¹ Arali baliwo abanabii bobubacha mubaandu kori ngolwa bachia okhubao abekesia bobubacha mweng'we, abomubwekisi bachia khureeramo amekesio makhiamu, kata nibekaana Omwami owabakula, nibererakho abene obusasikhi bwalwangu: ² Nabo abangi bachia khuloonda chingira chiabwe chiobusasikhi; esikera ni mbwe khubo ingira yobwadieri ichia khulomalomwakho ebibi. ³ Mukhwekoomba bachia okhwereresiria obukhala khweng'we khu makhuwa kobubacha: abobukhalaki babwe bulano khubikha biraambi khasi buchia okhukhiinda, nabwo obusasikhi bwabwe khasi bukunukha. ⁴ Khulwo khuba nikali mbwe Nasaye khasi yebalekhera abamalayika bonoona, arali yabafuuba asi emagoombe, nabara muminyororo kiesirima, okhubikhwa okhuula khubukhalaki: ⁵ khandi khasi yalekhera esialo sikhale, arali yaonia Nowa omuondu wamunane, omuyaali wobulungifu, nareera muyiembo khusialo siabaandu babula obunasaye; ⁶ naye nakalukhania madookho ka Sodoma nende Gomora elikokhe, nakhalakira okhung'ululwa, nakakhola esilolero khwabo abolunyuma bakhamenya nibabula obunasaye; ⁷ arali yaonia sa Lutu, najoongisibwe nende ebiima bio bwelaasi ebiabakhiamu; ⁸ okhuba omuundu ula omulungifu namenyanga mubo, mukhulola nende okhubulira, yajoongisibwa mumwoyo kwaye kwobulungifu okhurula inyaanga khunyanga nende ebikhole biabwe ebiralonda amalako. ⁹ Omwami amanyire ngolwa anunulanga abobunasaye khurula mumateemo,nende okhubiikha abarali balungifu khulwe inyanga yobukhalaki khunyoola esinyasio. ¹⁰ Arali elikhongo ni mbwe abo abakeende khulondana nende omubiri muliekomba lio mufuro nibaleka oburuki nabachaalifu, abokhwekingimasia, khasi baria khulomaloma amabi khuboluyaali. ¹¹ Kata olwabamalayika, bakhoongo mubunyala nende amaani, khasi bareera emisaango kiamanyeko khubo imberi wo Mwami, ¹² Arali abaandu bano bali kori ngechisolo chibula makesi, bakholwa obukulwa nende okhusasibwa, balomaloma amabi khubiindu biabaramanyirisia; ne bachia khusasikha mubukori bwabwe bene; ¹³ bachia khunyoola mukabo kwobumaanu, ababalanga obukoyaanu mubikha biesideere okhuba isangaalo. Namakoondo nende echimbala, ebene abo niberukhira nende okhwebacha khwabwe abene nibakhola elisaabo ninang'we; ¹⁴ Bali nende chimoni chiichulemo obuyeeyi, khandi khasi balekha okhwonoona, abakadirisia bemioyo midekhere, abemioyo kianasibwa obwekombi, abaana besichubo. ¹⁵ Abo abalekha ingira ingololofu, nibakora nibaloonda ingira ya Balamu omwana wa Beori, owakheera omurungo kwobumaanu. ¹⁶ Arali yalabirwa khulwo bubi bwaye mwene; isukhiri iranyala khulomaloma, niyiboola khudoboosi yomuundu, yekalira elalu liomunabii. ¹⁷ Abaandu bano nibiyero bibulamo amaachi, amaleesi akakiingwa nende imbumbuyeka; ababiikhirwa elinang'oong'o lie sirima siralibwayo. ¹⁸ okhuba nibalomaloma amakhuwa makhongo akafwiimba akesileka, bakaalisibwa khubirira muliekomba liomubiri, okhubirira mubukori bungi, abali abalafu berukha khubarulakho abamenya mubukhiamu. ¹⁹ Babasubisia obulekhule, nabo abene nabarumwa bobusasikhi; okhuba omuundu nakhirwa nende omuundu, omukhirire oyo niye omukhola omurumwa. ²⁰ Okhubeera bala abeerukha amamali kesialo khulwo khumumanya Omwami nende omuonia Yeso Kirisito, nikaba mbwe bechokaniamo khandi mani bakhirwe, obumalirikhi bwabwe buba obubi khubo okhira amachakira. ²¹ Khulwo khuba biakhabere ebilayi khunibo nibakhakhayire okhumanya ingira yobulungifu, okhira olunyuma lwokhuyimanya nibakalukhana okhurula khubilagiro bitakatifu ebiababeresibwa. ²² Arali kabekholekhanakho khulondana nende olukaado lwobwadieri oluboola mbwe, imbwa ikalukhiire amasasi kayo eyene, ne imbiichi yokerwe ikalukhe okhwefufula mumadosi