¹ Ne abarume nende abana befwe abali ebuYahudi bahulira shinga abamahanga nabo olwa bali nibanyolere likhuwa liaNyasaye. ² Ne olwa Petero yali natikulushe niyolere eYerusalemu, abo bali abeshishebo bayingana ninaye. ³ Nibaboola bari, iwe weenjira mubandu bashiri okhushebwa nolia ninabo. ⁴ Nebutswa Petero yachaka, nabamanyia amakhuwa obulayi shinga olwa kalondana nabola, ⁵ ndali nindi mwitokho lia Yafa, nisayaanga, ne olwa ndali niyenzerire ndalola libiso, mbu eshichinjiro nishiikha, shinga ishuka ingali niikha okhurula, mwikulu niitiririrwe mutsikona tsine niyula ewandali. ⁶ Ne ndumiye tsimoni tsianje okhuhenga nindola ebilonje biamakulu kane amayoni komwikulu. ⁷ Ndahulira omwoyo nikumbolera mbu, buukha Petero wire olie. ⁸ Ne ndakalusia mbu tawe, Omwami okhuba shindu shiosi shiomusiro kata shieshifwabwi shishiri okhwinjira mumunwa kwanje ta. ⁹ Ne omwoyo nikukalusia okhurula mwikulu kuri, eshia Nyasaye asiire alashilaanga mbu eshifwabwi ta. ¹⁰ Kano kekholekha khataru mana biosi nibikhweswa nibikalusibwa mwikulu. ¹¹ Ne lole abweneyayo abasatsa bataru nibenjira imberi weinzu eya khwalimwo, nibarumirwe khwisie okhurula eKaisaria. ¹² Naye Roho Omulafu niyambolera mbu enzie ninabo, obulakanakania ta, nabo abana befwe bano basasaba nikhutsia ninabo nikhwinjira munzu eyo musatsa oyo. ¹³ Naye nakhubolera shinga olwa yali nalutsi Malaika nasinjire munzuye, naboola mbu, rumana eYafa okhwenda Simioni ewe lira mbu Petero. ¹⁴ Omwenoyo alakhubolera amakhuwa kokhoyere, mbu, ohonibwe nende abeinzuyo. ¹⁵ Ne olwa ndali neshichaka okhubola, Roho Omulafu yabeshera shinga olwa yakhwishira ifwe mukhuchaka. ¹⁶ Nasi nditsulira amakhuwa koMwami, shinga olwa yabOola mbu toto mwene Yohana yabatisinjia nende amatsi, ne inywe mulabatisibwa nende Roho omulafu. ¹⁷ Kho Nyasaye olwa yabaheresia eshihanwa shilala shieneshio eshia yakhuheresia ifwe olwa khwasubira Omwami Yesu Kristo, nisie wina owakhanyalire okhuloba Nyasaye? ¹⁸ Nabo olwa bahulira amakhuwa kano boholera nibamuheresia Nyasaye oluyali, mbu khane Nyasaye yaheera abamahanga mbu banyoole obwikalukhasi bwobulamu. ¹⁹ Kho abo abasalananga buli mundu khulwa omunyakhano kwarula khuma khuwa ka Stefano bachenda okhula Foinike nende Kipiro nende Antiokia nibalabolera abandu kelikhuwa liene ta, habula abaYahudi bonyene. ²⁰ Ne baliho khubo abandi aba Kipiro nende aba Kirene, nibo ababolerakhwo kata abaYunani, olwa balinibolire Antiokia niberwatsa akaOmwami Yesu. ²¹ omukhonokwo Omwami niikuba ninabo, abanji nibasubira nibamushukhanira Omwami. ²² Amakhuwa kabo nikoola mukanisa eyali Yerusalemi, nabo nibaruma Barinaba okhurula Antiokia. ²³ Naye olwa yali niyolire nende okhulola obukosia bwa Nyasaye yasangala nabatinyisia mbu barekhwo omwoyo batinye khuMwami. ²⁴ Okhuba yali omundu omulayi niyetsulamwo Roho Omulafu nende obusubiri, abandu abanji nibametekha khuMwami. ²⁵ Mana narula natsia eTaruso okhukhaba Saulo. ²⁶ Ne olwa yali namunyolire, yamurera Antiokia, mana omwika omulamba bakhung'ananga nende ikanisa nibechesia abandu abanji. Ne ebweneyo Antiokia niyo ewa abechi baranjirira okhulangwa mbu abaKristo. ²⁷ Mutsinyanga tsienetsio, abalakusi bandi bakholomokha okhurula Yerusalemi niboola Antiokia. ²⁸ Mulala khubo welira mbu, Agabo yasinjira namanyia mubunyali bwa Roho shinga inzala ikhongo yitsa okhubaho mubialo biosi, nayo yamala niibaho munyanga tsia Klaudio. ²⁹ Ne abechi buli mundu khubunyalibwe shinga olwa bwali nibarakhwo omwoyo okhuruma ebihanwa khu bana babwe a bameyanga ebuYahudi. ³⁰ Ne bamala nibakhola bario, nibaruma abakofu mumukhonokwa Barinaba nende Saulo.