¹ Ne abandu bandi bakholomokha okhurula ebuYahudi, nibechesia abana befwe mbu khandi "mulashebwa shinga olwa eshima shiaMusa olwa shiali ta, shimunyala okhuhonibwa ta". ² Ne olwa Paulo nende Baranaba bali nibayingane ninabo muno, Paulo nende Baranaba nendee abandi khubo batikulukha nibatsie Yerusalemu ewa abakofu nende abarume bali khulwa amakhuwa kano. ³ Kho nibarumirwe nende Ikanisa, baburira muFoinike nende Samaria mwosi nibarumbulanga akokhwikalukhasia khwabamahanga,bameta obutsatsahafu obunji khuabane befwe boosi. ⁴ Ne olwa boola Yerusalemu, benjisibwa nende Ikanisa nabarume, nabakofu nabatonyera amakhuwa kosi akaNyasaye yali nakholire ninabo ⁵ Ne khubandi bomukhung'ano kwabafarisayo, abasubirira, babukha nibasuunda amakhuwa nibabola mbu "okhula bashebwe okhulinda amalako kaMusa". ⁶ Mana abakofu nende abarume bali nibakhung'anire halala okhutinyisia khwikhuwa lienelo. ⁷ Ne olunyuma lwokhuyingana okhukhongo muno Petero yasinjira nababoolera mbu,banabefwe, mumanyile mbu, okhurula mutsinyanga tsiambeli, Nyasaye yandobola mwinywe mbu mumunwa kwanje abamahanga bahulire oburume obulayi nibasubirira. ⁸ Ne Nyasaye oumanyile emioyo chiabandu, yabarumbulira abobuloli bwatoto nabaheresia Roho Omulafu shinga olwa yakhuheresia ifwe. ⁹ Kata shiyakhola obwahuli bwosi hakari wefu ninabo ta. nabasiiya emioyo chiabwe khulwobusubiri. ¹⁰ Kho, bulano nishina eshichira nimukana Nyasaye, nimurakhwo likokolo khwikosi liabechi eliakhaya abakuka befwe nende ifwe abene okhuchinga? ¹¹ ne khusubire mbu ifwe khulahonibwa khulwa obukosia bwoMwami Yesu shinga yabo. ¹² Abomukanda bosi nibaholera tsi, nibarecheresia aka Baranaba nende Paulo baboola, akebilolelo nende amangalimwa akaNyasaye yakhola mubamahanga khumakhono kabwe ¹³ Ne olwa bali nibaholerire, Yakobo nakalusia naboola mbu, "banabefwe,mumbulirekhwo. ¹⁴ Simioni akhuboleere shinga olwa Nyasaye yaranjirira okhuchendera Abamahanga, okhwibukulira abandi khulwa eliralie. ¹⁵ Kata amakhuwa kabalakusi keyamanaanga nende shinga olwa kahandikwa mbu, ¹⁶ olunyuma lwa amakhuwa kano, ndalacherera, nindumbakha khandi eshimenyo shia Daudi eshisambushe, nindumbakha kata oburuchi. ¹⁷ Mbu abandi batonye bamukhaabe Omwami nende Abamahanga bosi, abakulishirwa mulira lianje. ¹⁸ Nilwo Omwami aboola, ouchingulanga amakhuwa kano nikamanyikha okhurula mubuchachiro. ¹⁹ Khulwako, obukhalachi bwanje mbwobuno, mbu, khuleshe okhubanyasia Abamahanga abamukalushire Nyasaye ²⁰ nebutswa khubahandichire mbu, baleshe okhulia ebindu bieshifwabwi, biokhuhanirwa ebifwanani, nende obuheyi nende inyama yetsisoolo tsimichirwe na amatsayi, ²¹ Okhuba khurula khubisoni ne nebisoni Musa abetsaanga nende yabo aberwatsa amakhuwa keke mubuli tala nikasomwa mutsimbeka buli habundu. ²² Mana abarume nende abakofu halala nelikanisa liosi balola mbu nobulayi okhwahula abandu mubo b bene mbu barumwe Antiokia halala nende Paulo nende Baranaba mubana baYuda oulangwa mbu, Basinaba, nende Sila abali abakhulundu mubana befwe. ²³ Nibahandika ibarua namakhono kabwe, mbu," okhurula khubarume nende abana benywe abakhulundu, koole khubana befwe Abamahanga abali muAntiokia nende Siria nende Kilikia, amashesio khwinywe. ²⁴ Okhuba khuhulire shinga abandi barula mwifwe olwa bamunyasiye namakhuwa, nibakoyasia emioyo chienywe, habula ifwe shikhubalaka likhuwa liosi ta. ²⁵ Olwa khwabeere nikhufuchirisaniye halala, khulutsi mbu nobulayi khubalobole abandu, nikhubaruma khwinywe halala nende abaherwa befwe Baranaba nende Paulo. ²⁶ Nabandu abahuliranga nibalateba obulamu bwabwe khulwa elira lioMwami wefwe Yesu Kristo. ²⁷ Kho mbabo,khubarumire Yuda nende Sila, bamuboleere amakhuwa malala kano nomunwa. ²⁸ Okhuba Roho OMulafu yachama kata nende ifwe, obulamutukhakhwo emisiko ta, okhushira amakhuwa kano konyene akakhoyeere, ²⁹ mbu, mulobe ebindu biemisango, echimalirwe ebifwanani, nende amatsayi nende ebindu, ebimichilwe, nende obuheyi, ne nimuba nimwilinda khumakhwa yako, mulaba obulayi. Mulindwe". ³⁰ Nabo olwabali nibasebulwe, nibakholomokha niboola Antiokia, ne olwa bali nibakhung'anire omukanda kwosi halala,babaheresia ibarua tsana. ³¹ Ne olunyuma lwokhusoma, bekhoya muno kobuhonia obwo. ³² Nabo Yuda nende Sila, okhuba abene bali abalakusi, bamanyia abana babo amakhuwa amanji nibabatinyisia. ³³ Ne olwa bali nibamenyereyo khushise,abana babo babasebula nende omulembe, mbu bakalushire abo abali nibabarumire. ³⁴ Habula Sila yalola mbu nobulayi okhumenya khwoyo. ³⁵ NePaulo nende Baranaba nibatong'a Antiokia, nibechesinjia nende okhwilwatsa likhuwa LioMwami halala nabandi abanji. ³⁶ Ne olunyuma lwetsinyanga tsinyinji, Paulo yaboolera Baranaba mbu, chenda khukalushe bulano khubakonye abana befwe mubuli litokho mwa khwarumbula likhuwa lioMwami, khulole shinga olwa bali". ³⁷ Naye Baranaba yali niyenya okhubukula Yohana, owalangwa mbu Mariko atsie ninaye. ³⁸ Naye Paulo shiyalola mbu nobulayi okhutsia nende omundu oyo owabamurulakhwo nibali Pamfilia, obulatsia ninabo khumilimo ta. ³⁹ Mana nikhuba namainje, okhuula olwa bahukhana, Baranaba nabukula Mariko, natsia ninaye muliaro okhuula Kipro. ⁴⁰ Naye Paulo nabukula Sila, narula, olwa abana befwe bali nibamalire okhubahaana khubukosia bwoMwami. ⁴¹ Nabirira Musiria nende Kiliki, natinyisia Ikanisa.