¹ Mukhuchaaka likhuwa lialinjiho, ne likhuwa liali nende Nyasaye, ne likhuwa liali Nyasaye. ² Okhurula mukhuchaaka lialinji nende Nyasaye. ³ Okhubirira muye Nyasaye yalonga ebindu biosi ne shibulaho eshindu kata shilaalongwa okhubirira muye tawe. ⁴ Ne mwikhuwa lino bwalimwo obulamu, ne obulamu niburera obulafu mubandu. ⁵ Obulafu obwo bwakhaanga mushilima ne eshilima shishinyala okhubwikalira okhwakha tawe. ⁶ Nyasaye yaruma omundu owalangwa mbu yohana. ⁷ Yetsa okhuboolela abandu akobulafu obwo kho mbu abandu boosi bahilile oburume yibwo mana basuubile. ⁸ Yohana mwene shiali niye obulafu obwo tawe ne butswa yetsa mbu aboole khukobulafu obwo. ⁹ Obwo nibwo bwali obulafu bwatooto obwetsa mushialo nibwashila abandu boosi. ¹⁰ Yali mushialo, ne eshialo shialongwa ninaye halali abomushialo shibamumanyirisia tawe. ¹¹ Yetsa mushialoshie shiene ne habutswa abali abebe beene shibamwinjisia tawe. ¹² Ne boosi abamwinjisia nibamusuubilila, yabaheelesia obunyali bwokhuba abaana ba Nyasaye. ¹³ Abenabo shibayekhola okhuba abaana ba Nyasaye mumelo ndala yabandu bekholelangamwo okhuba abaana baband tawe. Nyasaye mwene niye Sabwe. ¹⁴ Likhuwa elo yekhola omundu ne namenya mwifwe, neefu khwalola oluyalilwe, niyetsulwemwo obukosia nende obwatoto, oluyali olwo nilwo olwa yanyoola shinga omwana omutelwa wa saamwana ouli Nyasaye. ¹⁵ Yohana yarumbula khuye naboola ari, "Uno niye owandaboolakhwo mbu yetsanga inyuma wanje nebutswa nomukhongo okhuushila shichira yaranjirira okhubaho esie neshiri okhwibulwa. ¹⁶ Okhurula mubwitsulu mwobukosiabwe, yakhulaamila tsikhabi efwe fwesi ne nukhunyoola ikhabi okhumeta khuyindi. ¹⁷ Nyasaye yahana amalako okhuburila mu Musa, nabwo obukoosia nende obwatoto nabihaana hubirira mu Yesu Kristo. ¹⁸ Abulakhwoho owalolakhwo Nyasaye ta habula omwanawe omutelwa ouli shinga Nyasaye tsana ne ali khulubafu lwa samwana niye owamufwimbule namanyikha khwifwe. ¹⁹ Abemilisi babayahudi muyerusalemu baruma balala khubasaalisi nende abalawi khu Yohana okhureeba bari, "Niwe wina?" ²⁰ Naye Yohana shiyaloba okhukalusia ta. Yeyama habulafu habulafu naboola ari, "Esie shiendi nisie Yesu Kristo tawe." ²¹ Kho nibamureeba bari, "Kho niwe wiina? Niwe Eliya noho?" nae Yohana nakalusia naboola ari, "tawe, shiendi nisie Eliya tawe," Khandi nibamureeba bari, "Oli omulakusi noho?" Naye nakalusia nababoolela ari, "Tawe." ²² Nibamureeba bari kho khuboolele mbu niwe wina shichira khukhoyile okhukalusiria abakhurumile liklusio. Omwene oboola mbu niwe wina? ²³ Naye nabakalusia ari, "Esie nisie omwoyo okwo oyo oulanjirisinjia mushitsimi mbu mukololosie injira Omwami shinga olwa kaboolwa nende omulakusi Isaya. ²⁴ Ne khubalia abali barumirwe bali abaFarisayo. ²⁵ Ne nibamureeba mbu, "Noba norali Kristo watsana ta nohomba Eliya nohomba kata omulakusi ta, kho obatisinjia abandu mbushiin?" ²⁶ Naye Yohana nabakalusia ari, "Esie embatisinjia abandu nende amatsi, ne aliho ousinjiile hakari mwinywe owamulamanyire tawe, ²⁷ Naye niye ouletsa inyuma wanje, nesie shiengwanire kata okhubolola emikoyechiebilarobie tawe." ²⁸ Amakhuwa yako