¹ Buno nibwo obuchachiro bweinjili ya Yesu Kristo, Omwana wa Nyasaye. ² Shingana kahandikwa nende abanabi,, Lola eruma murume imberi wuwo, owitsa okhukhukasiria injira. ³ Omwoyo kwa wulia oulanjisinjia mushitsiimi, Kasie omuhanda kwOmwami, kololosie injira yiiye. ⁴ Yohana yabatisia mushitsiimi, khandi nakamba obubatisi bwokhwikanira khulwa okhubeerwa tsimbi. ⁵ Abandu bebuYaudi nibamutsiira boosi, kata abokhurula Yerusalemu, nabo nababatisia boosi mumuchera kwa Yorodani, nibekaniranga tsimbi tsiabo. ⁶ Naye Yohana yali niyefwala tingubo etsia amaswa keingamia, nende omushipi kwelisero mushishienje; khandi yaliitsanga tsisiche nende obuushi bwomumutsuru; ⁷ Yakaambanga naboola, Aliyo mulala omukhongo okhuyoomba owiitsanga olunyuma lwanje, kata emikoye chiebilaro bie shekhoyere okhwikha hasi okhuchitendeiya tawe. ⁸ Toto esie emubatisiye mumatsi: habutswa naye namubatisie nende Omwoyo Omutsienukhu.. ⁹ Niketsa nikaba mbu mutsinyanga yitso, mbu Yesu yarulira eNazareti ye eGalilaya, mana nabatisibwa nende Yohana mu Yorodani. ¹⁰ Olwa yali narulanga mumatsi, yalola likulu nilikukha, naye Roho mumubiri kwelihusi namwikhakhwo. ¹¹ Omwoyo nikuulirikha okhurula mwikulu, nikuboolanga, Eyuwe niwe Omwana wanje omuheerwa, muywe enjamisibwa muno. ¹³ Mana naba ebweneyo mushitsiimi tsinyanga amakhumi kane, Shetani namuteemanga; ne yaliyo nende tsisolo naburimo; nabo abamalaika bamukhalabanira. ¹⁴ Olunyuma lwa yako, Yohana yarebwa mujela, Yesu niyetsa eGalilaya nakaambanga injili yobwami bwa Nyasaye, ¹⁵ Naboolanga mbu, Ebise bimalire okhuula, khandi obwami bwa Nyasaye buli hano: enywe mwikanire, mana musubire injili. ¹⁶ Inyanga yindi nachendanga khundulo kweinyanza yeGalilaya, yamulola Simoni nende Andrea omusiani wabo nibakwisinjia tsikhanda tsiabo munyanza: okhuba bali abalobi betsinyeni. ¹⁷ Yesu nabalaanga, nababiira, Yitse munondekhwo, nasi ndalabakhola okhuba abalobi ba abandu. ¹⁸ Mubwangu bwene yibo, nibalekha yaho tsikhanda tsiabo, mana nibamulonda ye. ¹⁹ Olwa yali niyakhasita hamberi nokhurula yaho, yalola Yakobo omwana wa Zebedayo, nende Yohana omusiani wabo, abali boosi nibali muliaro liabo nibalukhanga tsikhanda tsiabo. ²⁰ Mana nabalaanga shirunji: nabo nibalekha yaho sabwe Zebedayo muliaro nende abatiiyi bokhurungwa, nibatsia inaye. ²¹ Mana nibatsia nibenjira eKaperinaumu; khunyanga yeisabaato naye nachooma shirunji musinagogi, mana niyechesia. ²² Nibahuchisibwa nende amachesio keke: shichira yechesia shingana wulia ouli nende obunyali, tawe shingana abahandichi. ²³ Ne musinagogi yimo khwalimwo nende omusatsa owa roho omuchaafu; yamwimiriranga, naye nakhupo omwoyo obutinyu, ²⁴ Lekhane ninefu.; efwe khukhukholeere shiina, eyuwe Yesu weNasareti? Eyuwe wiitsire mbu okhusasie efwe? Esie ekhumanyire yuwe mbu oli wiina, Omutakatifu mulala wa Nyasaye ²⁵ Yesu nakalukhana mana Yesu naikondoshera roho yiyo, nachibiira, Holeera obe nomulembe kwo, mana omurulemwo, ²⁶ Olwa roho omuchaafu yamulasa haasi, niyikhupa oluhuungu niyirula niyitsia. ²⁷ Abaliho boosi nibachenya, nibarebana amarebo abene khubene, mbu, Shino ni shiina? kano namechesio kalena amacheni? Nobunyali alaka ebishieno, nabio bimuhulira. ²⁸ Mubwangu bwene yibo ifuma yiiye niyinyayira tsimbeka tsiosi etsibotokhane eGalilaya. ²⁹ Olunyuma lwokhurula musinagogi, benjira munzu mwa Simoni nende Andrea, nibali nende Yakobo nende Yohana. ³⁰ Habutswa nyinamwana mukha Simoni yali nakonere nali nende omurengo, omundu namubiira. ³¹ Mana niyetsa namutiira omukhono, namubuusia; ne mubwangu yibo omurengo nikumulekha, naye nabateenda. ³³ Nalio litookho liosi liakanira halala hamuliango. 4 Naye nahonia boosi abali nibalwala amateshere kaukhane, khandi naloonda ebishieno ebinji; naye nabikondoshera bilaboola ta, shichira biali nibimumanyire. ³⁵ Inyanga yalondakhwo mumabwibwi, nishishiri eshirima, yabuukha natsia ehale ewa abandu balali tawe, mana nasaya. ³⁶ Simoni nende balia aba yali nali yinabo bamulondakhwo. ³⁷ Olwa bali nibamunyoolere, nibamubiira, Abandu boosi bakhukhabanga. ³⁸ Yesu nababiira mbu, Chende khutsie mwitookho lilondakhwo, mbu khandi engambeyo: shino nishio eshifune eshiachira ninditsa. ³⁹ Mana nakamba mutsisinagogi tsiabo muGalilaya yoosi, nalonda ebishieno. ⁴⁰ Inyanga yindi omundu wali niyatirwa nende obuchere yamwitsira Yesu. Namusikamira mana namusaaya, Noba nochama, ukhole omulamba. ⁴¹ Yesu namulolera eshibeera, nayira omukhono kukwe namutiirakhwo, namubiira, Enjamire okhukhuhonia, nyoola okhuhona! ⁴² mubwangu yibo omundu wuyo nahona! Nalaba nobuchere khandi ta! ⁴³ Yesu namukaya nobululu olwa yali namusebulanga. ⁴⁴ Namubiira, Sholaboolera omundu yesi yesi akekholeshe tawe. Habutswa tsia wilolesie imberi Khumwisaliisi akhuyenjeresie okhumanya mbu obula obuchere. Mana ohane eshihanwa shinga olwa Musa yalaka khubalia aba Nyasaye ahoniye obuchere, shingana obuloli khubandu. ⁴⁵ Omundu wuyo yarula erwanyi, nabiira abandu abanji kalia aka Yesu yali nakholelere, okhuula mbu Yesu shiyali omulakhuule okwijira mwitookho habulafu tawe. Namala naba erwanyi ewabandu balali abanji ta, nabo abandu nibamutsiira okhurula mutsimbeka tsiosi.