¹ Khupe olwiika lwe limiiku muSayuni, mana okhupe oluhuungu khushikulu shianje eshitakatifu! Leshe abamenyanga mushialo boosi batechere khulwa oburii bwanje, okhuba inyanga yOmwami yiitsanga; obwatooto buli mbu, yiri ahambi. ² Ne yinyanga yeshirima nende lifuumbi, inyanga yeshirima eshimali titiiti. ³ Omuliro kumulula buli eshindu shiri emberi wakwo, ne emukoongo wakwo, olumemu lusambaanga. Eshialo shiri shingana omukuunda kwa Edeni imberi wakwo, habutswa emukoongo wakwo khulio nende eshitsuru shisasiibwe. Obulamba buli, shibulao shiosi shiosi eshiakhahonokoshe. ⁴ Likoondo lia abelihe baabo liri shingana tsifarasi, berukhanga shingana aberusinjia tsifarasi. ⁵ Basiira ikulu nobuyoka shingana obwamakaari kalia khubutenje bwebikulu, shingana okhwatulukha khwolumemu lwokhumalirana lulia olumulula amakata, shingana abelihe abaamani aberecheeshere okhuupana. ⁶ Mukhubao khwabo abandu bali neindenga mana khandi obweni bwabo bukalukhaane likoondo. ⁷ Berukha shingana abaseeri baamani; batsaalaala amasisi shingana abelihe; nibanyiira amaraambusio, katsiira khulala, ne shibakoyananga tawe. ⁸ Abulao kata mulala ousindikhanga owundi tawe; bo bachendanga, buli mundu mumukhoosi kukwe, nibabira mutsinzakho tsiobulindi ne khandi abulao kata mulala oukwitsanga erwanyi wolunyaali tawe. ⁹ Berushira litookho, berushira lisiisi, nibaniina mutsiinzu, khandi nibabirira mumatiriisha shingana abeefi. ¹⁰ Eshialo shireenga imberi waabo, nalio likulu litechera, nalio eliuuba nende omwesi biirimibwe, natsio tsing'ining'ni tsiikaliirwe okhwaakha. ¹¹ Omwami achinguulira omwoyo kukwe abeliihe bebe, shichira abokhuseera bebe naabanji po; okhuba bali nende amaani, balia abakholanga amalako keke. Shichira inyanga yOmwami niyikhoongo mana eyokhuriisia. Niwiina ounyala okhuchifiira? ¹² "Kata kario bulano buno" nilwa aboola Omwami, "Mungalushire esie nende emioyo chienyu chiosi. Hoonje injala, wikhuule, nimukhuututa," ¹³ Raandule emioyo chienyu halali tsingubo tsienyu tsionyene tawe, mana mukalushire Omwami Nyasaye wenyu. Shichira ye ne wobukosia nende tsibabasi, shiali omwangu wokhusinyikha ta ne ashiraananga mubuheere oburaliru khandi yeyikaliranga okhuhana eshinyaasio eshilulu. ¹⁴ Ne wiina oumanyire? Ahundi ye yakhashiukhane mana yeyikalire, nalekha ikhabi emukongo wuwe, eshihanwa shieimere nende eshihanwa shiokhunyweba okhurula khu Omwami Nyasaye wenyu? ¹⁵ Fuura olwiika lwelimiiku muSayuni, mulanje okhuhooga inzala okhutakatifu, khandi libukano litakatifu. ¹⁶ Khuung'asia abandu; laanje libukano litakatifu. Reera halala abakofu; khuung'asia halala abana nende tsindana tsinunanga. Leshe abasaatsa beshiserero barule mubikoro biabo, khandi abeeya bosi barule mubikoro biokhusiiywa. ¹⁷ Leshse abakuhani, abakhalabani bOmwami, bekhuulire mubikoro nende khubwaali. Leshe baboole mbu, "Beera abandu bobo, Omwami, ne shiolakhola obulaame bubwo bube eshindu shikhutseshererwa tawe, mbu amahanga kabakhoobere. Shichira