kekholeshera Betsania ebukwe womwalo kwa Yorodani ewa Yohana yali nabatisinjia abandu. ²⁹ Inyanga yalondakhwo Yohana yalola Yesu niyeetsanga ewa yali ne naboola ari, "Lole ouli shinga eshimeeme shielikondi shia Nyasaye ourusiaho obwonooni ngwoyo! ³⁰ Omwenooyo niye owandaboolaakhwo olwandaboola mbu aliho owitsaangamunyuma wanje, ne nomukhongo muno okhushira esi shichira yalinjiho esi neshiri okhwbulwa." ³¹ Nasi shindali nindamumanya mbu ni wiina ta nebutswa ndetsa embabatisia namatsi mbu amashile abandu ba Isiraeli. ³² Mana Yohana narumbula akobuloli naboola ari, "Ndaluutsi Roho okhurula mwikulu niyeekhanga shinga lihusi namuyeelakhwo. ³³ Nsi nindalamanya mbu niye tawe. Nebutswa Nyasaye owaruma okhubatiisia namatsi yali niyambolela ari, "olwa wakhalole Roho niyekhananga hasi nayela khuye omwenoyo niye oubatisia nende Roho Omutakatifu. ³⁴ Esie emalile okhumulola ne emuboolela mbu niye Omwana wa Nyasaye. ³⁵ Inyanga yalondakhwo Yohana yali nasinjiile halala nende babili bokhubeechibe. ³⁶ Olwa yalola Yesu nabirangaho yaboola ari, "Lole! ouli shinga eshimeme shielikondi lia Nyasaye ngwoyo!" ³⁷ Abeechi babili yabo bamuhulila olwayaboola ne nibalonda khu Yesu. ³⁸ Yesu nashiukhana nalola nibamulondangakhwo ne nabareeba ari, "mukhabanga shiina?" Nabo nibakalusia nibamureeba bari Rabi, omenyere hena? ³⁹ Nababoolela ari, "Yitse mulole, nibatsia ninaye, nibalola ewa yali namenyile nibahoonga ninaye inyanga eyo yosina yaho tsiali hambi tsisa tsieshiteere. ⁴⁰ Mulala khu abahulila aka Yohana yaboola ne nalonda khu Yesu yali andereya owali omusiani wabwe Simoni Petero. ⁴¹ Yatsia bwangu nanyoola omusiani wabwe oulangwa mbu Simoni ne namuoolela ari, Khunyoolile Masihi. ⁴² Mana narera Simoni khu Yesu. Yesu nammuhenga ne naboola ari, niwe Simoni omwana wa Yohana nebutswa bulano olalangwa mbu, 'Kefa' (nilio Petero Mulugiriki) eshisina mbu olwanda. ⁴³ Inyanga yalondakhwo eGalilaya, kho namunyoola Filipo ne namuboolela ari nondakhwo. ⁴⁴ Filipo oyo yarulanga mwitookho lia Bethsaida ewa Andereya nende Simoni bali nibamenya. ⁴⁵ Filipo naye natsia nanyoola Nathanieli namureeba ari khwamunyoolile omwenoyo owa Musa yahandikakhwo mushitabu shiamalako khandi owabalakusi bahandikakhwo amakhuwake. Niye Yesu Omwana ya Yusufu okhurula eNazareti. ⁴⁶ Naye Nathanieli namureeba ari, shikhwoyo shiosi shiosi eshiakharula eNazareti? Naye Filipo namukalusia naboola ari, "Yitsa olole." ⁴⁷ Ne olwa Yesu yalola Nathanieli niyetsanga yaboola khuye ari, Omusiraeli watoto ngwoyo, shialikhwomwo obubatsa bwosi bwosi tawe! ⁴⁸ Ntsanieli namureeba ari wamanya esie orie? Naye Yesu namukalusia naboola ari ekhuluutsi niwikhaale hasi womukhuyu Filipo nashili okhukhulanga. ⁴⁹ Mana Nathanieli namukalusia naboola ari, "Omwechesia toto oli omwa wa Nyasaye? Niwe Omuruchi wa Isiraeli. ⁵⁰ Yesu naboola ari, Esuubile shichira mbu ekhubolela mbu ekhuluutsi noli hasi womukhuyu. Witsa okhulodakhwo amakhongo akashirakhwo yalo. Mana nababoolela ari, "emuboolela toto mbu namulole likulu nilikuushe ne abamalaika ba Nyasaye nibatikulukha nebde okhwishila khu mwana wOmundu.