¹ Abakheerwa, bulano ino niibarwa yakhabiri khubaandikira, ne muchiombi mbuusia emioyo kieng'we ekiobwadieri mungira yokhwichulira: ² mbwe mube abokhupaara amakhuwa akalomalomwa mberi nende abanabii batakatifu, nende esilagiro siefwe abarume bo Mwami nende Omuonia: ³ Mumanye kano mberi, mbwe muchinyaanga chiobumalirikhi bachia khwicha abaandu bokhulekeresia abakenderanga mubwekoombi bwabwe, ⁴ nibereeba mbwe, siliena esilakwa siokhwicha khwaye? Khulwo khuba khurula baseefwe nibakona chindoolo, ebiindu bioosi bichiririra sa ngolwabiali okhurula mukhuchaaka khwokhulongwa. ⁵ Mukhwenya bebirira mbwe, khulwa likhuwa lia Nasaye elikulu lialiwo khale, ne eliloba niliemanga erwanyi wamaachi nende mumaachi: ⁶ Khulwako esialo esialiwo bulano, nisimirirwe nende amaachi, siasasikha: ⁷ Arali elikulu nende esialo, ebiliwo bulano, khulwe likhuwa liene elio biabiikhuwa musiaki, khulindirira omuliro khunyaanga yobukhalaki nende obumululwi bwabaandu bararia Nasaye. ⁸ Arali abakheerwa murebirira esiindu silala sino, mbwe inyaanga ndala khu Mwami yili kori emiaka ilifu, ne emiaka ilifu kori inyaanga ndala. ⁹ Omwami khasi akhinda; arali arwesimirisirianga, nareenya mbwe omuundu yeesi anyale okhusasikha, arali mbwe boosi banyale okhwicha okhwekanira. ¹⁰ Arali inyaanga yo Mwami yakheche kori ngomwiibi musiro; omwelikulu lichia khurulao nende esioka sikhoongo, nabio ebilonge biamberi bichia okhusangulikha khububafu bululu, esialo siosi nende ebikhole bisilimo bichia khusambwa. ¹¹ Bulano ngolwa ebiindu bino bioosi bichia okhukhamulukha, mukhoyere okhuba abaandu bangeri siina? munomanoma indakatifu yoosi nende obunasaye, ¹² nikhulingeera nende okhwerekekhera okhwicha khwe inyaanga ya Nasaye eya muniyo elikulu niliri khumuliro lichia okhumulukha nende ebilonge biamberi bichia khusangulukha khububafu bululu ¹³ Kata kario efwe, okhulondana khusilakwa siaye khulingeera khulikulu liyaakha nende esialo siyaakha, omwobulungifu bwamenya. ¹⁴ Khulwesio, abakheerwa, nimulola mbwe mulindirirranga ebiindu biene ebio, mube abadinyifu mbwe munyoole onyolekhana naye nimuli mumuleembe, oburali nende elikoondo, kata isuuku. ¹⁵ Ne mubale mbwe obwesimirisi bwomwami wefwe nibwo obuwonia khandi kori omukheerwa omusiani wefwe Paulo yeesi olondana nende obukesi obwayaberesibwa yabaandikira; ¹⁶ Kori sa nga muchibarwa chiye chiosi, alomalomeramo khubiindu bino; omwamuli nende ebiindu biumu okhumanyirisia, ebia bala abareeka nende abaradinya bakhiamianga kori bakhola amaandiko kandi koosi, khulwo busasikhi bwabwe abene. ¹⁷ Khulwesio, abakheerwa, nimulola mbwe mumanyire ebiindu bino mberi, mwekenderesie mureecha mwesi mwemirirwa nende obukori bwa bamaanu, mwakwa khurula mubudinyifu bwengwe. ¹⁸ Arali mukhule mubukosia nende mukhumanya Omwami nende omuonia wefwe Yeso Kirisito. Oluyaali lube kuniye khubulamu nende oburalibwayo. Amina.