¹ Olunyuma lwa Yesu okhwilolesiria abeechibe khu Nyanza ya Tiberia, yelolesia munjira yino; ² Khaliho nende Simoni Petero nende Thomasi oulangwa mbu Mukhwana nende Nathanieli owa Cana mmu Galilaya nende abaana ba Zebedayo halala nende abeechibe bandi babiri. ³ Simoni nababoolera mbu enzitsanga okhunyena ne nabo nibamuboolera mbu khulatsia ninawe mana eshiro isho shiosi shibatiirakhwo eshindu shiosi tawe. ⁴ Mana olwa bwashia, Yesu yasinjira khundulo khweinyanza nabo abeechibe nibalamumanya ta. ⁵ Mana Yesu nabareeba bari, mulikhwo nende eshiokhlia, nabo nibamukalusia mbu tawe. ⁶ Yesu nababoolera mbu sukune olubeka lwe liaro lundi olo, mana olwa basukuna tsikhanda tsiabwe ebweneyo, shibanyala okhuyinia khulwa obunji bwe tsinyeeni. ⁷ Yohana omwechi wa Yesu yali yayanza muno naboolera Petero mbu nOmwami, ne olwa Petero yahulira ni Yesu, yamala niyeboha ingubo yiye yokhuloba chichira yali nali eshiechenyi ne naruchira mumatsi. ⁸ Mana abeechi bandi nabo nibasuta mukari halali shibatsia ehale tawe khulwa obunji bwetsinyeeni. ⁹ Ne olwa bali nibamalire okhuula khuluchinga balola omuliro kwa manda nikubwanirwe ne inyeeni nende omukate nirerwekhwo. ¹⁰ Kho Yesu nababoolera ari rerekhwo tsinyeeni tsiamutiirire, ¹¹ Mana Petero natsia nareera tsinyeeni khuluchinga okhuba tsiali shinga eshikhumi nende amakhumi karaano natsitaru; ne kata olwa tsinyinji tsinyinji tsirio, olukhanda shilwarandukhakhwo tawe. ¹² Mana Yesu nababoolera mbu mwitse bulano mulie, nebutswa abulaho owamureeba mbu niwe wina tawe shichira bamanya nOmwami. ¹³ Mana Yesu niyetsa nasinyola omukate, nabahelesia, khandi inyeni yosi nakhola ario. ¹⁴ Luno luyira khataru, Yesu niyelolesinjia khubeechibe okhurula olwa yali nalamushe okhurula mubafuu. ¹⁵ Mana olwa bali nibamalire okhulia, Yesu nalanga Petero namureeba ari, "Simoni Petero wa Yohana, wanjama okhushira bano bosi?" Petero nakalusia namuboolera mbu, "Omwami ndakhuchama okhushira bano bosi, ne namuboolera mbu linda amakondi kanje." ¹⁶ Namureeba Petero olwa khabiri mbu, "Petero, wanjama? Petero namuboolera mbu, "Omwami ndakhuchama, namuboolera mbu, lisia amakondi kanje." ¹⁷ Namureeba khandi olwa khataru mbu, "Simoni Petero wa Yona wanjama? Mana Petero nasinyikha shichira yamureeba olwakhataru mbu wanjama? ne namukalusia ari, Omwami omanyire mbu ndakhuchama, ne namuboolera mbu, linda amakondi kanje." ¹⁸ "Ekhuboolera obwatoto mbu olwa wali noshiri omubukha webohanga notsia ewa wenyere, ne olwa oliba nokofuule olikololosia emikhono ne oundi alikhuboha nakhuyira wolenyere tawe. ¹⁹ Kano yaboolanga namanyia okhufwa khukhwe khulamuheresia Nyasaye oluyali, ne olwa yali namalire okhuboola yako, yamuboolera mbu nondakhwo. ²⁰ Mana Petero nashiukhana, nalola omwechi oyo owa Yesu yachama muno nabalondangakhwo, owali khandi namuyesherekhwo khushirifu khubilibwa biokhuloba namureba mbu Omwami niwina oulakhukhoba? ²¹ Petero namulolanga nareba Yesu mbu Omwami naye uno yetsa okhukhola shiina? ²² Yesu namukalusia mbu nemba nindenya mbu amenye okhuula olwa endicherera, kakhunyasiria shiina? Eywe nondakhwo. ²³ Mana amakhuwa ako nikatswana mbu omwechi uyo shalafwa tawe, nebutswa yaboola mbu nemba nindeenya mbu ammenye okhuula olwa ndiitsa, kakhunyasiria shiina? ²⁴ Ne uno niye omwechi watsana owahandika amakhuwa kano ne khumanyire mbu oburumbushi buno nobwatoto. ²⁵ Khuli nende amakhuwa amanji aka Yesu yakhola nende okhwechesia mbu kata nikakhahandikwe eshialo shishiakhanyalire okhuchinga ebitabu biakhahandikwe tawe. Ameni.