¹ Buli muundu osubira mbwe Yeso ni Kirisito yebulwa nende Nasaye ne buli muundu okheera, yakheera nende ula owayebulwa yeesi. ² Mulino khumanyire mbwe khwabakheera abaana ba Nasaye, nikhumukeera Nasaye, nende okhudira ebilagiro biaye. ³ Khulwo khuba khuno nikhwo okhumukheera Nasaye, mbwe khudire ebilagiro biaye; ne ebilagiro biaye khasi nibisiro. ⁴ Khulwo khuba buli sindu esiebulwa nende Nasaye sikhiranga esialo; ne khuno nikhwo okhukhira okhukhiranga esialo, obusuburi bwefwe obwo. ⁵ Okhira esialo niwina, narali ula owasubira mbwe Yeso nomwana wa Nasaye. ⁶ Uno niye owecha khu maachi nende mabaanga, Yeso Kirisito; sinimumaachi sa, arali mumaachi nende mumabaanga. Naye Roho niye ololeranga, Khulwa khuba Roho niye obwadieri. ⁷ Khulwa khuba baliwo badaru abloleranga mwikulu, Samwana, nende Likhuwa, nende Roho mulafu, ne badaru bano ni bulala. ⁸ Khandi baliwo badaru abaloleranga khusialo, Roho, nende maachi, nende mabaanga, ne badaru bano bafukirisanianga mulikhwa elala. ⁹ Nikhunyoola obuloli bwa abaandu, obuloli bwa Nasaye nobukhoongo lukali; khulwo khubeera obuloli bwa Nasaye nibwo buno, oburisia obuloli khu Mwana waye. ¹⁰ Ula osubira Omwana wa Nasaye ali nende obuloli bwo mukari mwaye. Orusubira Nasaye amukholere khuba omubacha, khulwo khuba khasi yasubira obuloli bwa Nasaye yarusiria Omwana waye. ¹¹ Ne buno nibwo obuloli, mbwe Nasaye yaruberesia obulamu bwo bumeri; ne obulamu buno buli mumwana waye. ¹² Ula oli nende omwana, ali nende obulamu obwo; naye orali nende Omwana wa Nasaye abula obulamu obwo. ¹³ Baandikire amakhuwa ako, mbwe mumanye mbwe muli nende obulamu bwo bumeri, eng'we abasubira eliira lio omwana wa Nasaye. ¹⁴ Ne ino niyo ichuoni eyakhuli ninayo khuniye, mbwe nikhusaba esindu khulondana nende okhwenya khwaye, arubuliranga. ¹⁵ Ne nikhumanyire mbwe arubuliranga, esiakhusaba siosi, khumanyire mbwe khuli nende biosi ebiakhumusaba. ¹⁶ Omuundu yeesi nabona omusiani wabwe nakhola imbi eyirali eyeliifiwa, anasaba, ne Nasaye anamuba obulamu khulwa bala abakholanga imbi eyirali eyelifwa. Iliwo imbi yelifwa. Khasi mboola mbwe anasaba khulwe yene eyo. ¹⁷ Buli liosi elirali oliobulungifu ni imbi, ne iliwo imbi eyirali eyelifwa. ¹⁸ Khumanyire mbwe buli omuundu owebulwa nende Nasaye khasi akholanga imbi, arali ula owebulwa nende Nasaye yelindaanga, ne omubi ula khasi amudirangakho. ¹⁹ Khumanyire mbwe efwe khuli aba Nasaye; ne esialo siosi siamenya mumubi ula. ²⁰ Nafwe khumanyire mbwe omwana wa Nasaye yamala khwicha, naye yaruberesia amakesi mbwe khumumanye ula owobwadieri, mukari mwo mwana waye Yeso Kirisito. Uno niye Nasaye owo bwadieri, nende obulamu bwo bumeri. ²¹ Abana badidi, mwelinde nende ebifwanani. Kabe kario.