¹ Simoni Petero, omukholi khandi omurumwa wa Yeso Kirisito, khwabo abanyoola obusuubiri bwobukusi alala nafwe mubulungifu bwa Nasaye nende omwami wefwe Yeso Kirirsito: ² Obukoosia nende omuleembe biemeede khweng'we mubumanyirisi bwa Nasaye, nende obwa Yeso omwami wefwe. ³ Okhulondana kori ngobunyala bwobunasaye bwaye bwaruberesia ebiindu bioosi ebikhola khubulamu nende khuria Nasaye mubumanyirisi bwa ula owarulanga muluyaali nende obulayi. ⁴ khandi khulwako yaruberesia ebilakwa ebikhirao mubukhongo nende mubukesi: mbwe khulwe ebio munyoole okhuba abasangirani abeimera yobunasaye, nimuonisibwa nende obusasikhi buli musialo khulwo bwekoombi. ⁵ Khulwe sifune sino, mwedinye khumeeda malayi khubusubiri bweng'wei, ne khumalayi obumanyirisi; ⁶ ne khubumanyirisi obweruki; ne khubweruki okhwesimirisia: ne khukhwesimirisia okhuria Nasaye; ⁷ ne khukhuria Nasaye obwenyani bwa bebulane; ne khubwenyani bwa bebulane okhukheera. ⁸ Khulwo khuba ebiindu bino nibiba mweng'we, nende mubungi, bibakhola eng'we oburaba abakuumba kose abaraama ebiamo mubumanyirisi bwo Mwami wefwe Yeso Kirisito. ⁹ Arali ula obula ebiindu bino nomufu, naye khasi anyala khulola ale, khandi yebirire mbwe yosibwa khurula mubionono biaye bikhale. ¹⁰ Khulwesio , abaana beefwe, mwedinye okhukhola omulango kweng'we nende obulobolwi obureema: khulwo khubeera nimukhola ebiindu bino, khasi muchia khukwa. ¹¹ Khulwo khuba munaberesibwa okhwingira okhungi mubwami buralibwayo obwo Mwami khandi omuonia wefwe Yeso Kirisito. ¹² Niko kakera khaye okhuba oradeeba okhubara eng'we bulilwosi mubwichuliri bwebiindu bino, kata nikali mbwe mubimanyire, nimwabisikhamamo mubwadieri bwa bulano. ¹³ Khandi mbaara mbwe nebilayi, olwamba nisiri muliyeema lino, mbabuusie nibara eng'we mubwichuliri: ¹⁴ nimanya mbwe mubikha bimbikiri kali mbwe ndekhe eliyeema liange lino kori sa ngolwo Mwami Yeso Kirisito yanjekesia. ¹⁵ Okhumeedakho ndedinya mbwe eng'we munyale okhura mubwichufu ebiindu bino buli lwoosi olunyuma lwokhurulao khwange. ¹⁶ Okhuba khasi khwaloonda echingano chireresiibwe mubikesikesi olwa khwakhola obunyala nende okhwicha khwo Mwami wefwe Yeso Kirisito okhumanyikhana khweng'we, arali khwali abaloleri bechimoni khukobukhulundu bwaye. ¹⁷ Khulwo khubeera yanyoola khurula khu Nasaye Sefwe esiriibwa nende oluyaali, olwo khwicha khuniye omwoyo okhurula muluyaali lukhongo naboola ari, uno niye omwana wange mukheerwa, owakherisibwa muniye. ¹⁸ Ne idoboosi yino eyarula mwikulu khwayibulira olwakhwali ninaye mulugulu lutakatifu. ¹⁹ Khandi khuli nende elikhuwa lirudinyia eliobunabii elia khunilio eng'we mukhola ebilayi nimulilonda, kori ngobulafu obwadukha abuundu wesirima, okhuula mukhukhia khweinyanga mani ing'ining'ini yesideere ibuukhe mumioyo kieng'we: ²⁰ Nikhumanya kano mberi mbwe bubulao obunabii obwamaandiko obuli nende obukaluli bwobwekisi: ²¹ Khulwo khubeera obunanbii khasi bwecha mubikha bikhale khulienya liomuundu: arali abaandu batakatifu ba Nasaye balomaloma kori olwabemirirwa nende Roho mulafu.