¹ Bulanu mukanisa lia antokia mwalimo nende abanabii bandi nende abasomesia; kori Baranaba nende Simoni owalangwanga khandi mbwe Niger, nende Lukio Mkerene nende Manaeni owakhusibwa nende Herodi, nende Sauli. ² Ngo lwa bali nibalama omwami, nende okhusiiba, omwoyo omutakatifu kwaboola, mukabule Baranaba nende Sauli khulwange khubera emirimo kia balangire. ³ Nga bali nibakhasiiba nende okhulama, nibamala nibabarakho amakhono kabwe, nibabaruma. ⁴ Bulanu nga barumwa nende omwoyo mutakatifu, barulao nibachia Selukia, ne khurula ao nibadira olukendo khubiririra munyanja niboola Kipro ⁵ Bulanu nga bali Salamis bayaala likhuwa lia Nasaye mumasinagogi kobuyaudi, bali nende Yokhana muburumikhi bwabwe. ⁶ Nga olwabamala khubira mukari mwe sisinga khula Pata, banyola omundu undi mbwe Bari-yeso. ⁷ Yali nende omulondereri wo muruki we sialo esie elira liaye mbwe Serijio Paulo, omundu mukesi yalanga Barinaba nende Saulo, yadakha okhubulira likhuwa lia Nasaye. ⁸ Ne elima omulakusi(khubera elira liaye liemerera lirio) yayingana nabo, nadakhanga omulondereri wa omuruki alekhe obusubiri. ⁹ Lunyuma Sauli , olangwa khandi mbwe Paulo, nga yali niyechusibwe omwoyo mutakatifu yamulingala nende bululu. ¹⁰ Manu naboola, ewe wechulamo ikhinda nende chimbi chioosi, omwana wa sietani, omusuku wa obukololofu bwoosi khasi ochia khulekha khunyasia chingira chia omwami echiakololokha? ¹¹ Bulanu lola, omukhono kwa Nasaye kuli akulu wao, bulanu mochia khuba muofu, khasi ochia khulola eliuba khulwa sikha nabulebe. Ne ao nende ao linang'oong'o nende sirima biacha khumoni chiaye: yamala nachaaka okhukonya nabodokhana nakonya omundu onyala okhumudira omukhono nakenda. ¹² Lunyuma omulondereri wa omuruki olwa yalola akekholekha, yasubira naukisibwa nende amekesio aka Omwami. ¹³ Lunyuma Paulo nende abasie bachaka olukendo okhurula pafosa, bola Periga mu Pamufilia: Naye Yokhana olwayabalekha nakalukha Yerusalemu. ¹⁴ Arali barula Periga beecha Antiokia mu Pisidia nibamala nibachia mu isinagogi inyanga ya isabato, nibekhala asi. ¹⁵ Nabo nibakhamala okhusoma amalako ne abanabii abaruki ba isinagogi babalanga, nibaboola, eng'we abandu khandi bakherwa,nikali mbwe muli nende elikhuwa lia khudinyisia bandu, muboole. ¹⁶ Lunyuma Paulo yasingira, naye yakingula mukhono kwaye yaboola abandu ba Isiraili, nende eng'we abaria Nasaye, mundekeresie. ¹⁷ Nasaye wa bandu bano ba Isiriali yalobola basefwe, namala nabakingula abandu bali bamenya kori abakeni musialo sia Misiri, naye nende omukhono kwaye okwa maani yabarusia erwanyi. ¹⁸ Ne khulwa emiaka makhumi kane yabe sirimisiria ebima biabwe mulumira. ¹⁹ Naye nga yamala okhusasia ebialo saba muliloba lia Kanaani, yakabira liloba liabwe mukuura. ²⁰ Khurula ao, yecha yababeresia abakhalaki mubikha bia miaka echimia chine nende amakhumi karano, khula nga omunabii Samueli yeecha. ²¹ Lunyuma beecha badakha omuruki: naye Nasaye nababa Sauli omwana wa kishi, omuundu woluyia lwa Benjamimni, khulwa ebikha bia emiaka makhumi kane. ²² Ne nga yamumalayo yabakingulira Daudi mbwe abe omuruki wabwe: owayarusiria obuloli bwaye, naboola ari, malire okhunyola Daudi omwana wa Yese, omundu okheresia omwoyo kwange, ochia khusirisia elienya liange. ²³ Okhurula khulwibulo lwa omundu uno, Nasaye amalire khurulana nende elakano liaye okinguula omuwonia khu Isiraili oli Yeso. ²⁴ Nga Yokhana yayaala imberi nasiri okhwicha obubatisi bwa okhwekanira khu baandu boosi aba Isiraili. ²⁵ Naye nga Yokhana yali namala lukendo lwaye, yareba, eng'we mupaara mbwe