¹ Nikali kario mure elubeka obumayanu bwosi, obubeyi bwosi, obwikaati, imbalikha nende obubooli obubi bwosi, ² Shingana abana abatoro bebulwe, mwikombe amabeere amayu akelikhuwa, mbu mukhulire: ³ Nikali mbu enywe mwakonyere mbu Omwami no wobukosia. ⁴ Mumwitsire ye, ouli lichina limenyanga, elialobwa nabandu, habutswa niliaulwa nende Nyasaye, okhuba eliobukusi, ⁵ Nenyu mwesi, shinga amachina amalamu, mumbakhanga inzu yeshiroho, obukuhani obutakatifu, okhuhana emisango chieshiroho, echiyamwa khu Nyasaye okhubirira mu Yesu Kristo. ⁶ Kata kario kali mumahandiko mbu, Lola, era muSauyni lichina liomukoona, eliaulwa, eliobukusi: mana naye oulamusubira shalanyoola okhufwimbibwa omurwe tawe. ⁷ Nikali kario enywe balia abamusubira ye nowobukusi: habutswa khubalia abali abakhayi, lichina liria elia abombashi baloba, eliene yilio likholerwe liomukoona, ⁸ Lichina liokwisichira khwo, khandi eliokhukwisia, kata yabo balia abesichirala khwikhuwa, nibali abakhayi: endio nilwa baulirwa okhuba. ⁹ Habutswa enywe muli oluyia olwaule, oluyia olweshikuhani, lihanga litakatifu, abandu bamakana; mbu mube mulolesia ifuma yiye wulia owabalanga enywe okhurula mushirima okhwitsa mubulafu bubwe obwokhuhuchia; ¹⁰ Balia mutsinyanga tsiabira shimwali abandu tawe, habutswa bulano buno muli abandu ba Nyasaye: mwali nimushiri okhunyoola tsimbabasi, habutswa bulano mwanyoola tsimbabasi. ¹¹ Abaheerwa banje, esie ebasaaya shinga abacheni khandi ababiri, mulekhane nende obwikoombi bwomubiri, obukhupananga nende omwoyo; ¹² Nimubolanga obwatoto hakari wenyu nende Abamahanga: mbu, kata olwa bamuboola shinga abakholi betsimbi, mbu okhubirira mubikhole bienyu ebilayi, ebia betsa okhulola, bamuheresie Nyasaye oluyali inyanga yilia yalibachendera. ¹³ Mwitutuyie abene khu buli oburuchi bwa abandu khulwa Omwami: kata nikaba neliokhurula khumwami, shinga omukhongo mwene; ¹⁴ Nohomba okhurula khu aba Kafuna, shingana balia abarumirwe ninaye khulwa eshinyaasio khubalia abakholi bobubi, ne khulwa obwitsomi khu balia abakhola amalayi. ¹⁵ Okhuba lino nilio elienya lia Nyasaye, mbu mukhukhola amalayi muholeresie eminwa chia abandu abasiru: ¹⁶ Shinga abalakhule, nimulekhonyera obulakhule bwenyu shingana ingubo yokhufiimba obubii tawe, habutswa shinga abarumushi ba Nyasaye. ¹⁷ Heresia abandu boosi oluyali, muheere obuherwa. Mumurie Nyasaye. Muhelesie abaami oluyali. ¹⁸ Abatiiyi, mwitutuyirie abaami benyu noburii bwosi; khubalia abalai na abaholo bonyene tawe, kata khuyabo abalulu. ¹⁹ Okhuba nelikhoyere okhupaarwa khwo nikakhaba, mbu omundu wuli nobumanyirisi bwa Nyasaye, yefiira eshibeera olwa nayakhana halali obubii tawe. ²⁰ Okhuba noluyali shiina, nikakhaba, olwa oba nosandibwa khulwa obubii bwokholere, sholabukula niwifiira? Habutswa nikakhaba, olwa okhola amalayi, mana asandibwe khulwako, eyuwe wifiire kaala, lino nelikhoyere oluyali nobwitsomi khu Nyasaye. ²¹ Ne nimukano niko khwalanjirwamo: shichira Kristo khandi yasanda khulwa fwe, nakhuleshera eshilolero, mbu khulonde amakulu keke. ²² Wulia oulakhola imbii yosi yosi ta, kata libii shilanyolekha mumunwa kukwe ta: ²³ Wulia, olwa yanyekwa, ye shiyanyeka khandi ta; olwa yasanda, ye shiyariisia ta; habutswa yeyinia omwene khu wulia ouyasinjia mubulunjishi. ²⁴ Ouli ye mwene yetuukha ebionono biefu mumubiri kukwe khumusala, mbu efwe, abali nibafwa mutsimbii, khube abamenyera mubulunjishi: khulwa amakhupache keke efwe khwamala okhuhona. ²⁵ Okhuba enywe mwali shinga amakondi akali nikakoranga, ne bulano mwakalusibwa khu ulia Omwayi khandi omusinjiriri wemioyo chienyu.