¹ Woowe nesie! Esie ndamalire okhuba shingana lichesa liebiamo bieshuubwe, khandi shingana obwabari[grapes] bumalire okhurulumwa; shibulao eshisakanyi shiobwabari[grapes] shitoonyere shiokhulibwa tawe, kata amakhuyu akaranjirira aka omwoyo[soul] kwanje kwikombanga tawe. ² Abasubirwa bamalire okhukhamulukha okhurula khushialo; abulao omundu omukololofu kata mulala mubandu boosi. Boosi pe bakoneshera nibalinda okhuratsia eshitsayi; buli shiamulala ayiima omusiani waabo nende olukhanda. ³ Emikhono chiabo nemilayi po khulwa okhusaalisia: abaruchi basabanga amapesa, naye omuyaasi yerecheeshe khulwa eshiomufuusi, ne omundu woobunyali obunji abiiranga abandi obwikoombi bwomwoyo[soul] kuukwe. Mana boosi balosiria halala obubii. ⁴ Ne oulolekha khwo okhuba omulayi yengana oluuwa, ne naye ouli omukololofu po nomubii okhuyoomba olukaka lwa amatsooyi. Yio niyo inyanga eyaboolwa nende abalindi, inyanga yeshinyaasio shiabo. Bulano buno nibio ebise biabo biokhukoyaana. ⁵ Shiolasubira omumenyani yesi yesi tawe; ne shiolara obusubisie bwosi bwosi mumulina yesi yesi tawe. Okhurula kata khumukhasi oukonanga khushirifu shiishio oliinde obwinjiriro bwomunwa kuukwo. ⁶ Okhuba omwana omusiani shialahesia samwana oluyali tawe, naye omukhaana alachiingukha nayiinga nyinamwana, naye omukhasi womusiani nayiinga nyakhufiala nyene. Abasuku bomundu balaba abandu bo munzu yiiye omwene. ⁷ Habutswa khulwa sie mwene, ndaleyenga khuMwami. Ndalamulindirira Nyasaye wobuhonia bwanje; esie Nyasaye wanje alahulira. ⁸ Abasuku banje, shimulekhoyera muno khu sie tawe. Olunyuma nemalire okhukwa, esie ndakhabuushe. Olwa emba nindikhala mushirima, Omwami yakhabe niye obulafu bwanje. ⁹ Shichira ndononera Nyasye, esie ndalefwiira liruma lirie okhuula olwa alihulirisia omuse kwanje mana yakhalachire eshiina. Ye yakhareere mubulafu, ne nasi ndakhalole obulunjishi bubwe. ¹⁰ Ne olwa omusuku wanje yakhashilole, mana nayo yisoni yakhamufiimbe wulia owambooleranga mbu, "Omwami Nyasaye wuuwo ali heena?" Tsimoni tsianje tsiakhamulole omukhasi wuyo; naye yakhasenachirwe haasi shingana amatoyi khumuhanda. ¹¹ Ne yinyanga yokhumbakha amasiisi koko yakhetse; khunyanga yeneyo tsinzakho tsiitsio tsiakhasite ehale po. ¹² Khunyanga yeneyo abandu boobo bakhakhwitsire yuwe, okhurula Ebusiria nende mumatookho mu Emisiri, okhurula Emisiri okhuula Khumwalo, okhurula khunyanza okhuula khunyanza, okhurula khushikulu okhuula khushikulu. ¹³ Habutswa eshialo shiakhabe likuunda khulwa abandu bamenyangamwo, khulwa ebiamo bia ebikhole biaabo. ¹⁴ Yaaya abandu boobo nende olusaala luulwo, lituuli elia obulaame buubwo. Kali konyene mushitsakha, hakarikari womukunda kwoobwayiro. Lekha baaye mu Bashani nende mu Giliadi shinga tsinyanga tsia khale. ¹⁵ Shinga mutsinyanga etsia mwali nimurulanga mushialo shia Emisiri, Esie ndiitsa okhubamanyia akokhuhuchia. ¹⁶ Nako amahanga kakhalole mana nako nikafimbibwa emirwa khulwa obunyali bwaabo. Bakhare emikhono khuminwa chiabo; amarwi kaabo kakhabe obusiru. ¹⁷ Bakhakhoombe olufu shinga inzokha, shingana ebilonje bimoolanga khushialo. Bakharule mutsimbiinga tsiabo nende oburii; bakhakhwitsire yuwe nibali nende oburii, Omwami Nyasaye wefu, khandi bakhabe abarii khulwa yuwe. ¹⁸ Ni Nyasaye wuleena shingana yuwe - ouyiininjiao obubii, oubiririranga obwonooni bwa balia abatoong'a abobulaame beebe? Shiabikhanga liruma liirie inziaiyo tawe shichira ye yekhoyeranga mubusubirwa bweindakano yiiye. ¹⁹ Eyuwe nokhulolere efwe tsimbabasi khandi; eyuwe nosenachire ebionono biefu hasi webirenje biibio. Eyuwe nosukune tsimbii tsiefu tsiosi mulusiba lweinyanza. ²⁰ Eyuwe wakhahesie obulamba khu Yakobo nende obusubirwa bweindakano khu Abrahamu, shingana olwa wetubira abakuuka befu mutsinyanga tsia khale.