shiina keboole mumahanga mbu, "Nyasaye waabo ali heena? ¹⁸ Mana Omwami naba nende obusambishe bweshialo shiishie khandi naba nende eshibeera khulwa abandu beebe. ¹⁹ Omwami nakalusia abandu beebe, "Lole, Esie ndakhabarumira enywe imere, idivai imbia, nende amafura. Mwakhekusibwe ninabio, khandi shindakhabakhole okhuba okusinyo hakarikari mumahanga tawe. ²⁰ Ndalarusiao balia abaseeranga okhurula Enotsi babe ehale ninawe, ne ndalabeemirira mushialo shiahangalala khandi ne likuunda. Abeliihe baabo abeemiranga bakhatsie munyanza eyebukwe, nabo balia ababeetsanga beinyuma munyanza yomuumbo. Okhuhunya khwaabo khwakhachinguushe, khandi obubolo bwabo obubii bwakhachinguushe." Obulamba buli mbu, ye wumalere okhukhola ebindu ebikhoongo. ^{23 21} Shiolaba omurii tawe, eshialo; ba owokhwikhoya khandi otsahatsahale, okhuba Omwami alakhola ebindu ebikhoongo. ²² Shiomulaba abarii tawe, enywe tsisolo nabulimo! Shichira obulimo bwomubwaayiro bularoomba khandi, emisala chilaama ebiamo biachio, emisala chiemikhuyu nende emitsabibu chilaruungulula lichesa. v 23 Mube nende okhwikhoya, abandu bomuSayuni, mana mutsahatsaale muMwami Nyasye wenyu. Okhuba ye yetsa okhubaheresia ifula yeshubwe shingana okhubabalira obulunjishi khandi abakwisirie ifula, ifula yeshuubwe nende yeerotso shinga yalinji khale. ²⁴ Ne tsinyanyi tsiokhuhuliramwo tsakhetsulemwo ingaano, nabio ebinuu biakhatumbuushire nende idivai imbia nende amafura. ²⁵ Esie ndiitsa okhumukalusiria enyuwe emihika chiemimera echia tsisiche tsituumanga tsialiire - tsisiche tsikoongo, tsisiche tsiria etsimululaga, nende tsisiche tsioononinjia - mbu abeliihe banje bobunyali aberumire hakarikari wenyu. ²⁶ Mulalia mubuunji khandi mulekura, mana mwitsomwie eliira liOmwami Nyasaye wenyu, owukholere akokhuhuchia hakarikari wenyu, mana nasi Sie shindakhareere isoni khubandu banje khandi tawe. ²⁷ Enywe mwakhamanye mbu Esie endi hakarikari wa abaIsraeli, khandi mbu nesie owuli Omwami Nyasaye wenyu, ne shialio owunde yesi shingana Sie tawe, khandi Esie shindiakhareere isoni khubandu banje tawe. ²⁸ Olunyuma lwene kakhabe mbu Esie ndakhasundule Omwoyo kwanje khumibiri chiosi, mana abana benyu abasiani nabakhana benyu bakharoobe. Abakofu benyu beshisaatsa bakhaloore amalooro; ababuukha benyu beshisiani bakhalole amalolo. ²⁹ Khandi khubatiiyi kata abatiiyi beshikhasi, mutsinyanga yitso Esie ndakhabasuundulire Omwoyo kwanje. ³⁰ Esie ndiitsa okhukhola amakhuwa akamakana mwikulu nende kata khushialo, amatsaayi, omuliro, nende tsisiiro tsiomwosi. ³¹ Nalio eliuuba liakhakalukhane okhuba eshirima nakwo omwesi nikuba amatsaayi, inyanga ikhoongo khandi eyokhuriisia yOmwami yakhabe niyishiri okhuula. ³² Ne kakhabe mbu buli shiamulala owakhalanjirire khuliira liOmwami yakhahonibwe. Okhuba Khushikulu shia Sayuni nende muYerusalemu khwakhabeo nende abahonokokha abatoong'a, shingana olwa Omwami yaboolere, khanda hakarikari ewa abahonokokha, balia aba Omwami alanganga.