¹ Ne muchinyaanga echio ngolwa obukhumi obwa abeeka bwemeeda, khwabao okhubuluula okhwa abagerasi akulu wa abaebrania, okhubeera abakhasi abalekhwa babwe bebirirwa mumakhuwa aka buli nyanga. ² Mani balia ekhumi na babiri nibalaanga omukanda kwa abeeka, nibaboola bari, khasi bikhoyera efwe okhulekha elikhuwa elia Nasaye, mani khukhalabanire echimesa ³ Arali, abakherwa, mulingeere eng'we akari weng'we abaandu abesikwa abechusiibwe Rokho Omutakatifu nende amakesi, abo khunyale obalobola khulwa emirimo kino. ⁴ Nafwe khunerusia okhuchiririra khulwa amasayo, nende oburumikhi obwa elikhuwa. ⁵ Amakhuwa ako nikafukirirwa nende omukaanda kwoosi; nibamulobola Stefwano, omuundu owechulamo obusubiri nende Rokho Omutakatifu, nende Filipo, nende Porokoro, nende Nikanori; nende Timoni, nende Parimena, nende Nikolao omulokole wa Antokia; ⁶ Nibabemekha imberi wa Abarumwa ,ne nibamalire okhusaba nibabarakho amakhono kabwe. ⁷ Ne elikuwa elia Nasaye nilichiririra okhulandaala, ne obuungi obwa abeeka nibwemeeda lukali mu Yerusalemu ne omukaanda okwa bakukhani ni kuba omurekerefu khubusubiri. ⁸ Naye Stefwano, niyechulemo obusubiri nende obunyaala, nakhoola ebiamangalimwa nende ebiamakana akari wa baandu. ⁹ Nibakingukha abaandi khubasinagogi abalangwa mbwe Abasinagogi abalekhuule nende Abakereno, nende Abalekisanda, nende balia aba Silisia nende aba Asia, nibaingana nende Stefano. ¹⁰ Ne khaba khasi banyala okhukhaya amakesi nende rokho owa yekhonyera okhulomaloma. ¹¹ Manu nibabachunjubania abaandu, ababoola mbwe khwamubulira nalomaloma amakhuwa amabi khu Musa nende khu Nasaye. ¹² Nibabachuuba abaandu, nende abakhuluundu, nende abandiiki, nibamwichira, nibamudiira, nibamurera mulubarasa. ¹³ Nibamurakho obuloli obwo bubacha, obuboola mbwe, omuundu uno khasi achweya okhulomaloma amakhuwa akokhunyeka abuundu andakatifu ano, nende amalako; ¹⁴ Okhubeera khumubulira naboola mbwe, Yeso uno owa Nasareti anasasia abaandu ano khandi anakalukhania emilukha ekia Musa yaruberesia. ¹⁵ Ne balia boosi abali nibekhaale mulubarasa, nibamulingera nibamukhakasisiekho echimoni, nibaloola,obweni bwaye nibuli ngobwa Malaika.