esie ndi wiina? sindi niye arali mulole aliwo owicha inyuma wange, owandaranyala okhubolola chisia chia bilaro biaye. ²⁶ Abandu nende abakherwa, abaana ba olwibulo lwa Iburaimu, yesi yesi khu eng'we owamuria Nasaye khu niye elikhuwa lia obulokole buno lirumirwe. ²⁷ Khubera balia abamenya Yerusalemu nende abaruki babwe, khubera khasi bamumanya, nende kata chidoboosi chia banabii echisomwanga buli inyanga ya isabato, bamala khusirisia mukhumukhalakira. ²⁸ Kata kario sibamunyolamo esikera bamwire, bachia imberi khumusaba Pilato mbwe afwe. ²⁹ Nibakhamala okhusirisia koosi akali kandikwa khulondana ninanye,bamwakula khurula khu musalaba, nibamura mung'ani . ³⁰ Arali Nasaye yamubusia khurula mubafu. ³¹ Yalolekhana chinyanga chinyingi nende balia abari ninaye okhurula Galilaya okhula Yerusalemu, abali bwe nibo bulanu abaloli baye imberi wa abanadu. ³² Bulanu khubayaalira ifanjili eya elilakano lia basafwe baberesibwa. ³³ Nasaye yoseresia lilakano elio khubaana befwe, khubirira mu khubusibwe khwa Yeso mubafu, nga olwakandikwa mu sabuli ya khabiri, mbwe, ewe newe omwana wange esie inyanga yino khwibuule. ³⁴ Ne khurulana nende ako yamubusia khurula mubafu, mbwe arunyala okhukalukhira isasia, nga olwa ya boola ndababeresia eng'we amakhuwa kange aka Daudi yali yasubisibwa ³⁵ Yaboola khandi musabuli yindi mbwe, khasi ochia okhulekha omuloboole wao okhubona isasia. ³⁶ Nga Daudi , olwa yamala okhurumikhira olwibulo lwaye mulienya lia Nasaye yeyalisia nende basimwana nalola isasia. ³⁷ Arali ula owa Nasaye yabusia khandi, siyalola isasia. ³⁸ Manu kamanyikhana khu eng'we bulanu abaandu nende abakherwa khubirira mumundu uno muli khuyaalirwa okhulekherwa chimbi. ³⁹ Mbwe khandi muniye balia abamusubira bakholwa khuba abakololofu khurula mu bindu bioosi mbwe malako ka Musa karanyola obakhola abakololofu. ⁴⁰ Bulanu mumanye mbwe, karabechakho, kalia, akaboolwa nende abanabii. ⁴¹ Mulingale, abalekeresianga muukisibwe musasibwe, khubeera ndi khukhola emirimo munyanga cheng'we emirimo kia muraakhafukirira, kata omuundu nabayaalira . ⁴² Nga olwa Bayaudi barula musinagogi, abanasialo basaba mbwe bayaalirwe amakhuwa kano isabato yilondakho. ⁴³ Bulanu nga olwa olukhung'ano lwabwa, Abayaudi bangi nende abalokole ba idini balonda Paulo nende Baranaba; owa, nalomalomanga nabo, yabekweda okhuchiririra mu bukosia bwa Nasaye. ⁴⁴ Ne inyanga ya isabato yalondakho ambi wa lidokho lioosi liecha khubulira imboosi ya Nasaye. ⁴⁵ Ne nga Abayaudi balona omukanda mukhongo bengirwa nende ikhinda nibaingana khulondana nende amakhuwa kalia aka Paulo yali ayaalire ⁴⁶ Lunyuma Paulo nende Baranaba bayaala nende ichwoni, nibaboola, mbwe elikhuwa lia Nasaye liyaalirwe eng'we mberi: arali nga mulikhayire, nende khwekhalakira mbwe khasi mukhoyera okhunyola obulamu bwa obumeri, obulan khuchira banasialo. ⁴⁷ Khubera niye owa Nasaye arulakirisia, naboola, mbwe khurereo khuba obulafu bwa banasialo, onyole okhuba obulokole khula esiakamo sia esialo. ⁴⁸ Nga Banasialo babulira kano , bali basangafu , maani nibaberesia luyali elikhuwa lia Omwami, manu abangi bala abaloboolerwa obulamu bwa obumeri basubira. ⁴⁹ Manu likhuwa lia omwami lialandasibwa musialo esio siosi. ⁵⁰ Arali Bayaudi bachunjubania abaandu bo luyali abesikhasi, nende abakhongo ba lidookho nibamala nibarera okhusandia Paulo nende Baranaba, nibaberusia khurula khundulo wa inyanja. ⁵¹ Nabo bakhuya asi makulu nibasisimula olufu mukhubachuba, nibachia Ikonia. ⁵² Nabo abeka bechusibwamo busangafu, nende omwoyo mutakatifu.