¹ Habutswa kakhabe mbu mutsinyanga tsiokhumalirikha eshikulu shieinzu yOmwami shiakharalisibwe shingana eshiokhuruka ebindi. Shiakhachingulwe ikulu worukulu, mana abandu bakhashitsiire mubunji. ² Amahanga amanji kakhatsie khandi nikaboola, "Yitse, chende khutsie ikulu khushikulu shiOmwami, munzu ya Nyasaye wa Yakobo. Ye yetsa okhukhwechesia fwe tsinjira tsiitsie, ne nefu khulachenda mutsinjira tsitsie." Okhuba okhurula muSayuni amalako kakharulemwo nikatsia erwanyi, nende likhuwa liOmwami okhurula Yerusalemu. ³ Ye yakhayaasie hakarikari waabandu abanji khandi yakhakhalache obwauli khumahanga amanji akali ehale bwene. Ne nabo bakhakhupie tsinganga tsiabo okhuba tsimbako ne nako amafumo okhuba tsinjeso. Lihanga shiliakhachinguulire elindi olukanga tawe, nohomba okhwiyechesia akelihe khandi tawe. ⁴ Bukhala bwene, buli shiomundu yakhekhale haasi womutsabibu kuukwe nende haasi womukhuyu kuukwe. Shiyakhabeo omundu yesi yesi owokhubariisia tawe, okhuba omunwa kwOmwami omwene amahe kumalire okhuboola. ⁵ Okhuba abandu boosi bachendanga, buli mulala, muliira liomuyasaye waabo. Habutswa efwe khwiitsa okhucheenda muliira liOmwami Nyasaye wefu emiika nemiika. ^{8 6} "Khunyanga yeene yiyo" - kano niko aka Omwami alachirisia - "Esie ndiitsa okhukhuung'asia abalema khandi ereere halala abalobwa, balia aba Esie ndasalisiiye. ⁷ Esie nebakalukhasie abalema okhuba mbu babe balia abatoong'a, ne nabo balia aberusiribwa ehale bakhabe lihanga liaamani, ne nasi Sie, Omwami, ndiakhabaruche okhurula Khushikulu shia Sayuni, bulano buno nende inziaiyo. v 8 Ne khulwa yuwe, omunara kwokhuyenjera khwo eshiitso, akhakulu khomukhaana womuSauni - khu yuwe biakhakhwiitsire, obwami buubwo bwakhakalusibwe, mbu oburuchi bulia obwalinji obwomukhaana wa Yerusalemu. ⁹ Bulaano buno, shichira shiina okhupa omwoyo obutinyu bweene? Omuruchi shialikhwo hakari kari wenyu tawe? Nabo balia abamukamitanga bamalire okhufwa? Shino nishio eshifune eshichira obutsuune shingana obwokhulumwa khwomukhasi khubatiirire nyuwe. ¹⁰ Mube mukhutsuunwa ne mulumwe khulwa okhwiibula, omukhaana wa Sayuni, shinga omukhasi weinzibula yiluma. Okhuba bulano buno mularula mutsie erwnyi mubikuuri, mana mutsie Babiloni. Ebweneeyo mwakhahonokosibwe. Ebwene yiyo Omwami yakhabanunule okurula mumikhono chia abasuku benyu. ¹¹ Bulano buno amahanga keetsere halala okhukhuyiinga yuwe; nako kaboolanga mbu; 'Leshe ye yefwoole; leshe tsimoni tsiefu tsing'ang'aalire khu Sayuni.' ¹² Ne nabo shibamanyire amapaaro kOmwami tawe, nohomba kata obumanyirisi bwa obulosie bubwe ta, okhuba mbu ye wumalire okhubaboya mutsikhanya shingana imere yirecheekhwe okhuhuulirwa mubweeru. ¹³ Buukha mana ohuule, omukhaana womuSayuni, okhuba ndiitsa okhukhola olwiika lulwo okhuba eshibia, ne ndalakhola tsimbakayu tsiitsio okhuba omukasa. Ne nawe yuwe wakhasenachire abandu abanji khandi nawe wakhahaane ingaanga yibanyoolera mubushiamu khuMwami, nabwo obuyiinda bwabo khu Omwami weshialo shiosi."