¹ Yaho mutsinyanga etsio, Herode Omuruchi yanyiira emikhonochie okhusandia abandi belikanisa. ² Niyera Yakobo omusiani wabwe Yohana nolukanga. ³ Ne olwa yalola shinga olwa yachamisia Abayahudi, yatsia imbeli okhumutira Petero yesi. Ne tsiali tsinyanga tsiomukate kubulamwo limera, ⁴ ne olwa yamutira yamura muboye, namuhana mumikhono chiabalindi bane, mbu bamulinde napara mbu yakhamurera imbeli wa bandu olunyuma lweiPasaka. ⁵ Kho Petero yalindwa mumboye, ne likanisa obulachonya liatsiririra mumasayo khuNyasaye. ⁶ Ne olwa Herode yali nali okhumurusia erwanyi, mushiro shienesho Petero yali nali mundoolo hakari wabalindi babiri, naboyirwe neminyololo chibili, abalindi bemiliango nibalindanga imboye. ⁷ Mana lola malaika woMwami nasinjira ahambi ninaye, obulafu nibwakha mumboye, naye namutira Petero mumbafu namubusia, naboola ari, bukha bwangu eminyororo chiayaboyerwa nichikwa okhurula khumikhono chie. ⁸ Omumalaika namubolera mbu, wibohe ebilarobio, naye nakhola ario. Namubolera mbu wifunishe ingubo unondekhwo ⁹ Narula erwanyi namulondakhwo, ne nalamanya mbu nikatoto akakholwa nende abamalaika ta, habula yapara mbu aloranga. ¹⁰ Ne olwa yabira omulindi wamberi nende wakhabiri, niboola mushiribwa shieshibia eshitsia mwitokho, nasho nishibekushira eshiene. Nibakotokha khunjira ndala, habwene yaho omumalaika namulekha ¹¹ Ne olwa Petero yalaba tsimoni,yaboola mbu bulano emanyire katoto mbu Omwami arumire omuMalaika niyambonia mumukhono kwa Herode, khandi mukosi aka abandu abayahudi bali nibambariranga. ¹² Ne olwa yali niyakhayiririsia ario, yoola munzu mwa Miriamu nyina Yohana owelira lindi likulikha mbu Mariko ewa bali nibekhung'asie nibasayaanga. ¹³ Ne olwa yakhong'onda khumuliango kweshiribwa, omukholi weshikhana welira mbu Roda niyetsa okhumwikulira. ¹⁴ ne olwayamanya mbu nomwoyo kwa Petero, obusangali bwachira nalekula omuliango ta, ne butswa yerukha tsimbiro nababolera mbu Petero asinjire mushiribwa. ¹⁵ Nibamubolera mbu olaluushe? naye naboola obutinyu mbu kali butsa kario, nibabola mbu noMumalaika we. ¹⁶ Naye Petero natsiririra okhukhong'onda, ne olwa bamwikulira nibamulola nibasangala. ¹⁷ Naye nabachingulira omukhono nababolera shinga olwa Omwami olwa yali namurusiye mumboye. Naboola mbu mubolere Yakobo amakhuwa kano, nende abana befwe bandi, mana nabarulakhwo natsia ahundi. ¹⁸ Ne olwa bwashia, khwali nende eshihenda mwoyo eshikhongo khubalindi mbu Petero akhatsiire hena? ¹⁹ Ne olwa Herode yali namukhabiire nalamunyoola ta,yanoneresia mubalindi abo, nalachirisia mbu beerwe. Omwene nakholomokha okhurula ebuYahudi natsia ekaIsaria namenyayo. ²⁰ Naye Herode yali neliruma khuba Tiro nende aba Sidoni, nabo nibamutsiira nende omwoyo mulala,nibahotseresia Blasio omukhalabani woMuruchi, nibamusaba omulembe, shichira eshialo shiabo shianyolaanga eshilibwa okhurula mushialo shiomuruchi. ²¹ Mana khunyanga indobole Herode niyefwala tsingubo tsioburuchi naboola nende abandu. ²² A bandu nibaboola khumwoyo kweikulu, nibaboola mbu, kuno omwoyo nokwo munyasaye, shikuli kwomundu tawe. ²³ Habwene yaho Malaika woMwami namukhupa shichira shiaheresia Nyasaye oluyali tawe. Nalibwa netsinyende nafwa. ²⁴ Ne likhuwa lia Nyasaye nilikhula nilimetekha. ²⁵ Ne olwa Barinaba nende Saulo bacherera okhurula Yerusalemu, olwa bali nibamalire emirimo chiabwe, nibali nende Yohana owelira likulikha mbu Mariko.