhulwe mutsie, kho bulano tsie nomulembe". ³⁷ Naye Paulo namubolera, bakhuupire habulafu efwe abaroma, nibakhura mumboye, ne bulano benya okhukhulekhula mumefiswi? tawe, lekha betse abene bakhulakhule. ³⁸ Nabo abasinjiriri nibabolera abayaasi amakhuwa yako, nabo nibaria olwabahulira mbu, nabaRoma. ³⁹ Nibetsa nibabasaaya, nibabarusia, nibababolera barule mwitokho. ⁴⁰ Nibarula mumboye, nibenjira munzu ya Ludia, ne olwa bali nibakhalola abaheerwa, babahotseresia mana nibatsia.