¹ Petero, omurume wa Yesu Kristo, khubaulwa bene, mutsimbeka tsiosi, ePonto, eGalatia, eKappadokia, ebuAsia, nende eBethynia, ² obumanyirisi bweimberi bwa Nyasaye ouli Papa, okhubirira mukhutsienulwa khwa Roho, okhwitutia nende okhutsushirirwa khwa amatsaayi ka Yesu Kristo: obukosia bube khwinywe, nakwo omulembe, kube nikumetekha. ³ Kabe mbu Nyasaye mana Samwana Yesu Kristo Omwami wefu yetsomibwe, eshiri okhulondokhana nende bwetsimbabasi tsitsie tsinyinji bwebula fwe mubunayi buli nobulamu khulwa okhusimukukha khwa Yesu Kristo okhurula mubafu, ⁴ khubulaame obulasasikha ta, khandi obulamaliyibwa ta, khandi obulawetseshera tawe, bwabiikhwa mwikulu khulwa nywe, ⁵ Ababikhwa mumaani aka Nyasaye okhubirira mubusubiri obureranga obuhonia obwirecheshe okhubuulwa ebise biokumalirikha. ⁶ Mubwene yimo nimwo enywe mwikhoya okhushira, kata nikali neshise butswa, nikaba mbu kenyekha; ni muli abasitoherwa okhubirira mumateemo amanji: ⁷ Mbu akateema obusubiri bwenyu, obuli obwobukusi obukhongo okhuyoomba itsahabu eyisasikhanga, kata kali yichererungwa mumuliro; munyoleshe abakhoyere obwitsomi, oluyali nende obukhongo nobulayi bwa Yesu Kristo: ⁸ Owa mushiri okhulola khwo ta, nenyu mwamuheera: muye, kata Kali shimumulolanga bulano tawe, mwamusubira, nenyu mwikhoya nomwikhoyo kulanyala okhuboolwa tawe nimwitsuulemwo oluyali: ⁹ Nimunyoolanga khubumalirishi bwobusubiri bwenyu, mbu obuhonia bwe mioyo chienyu. ¹⁰ Okhulondokhana nende obuhonia buno bareberesia nibakhaaba neshinani, abalakula akobukosia mbu kahabetsere nywe. ¹¹ Abanabii bareberesia nibeenya okhumanya mbu nebise biambia shiina ebia Roho wa Kristo owili mubo yamanyisia, olwa yarusia obuloli olwamberi amanyakhano ka Kristo, nende oluyali olukhoyere okhulondakhwo. ¹² Ni mubo omwa karebwa habulafu, mbu kalaba mubo bonyene tawe, habutswa ni khulwa efwe abakholerwa ebindu bino, ebia muboolerungwa bulano nende balia abamala okhubakambira injili nende Roho Omutsienukhu owarumwa hasi okhurula mwikulu; ebindu ebia malaika bekoombanga babilole. ¹³ Kho mukaasie amapaaro kenyu, mube meso, nende obunayi bwobumalirishi bwobukosia obwa muli okhurererwa mukhufunulwa khwa Yesu Kristo; Nimuli shinga abana abahuliri, shimulechesia enywe beene mumera yobwikombi bwa khale mubulamanya bwenyu tawe: ¹⁵ Habutswa shinga owabalanga ali omutakatifu, mwesi mube abatakatifu mumera yosi yobubooli; ¹⁶ Okhuba kahandikwa mbu, Mube abatakatifu: okhuba esie endi omutakatifu. ¹⁷ Khandi nikakhaba mbu mulalanga khu Papa, oulahesinjia abandu oluyali ta ayasinjia abandu boosi okhulondokhana nende emirimo chiabo, murumushire ebise bienyu biokhumenya hano shingana abacheni noburii: ¹⁸ Shinga olwa mumanyire mbu shimwanunulwa nende ebindu bilia ebisasikhanga tawe, shingana ifeetsa nende itsahabu, okhurulana nobubooli bwenyu bwabutswa obwa mwahebwa okhurula khu ba senywe; ¹⁹ Habutswa nende amatsaayi kobukusi aka Kristo, shingana akelikondi elibula eshikha kata eshipala shiosi: ²⁰ Wulia owali niyamanyikha khale omuse kweshialo nikushiri okhubao, habutswa yalolesibwe mutsinyanga tsiobumalirishi tsino khulwa nywe, ²¹ Owa okhubirira muye enywe musubira muNyasaye, owamubuusia okhurula mubafu, mana namuhesia oluyali; mbu obusubiri bwenywe nobunayi bube mu Nyasaye. ²² Nimulolanga mbu mwamala okhukhola emioyo chienyu okhuba emilafu mukhuhulira obwatoto okhubirira muroho nobuheeri bwa abaheerwa obulawetseshera ta, mulole mbu muheerana abeene khubene ne mioyo emieherereshe neshinani. ²³ Shimwebulwa olwakhabiri nende yimwo yisasikhanga tawe, habutswa ni yimwo yilia eyilasasikha tawe, ne likhuwa lia Nyasaye, eliri mwoyo, khandi libetsangao tsinyanga tsiosi. ²⁴ Okhuba emibiri chioosi chingana obulimo, kata oluyali lwomundu lwingana eshimuli shiobulimo. Obulimo bunialanga nashio eshimuli shiamulukha nishikwa: ²⁵ Habutswa likhuwa liOmwami limenyanga tsinyanga tsiosi. Khandi lino nilio likhuwa elia injili eya mwakambirwa.