¹ Bulano buno wulirisie kalia aka Omwami aboola, "Buushe mana muboole akomuse kwenyu imberi webikulu; muleshe orukulu ruhulire omwoyo kwenyu. ² Wulira, enyuwe ebikulu, Omwami abasitaachire, enyuwe emise chieshalo chiyindiranga. Okhuba Omwami ali nende eshifune shiokhuyaasia abandu beebe, naye yakhayiingane mukoti nayiinga Israeli. ³ Abandu baanje, nishiina eshia Esie ndamukholeere? Esie ndabakholeere shiina shiokhubachoonyia enyuwe? Mungalusie Sie! ⁴ Shichira Esie ndamukula enyuwe okhurula mushialo shiEmisiri khandi ndamuhonokosia okhurula mushialo shiEmisiri nende okhuhonokosia inzu yiiyo okhurula mumboe. Esie ndakhurumira Musa, Aroni, nende Miriamu. ⁵ Abandu baanje, mwiitsulira eshia Balaki omuruchi wa Moabu yerecheshera, khandi shingana Balamu omwana wa Beori yamukalusia olwa mwali nimutsiitsanga okhurula Shitimu nimuchoomere Giligali, kho kabe mbu munyale okhumanya ebikhole biobulunjishi bwOmwami." ^{7 6} Nishiina eshia sie nereerere Omwami, olwa emba nindinama hasi wa Nyasaye owo mwikulu hekulu? Nemwiitsire nende eshihanwa shiokhusambwa, nende ebimosi ebia omwiika mulala? v 7 Ne Omwami alachamisibwa nende ebimeeme biamakondi yihelefu, nohomba emialo tsihelefu ekhumi echiamafura? Ne kakhoyeere mbu ehane omwana wanje omusiani khulwa ebionoono bianje, ebiamo biomubiri kwanje khulwa tsimbii tsiomwoyo kwanje? ⁸ Wumalire okhukhuboolera yuwe, omundu, akali amalayi, kalia aka Omwami yenya okhurula khu yuwe: Khola ebikhole biobulunjishi, muheere omwoyo omulayi, mana muchende nende obwitutuyi nende Nyasaye wenyu. ⁹ Omwoyo kwOmwami kukholanga lilandio mwitookho - kata bulaano buno obuchesi bwaaria eliira liirio: "Recheresia khu akeindabushi, nende khu akawulia owachirere habundu wayo. ¹⁰ Emiandu chiri mutsinzu tsia balia abali abamaayanu abalali abesiikwa tawe, nende ebichero biobubeeyi bilia ebiokusinyo. ¹¹ Kaakhoyeere mbu embalire omundu okhubula eshikha nikakhaba mbu arumushiranga tsiratili tsiobubeyi, nende emifuuko echia obusiro bwobubeyi? ¹² Ne abandu abayiinda betsulamwo induli, abamenyi bamalire okhuboola obubeyi, khandi olulimi mumunwa kwaabo nolwiikati. ¹³ Nikali kario Esie ndiitsa okhubakhola abalwale, ndalabakhupa haasi, nebakhola okhuba amakuunda khulwa tsimbii tseienyu. ¹⁴ Mulaba abokhulia ne shimwitsa okhwikura tawe; obukhaya bwenyu bulatoong'a mukari mwenyu. Mwakhabiishe ebindu bienyu ehale ne habutswa shibiakhabe mwibishiro tawe, ne bilia ebia mwakhare mwibishiro Esie ndakhabihane khulukanga. ¹⁵ Mwakharache ne habutswa shimwakhachese tawe; mwakhaseene emitsaabibu ne habutswa shimwakhebashe amafura kachio tawe; mwakhatiinye obwabari[grapes] habutswa nimulanywa idivayi tawe. ¹⁶ Enywe mwalindire amalako ka Omri, nende ebikhole biosi ebia inzu ya Ahabu. Mwachendere mumebaalo kaabo, nikali kario Esie ndiitsa okhubahaana mbu mwononibwe ne nabo abamenyi boobo okhuba eshifwanga, nawe wakhetuushe okhutsesherirwa khwa abandu banje."