^{3 1} Lole, mutsinyanga tsiene yitso khandi mubise biene yibo, olwene yilwo nilwa Esie ndakhakalusie abahambe ba Yuda nende Yerusalemu, ² Ndakhakhuung'asie halala amahanga kosi, mana ekakholomosie kosi mwibanda lia Yoshefati. Esie ndakhakayaasirie ebweneeyo, khulwa abandu banje nende obulaame bwanje Israeli, balia aba basalasia hakarikari womumahanga, khandi shichira bakabana eshialo shianje. v 3 Bakhupa yikha khulwa abandu banje, bahaana omusiani khulwa omutaamba, khandi nibakusia omukhaana khulwa idivai mbu kho babe abanyala okhunywa. ⁴ Bulaano buno, shichira shiina musinyishirangana sie, Tiro, Sidoni nende boosi abetsimbeka tsia Ebufilisti? Mwiitsa okhuruunga sie? Kata nimuba nimuruunga sie, Esie ndiitsa okhukhukalusiria omuruungo kukwo omwene khumurwe kuukwo omwene. ⁵ Shichira mwabukula ifetsa yanje nende itsahabu yanje, khandi nimubukula libishiro lianje lioluyali nimuyira mutsihekalu tsienyu. ⁶ Mwakusia abandu ba Yuda nende aba Yerusalemu khu aba Yunani, eshifune mbu mubarume ehale okhurula khutsitsakho tsiabo. ⁷ lola, Esie endi ahambi okhubayakula, barule habundu halia ewa yuwe wabakusia, mana babe abakhukalusiria omurungo khumurwe kuukwo omwene. ⁸ Nasi Sie ndiitsa okhukusia abana benyu abasiani nende abakhaana, mumikhono chia abandu ba Yuda. Bakhabakusie khu Abaseeba, khwihanga liehale po, okhuba Omwami niye ouboolere." ⁹ Landie kano hakariakari wamahanga: "Abene mwirecheshere lihe; buusie abasatsa baamani belihe; leshe beetse ahambi; leshe abasatsa abalulu boosi beetse yino. ¹⁰ Yaraanye tsimbako tsienyu tsibe tsingaanga nachio emiremero chienyu chibe amafumo. Leshe omutofu aboole mbu, ' Esie endi naamani.' ¹¹ Khole bwangu bwangu mana mwiitse, enywe amahanga kosi pe akali ahambi hano; mwiikhuung'asirie halala habwene yao. Omwami kholomosiayo abeliihe boobo baamani. ¹² Leshe amahanga kosi kabuushe akeene mana keetse kosi kaakanire mwibanda lia Yosefati. Okhuba ebweneeyo ndalekhala khushifumbi okhuyaasia amahanga kabotookhane. ¹³ Huutsemwo olukhaayiro, shichira lichesa liilabire mumikuunda. Yitse, museene emitsabibu, okhuba eshitiinyiro sheidivai shitsuule. Ebirabu biaabo bitumbuushira, shichira obumayanu bwaabo nobunji." ¹⁴ Khuli nende ingoyane noobuyoka, ingoyane noobuyoka Mwibanda Liobuyaasi. Shichira inyanga yOmwami yiri ahambi Mwibanda Liobuyaasi. ¹⁵ Eliuba nende omwesi bierima ti, natsio tsing'ining'ni nitsibiishira obulafu bwatsio. ¹⁶ Omwami alahoola okhurula muSayuni, khandi alachiinguula omwoyo kukwe okhurula muYerusalemu. Nalio likulu nende eshialo biakhareenje, habutswa Omwami yakhabe obwirushiro bwabandu beebe, khandi imbiinga khubandu ba Israeli. ¹⁷ "Kho mulamanya mbu Esie nesie Omwami Nyasaye wenyu owumenyanga muSayuni, eshikulu shianje eshitakatifu. Mana Yerusalemu yilaba indakatifu, mana abacheni balamanyiishe shibakhabiriremwo khandi tawe. ¹⁸ Ne kakhabe mbu inyanga yiyo niyiri ahambi mbu ebikulu biakharoonye idivayi imilamili, nakhwo khurukulu amabeere kakhakholomoshe, emialo chiosi echia Yuda chiakhakholomoshe mwo amaatse, khandi eshifututushiro shiakhetse okhurula munzu yOmwami mana kasame Libanda lia Shittimu. ¹⁹ Misiri yakhabe likuunda liononibwa, naye Edomu yakhabe eshitsiimi shiebirirwa, khulwa obubii bwakholerwa abandu ba Yuda, shichira baraatsia amatsaayi kabula eshikha mwiloba liaabo. ²¹ Esie ndalabarunjira eshikwoli shia amatsaayi kaabo mbu kalia aka Esie eshiri okhurunjira eshikwoli tawe, shichira Omwami amenyere muSayuni."