¹ Bulanu nga ifukulu eyo yabwa, Paulo yalanga abeka nabadinyia emioyo, namala nabwao achia Makedonia. ² Kori yamala okhukenda muchimbeka echio chioosi, nende okhubadinyia mioyo mumakhuwa mangi, yachia mu Buyunani. ³ Ebwene eyo yamenyayo emiosi kidaru. Nabo Abayaudi bali nibamukhobere nibamulindire, nga olwa yali nadakha okhuchia nende imeli Shamu, bulanu yakhengao khukalukha okhubirira Makedonia. ⁴ Abaandu bano bachia ninaye,mu Asia Sapatro mwana wa Piro owa bereya ne aba Tesolonike, Aristariko; nende Sakundu, Gayo wa Dabi nende Timoteo yesi, Tikiko nende Trofino aba Asia . ⁵ Abaandu bano bachia imberi wefwe manu nibarulindira Trao ⁶ Esidialo sia chinyanga chia migaati kibulakho limera nisiakhabwa, khwachaka olukendo okhubirira mumachi nikhurula Filipi nikhuchia owabali Trao muchinyanga chirano; nikhumala nabo ao chinyanga saba. ⁷ Khu inyanga ya mberi ya idominika, kori abeka becha alala okhulia omugaati, Paulo yabayaalira niyerekekhe okhubwao inyanga yalondakho, manu yachiririra okhuyaala okhuula akari wa esiro. ⁸ Ne musigoro sia akulu khwali nende matara mangi, omwa abandu bali, bakhung'anire alala. ⁹ Omuraaga mulala owalangwa mbwe Eutiko, yali neyekhale khulidirisa yadiirwa nende chidoolo chinyingi, bulanu nga Paulo yachiririra okhuyaala yebira muchidoolo lukali, manu nakwa asi khurula akulu khu gorofa yakhadaru, nibamukinga ao namalire okhufwa. ¹⁰ Paulo yekha asi, namukhwakho,namafumalira naboola ari, murarera indobooyo khaba, khubera asiri ali nende obulamu bwaye. ¹¹ Yamala nanina akulu khandi nafunaka mugaati khandi nalia , nachiririra okhulomaloma nabo khulwa ebikha birambi, nga bwola mumabwibwi, namala na abwao. ¹² Bamala bamurera omuraaga oyo nali omulamu, manu nibadinyisibwa lukali. ¹³ Khwamala khwarangirira khuchia mu imeli nikhudiira olukendo khuchia Aso, nikhuli nende lichomo mbwe eyo niye owa khwarekekha Paulo; khubera niye owali naloboole nibimukheresie khuchiayo, nakenda nende makulu. ¹⁴ Nga olwayarubukana Aso, nikhumura mumeli, manu nikhumala nikhuula Mitilene. ¹⁵ Manu khwachaaka lukendo khurula eyo, inyanga ilondakho khwola Samo, nikhwikhala Trogilio inyanga yalondakho khwola Mitelo. ¹⁶ khubera Paulo yali nende lichoomo lio khubira Efeso nende imeli, mbwe arecha yakhinda Asia; khubera yakholanga lwangu, mbwe nanyalirwa abe Yerusalemu inyanga ya Pendekosti. ¹⁷ Nikharula Miteto Paulo yaruma abandu khuchia Efeso, nibalanga abakofu belikanisa. ¹⁸ Ne nga olwa becha owa Paulo yali yababolera, mumanyire, khurula inyanga yamberi yandechera mu Asia, nga olwandakhaba nang'we mubikha biosi. ¹⁹ Nikholeranga omwami mubweocherefu bwoosi,nende mumasika mangi, nende mukhutemwa, ebianyola khubirira mukhukhobwa nende Bayaudi. ²⁰ Khasi ndakisakho sindu siosi siosi esiali esia inganga khweng'we, arali ndabayalira khandi ndabekesia mubwakhakhu, khandi khurula khunyumba khuchia khu yindi. ²¹ Nindusia obuloli khuBayaudi nende Bayunani boosi, okhwekanira khu Nasaye, nende busubiri khu Omwami Yeso Kirisito. ²² Bulanu, lingala mbano njia ninyimirirwe nende rokho mu Yerusalemu, ningorerwe amakhuwa kachia okhundekholehakho eyo. ²³ Arali rokho mutakatifu arusianga buloli mu buli lidokho, ebiboye nende isando binindire eyo. ²⁴ Kata kario siumao khu bindu ebio bioosi esisiindusia, kata simbalanga obulamu bwange khuba esindu sia obukusi mbwe nyole okhumala lukendo lwange nende obusangafu, nende obukholi, obwandanyola khu omwami Yeso, mbwe nyole okhulolera ifanjili ya obukoosia bwa Nasaye . ²⁵ Bulanu lola manyire eng'we mwesi, abandechera nibayaalira obwami bwa Nasaye, khasi muchia okhulolakho obweni bwange khandi. ²⁶ Bulanu mbarusiria obuloli mbwe kaumao amabanga ka omundu yesi yesi akulu wange. ²⁷ Khubera khasi ndakhayakho okhubaboolera amachoomo ka Nasaye koosi. ²⁸ Bulanu mwekenderesia eng'we bene, nende omukanda kwoosi, ebia rokho mutakatifu yabakhola okhuba abaayi, mbwe mulisie likanisa lia Nasaye, elia yakula nende amabanga kaye omwene. ²⁹ Khubera manyire kano, mbwe nindakhamala khurula Amabwe kelifwa kakhabengiremo, manu khasi kakhalolere esisa eliichio. ³⁰ kata mu eng'we abene bakharulemo abaandu abakhabole amakhuwa kobukori, bakhabakhwese abeka babaloonde. ³¹ Bulanu mube meso, khandi mwichulisie, mbwe mubweyango bwemiaka kidaru mukhulira amasika khasi ndakhayakho okhubalabula buli sia mulala esiro nende sidere. ³² Bulanu , abakheerwa mbara mumakhono ka Nasaye, nende mulikhuwa lia obukoosia bwaye,eliri nende obunyala bwa okhubombakha, nende okhubaberesia obulaame akari wa balia abalabisibwa. ³³ Khasi ndekombakho echisende, kose idakhabu kose ingubo eyomundu yesi yesi . ³⁴ Eng'we mumanyire bene mbwe amakhono kange kano niko kakhakholeranga amenya kange, mwene nende bala boosi abali nange. ³⁵ Esia ndabekesia mbwe mumakhuwa koosi mukhoyere okhukhola emirimo munyole` okhukhoonya abadekhere, nende okhwichulisia amakhuwa ka omwami Yeso, kori olwayaboola ari, birimo chikhabi mubungi mukhuberesia okhukhira okhubukula. ³⁶ Manu nga yamala khulomaloma, yasigama asi nalaama ninabo boosi. ³⁷ Bamala nibalira muno, nibadira likosi lia Paulo nibamuchunjuna. ³⁸ Nibabeerera muno khulwa amakhuwa kala aka yali nalomalome, mbwe khandi khasi bachia okhulolakho obweni bwaye khaba. Bamala nibachia ninaye owa imeli yali.