¹ Khu kario, abakherwa balungifu, abasangirani bomulango kwomwikulu. Ichulisiekho omurumwa, oli omukukhani wo busubiriri bwefwe, Kiristo Yeso. ² Owali omwesikwa khu ulia owa mulobola, nga Musa yesi yali omwesikwa munyumba ya Nasaye yoosi. ³ Okhuba omuundu uno yabalwa okhoyera oluyali olungi okhukhira Musa, ngolwa omumbahi we inyumba ali nende siribwa sikhongo okhukhira inyumba yeene. ⁴ Khulwo khuba buli inyumba yumbakhungwa nomuundu, naye owombakha ebiindu bioosi ni Nasaye. ⁵ Naye Musa mu bwadieri yali omwesikwa munyumba yaye yoosi, ngomurumwa khulwa obuloli obwe biindu bilia ebiali bibolwe lunyuma. ⁶ Arali Kiristo nga Omwana omwemeresi we inyumba yoosi ya Nasaye, eyiri mbwe nefwe , nikaba khudiririra namani obusubiriri nende isangalo yelinaya liefwe okhula okhumalilikha. ⁷ Khu kario ngolwa (Omwoyo mulafu aboola, ''Inyanga ino, nobulira lidoboosi liaye, ⁸ Muromirania emioyo kieng'we mukhusinyisia, muludalo lwo khurekekhwa mulumirira. ⁹ Nga abaseng'we baandema, mu khungerasia, nibamala nibalola ebikhole biange, emiaka makhumi kane. ¹⁰ Khukario ndasinyisibwa nolwibulo olwo. Nimboola mbwe, ba koranga bario, mumioyo kiabwe khandi sibamanyire chingira chiange. ¹¹ Kho biri sa nga ndechuba mulirima liange; ''Mbwe sibakhengire mubuulukhi bwange.'' ¹² Mwekenderesie, baana befwe, arabamo mwing'we nende omwoyo kwo bumayanu kwo khurasubira, kwo khulekha Nasaye mulamu. ¹³ Ni mudinyisanie buli lwosi,nisiiri ilangwa inyanga ino; mbwe arabao owo omwoyo kunoomisibwa khubirira mububacha bweimbi. ¹⁴ Khubeera kholerwe abasangirani ba Kiristo nikhudiririra nende obudinyirifu mu khuchaka khwo busubiriri bwefwe okhuula mu bumalirikhi. ¹⁵ Khu lino, kabolwa mbwe, ''Lero luno nimubulira omulango kwaye, muromirania emioyo kieng'we, mubukhayi.'' ¹⁶ Ni baabu wina abo aba mubulira Nasaye mubukhayi bwabe? Sinabeene abo abarula Misiri nibemirirwe nende Musa? ¹⁷ Ne nikhandi nibaabu wina aba yasinyisibwa nabo emiaka makhumi kane? Si nibalia abali nibakholere obwononi, abemibiri kiabwe kiakona mulumira? ¹⁸ Nibaabu wina aba yechubira mbwe sibengira mubuulukhi bwaye, arali balia barafukirira? ¹⁹ Kho khulola mbwe sibengira mubuulukhi bwaye khulwa oburasubirira bwabe.