¹ V1Kali mumatukhu yako, munwa kwarhula khu Mwaami Augasito wamihaanga Varoma mu lusomo lwenolo, nukuvoola vaandu voosi vavalitswe. ² Yili lyali livalitswa lyukhuraanga, lwa Kureno yali nali gavana wa Siria. ³ Sha vuli muundu woosi yacheenda natsia khuvalitswa mu litaala li ingo waavo. ⁴ Yosefu yasimukha narhula mu litaala lya Nazareti lili mulusomo lwa Galilaya, natsia mu litaala lya Bethelehemu mu lusomo lwa Yudeya, wu Mwaami Daudi yali niyivulwa.Yosefu yasimukha khutsiayo shichira yali mwitsukhulu wa Daudi. ⁵ Yosefu yatsiayo khuvalitswa na Mariya , wayali ni yaselela khuva mukhali weewe, naye yali niyahelitsa; ⁶ Khaandi lwavari mu litaala lya Bethelehemu, litukhu lyu khwiivula mwaana lyaatukha. ⁷ Mariya yiivula mwaana weewe wu khurhanga wi shiyaayi, na muvoheela mu tsinguvu khaandi na mwaliikhitsa khu muriinga kwi tsing'oombe tsiliirakhu--- shichira shihalikhuho nu vwiiyaangu muunsu ya vacheni. ⁸ Khwali na vaayi mu lusomo lwi shivala shyeene sho, vakonaanga tsindoolo mu vikuuri nivaliindaanga vyaayo vyaavo vya makoondi . ⁹ Ingerosi yu Mwaami Nyasaaye yaloorekha khuvo, ma vukhumi vwa Nyasaaye nuvwaakha khuvo.Navo varhia nivatechera likari. ¹⁰ Na Ingerosi yavavoorera,"Mukharhia mba,!"Shichira murleerera likhuuva lirahi, lichira vaandu voosi valiiva nu vukhonyi khaandi vusaangari vunyiikhi muno. ¹¹ Nuunundi , muhonyi weenyu yiivuliirwe mu litaala likai lya Daudi, naye ni Kristo Mwaami! ¹² Yishi shimanya shive shimanyinyiro khumunye:Mulanyoola mwaana nalinjiirwe mu tsiinguvu tsyu mwaana mutoro, niyalikhiitswe khu muriinga kwii tsing'oombe tsiliirakhu." ¹³ Heene yaho, shituma shikari shi tsingerosi tsya mahee ku mwikulu shalorekha halala ni ingerosi yeene yeyo, ni viimbaanga tsinyimbo tsyu khwiitsoominya Nyasaaye: ¹⁴ "Vukhumi vuve khu Nyasaaye ikulu mwikulu, na mireembe mu shivala khu vaandu va yayaansa!" ¹⁵ Lwa tsingerosi tsyiasimukha ni tsikalukha mwikulu,vaayi vavoolerana veene khu veene, "cheendi khutsi mu litaala lya Bethelehemu khuloore ni shiina shikholekhaneyo, shyu Mwaami Nyasaaye arhumane khutsi khulola." ¹⁶ Vasimukha ni vatsyaa vwaangu, ni vanyoola Mariya na Yosefu nende mwaana ni yaalikhitswe khu muriinga. ¹⁷ Lwa vaayi vamala khulola mwaana tysana,vavoolera vaandu valiho makhuuva koosi ki ingerosi yali ni vavoolere khu mwaana wuyu. ¹⁸ Vaandu voosi vahulira makhuuva ka vaayi vavavoolera nivava ni liicheenya. ¹⁹ Navutswa Mariya yaviikha makhuuva keene yako koosi mu mwooyo kweekwe, na kanakanakhu. ²⁰ Vaayi vakalukha ni viimbaanga tsyinyimbo tsyu khwiitsoominya Nyasaaye , khu koosi ka vari nivahuliire khaandi ni valorli; kiikholekha vutswa khuli Ingerosi yali na vooli. ²¹ Khu litukhu likhola munaane,lyu mwaana khushevwa, vaamukulikha liirha Yeesu; liirha lya Ingerosi yali niyavoola aliitsa khukulikhwa, lwa yali nashiri khuveelekhwa. ²² Lwa matukhu kaatuha ka Mariya nu mwaana khukholerwa mulukha ku khulavitswa, khuli malako ka Musa kavooolanga.Yosefu na Mariya vahiira mwaana mu litemberi Yerusalemi, khumuhaana imbeeri wu Mwaami Nyasaaye. ²³ Khuli kahaandikwa mu malako ku Mwaami,"Vuli mwaana wi shiyaayi mukhuluundu khwivulwa, aliista khuhaanwa khu Mwaami Nyasaaye." ²⁴ Khu lwayako vahaana vituuti viviri anoho vinamusoosi viviri, khuli isataaka yu musaango,khuli malako ku Mwaami Nyasaaye kavoolaanga. ²⁵ Heensa khwaliho nu muundu walangaangwa Simioni wamenyaanga mu Yerusalemi .Yali muundu mulahi, wu khuha Nyassaye luyali; khaandi walindiriraanga khuloia lihonyinywa lya Vaisraeli.Na Rooho Mutakatifu yali naye, ²⁶ namusuuviritsa ndi shya aliitsa khukhutsa na shili khumuloolakhu Masiha wu Mwaami Nyasaaye yali niyalaka. ²⁷ Rooho yamwimilira Simioni ni yiinjira mu Liitembeeri.Lwa viivuli valeera mwaana waavo Yeesu mu liitembeeri khumukholeera ka malako kavoolaanga, ²⁸ Simioni yaavukula mwaana mu makhoono keeke ma na saanditsa Nyasaaye nukhuvoola: ²⁹ "Niiwe Nyassaye wu Vunyaali , umali khurhweekhitsa lilaaka lyo khaluunu, urhio khuseevula yiinse murhumikhi woowo, nduleho mu mireembe". ³⁰ Tsimoni tsyaanje tsiimali khuloola vuhonyi vwoovwo, ³¹ vwa wiirechekhiitsila vaandu voosi; ukhumanyiinye mutsimon tsyeerhu.: ³² Vulavu vwu khumanyinya lienya lyolyo, khu vaandu vi tsiimbya tsiindi, navutswa vukhumi khu visraeli voovo." ³³ Viivuli vwu mwaana vali ni liicheenya,shichira mang'ana ka Simioni yavoola khuloondekhana khu mwaana. ³⁴ Simioni yavakaasitsa , na voolera Mariya , nali mama wa Yeesu,"Nyasaaye urhovoole mwaana wuyu khu atiivitse nu khuhoonyinya vanyiikhi mu shivala shya Israeli.Naye aliitsa khuva shimanyinyiro khurhula khu Nyasaaye, shya vaandu vanyiikhi valiitsa khulomolomakhu viindu vitaamanu, ³⁵ khu tsiinganakani tsyaaviswa tsya vanyiikhi tsimanyikhane; liveerera, liiri khuli shyuchi liliitsa khuvirira mu mwooyo kwookwo." ³⁶ Khwariiho khaandi nu muporofeti mukhali walaangwangwa Ana, nali mwaana wi shikhaana wa Fanweli,warhulaanga mu vaandu vuluhya lwa Asheri.Yali musheere muhiindira ; yaamenya mihika sapa chyoonyeene mulukhali lweelwe ³⁷ ma nakwaa mukhuunsakhari khutuukha, lwa yamala mihika makhoomi munaane na chine.Yahoonganga narhumikha mu liiteembeeri vutuukhu nu mmbasu vuchira khulya, nasaalanga khu Nyasaaye. ³⁸ Mu saa yeeneyo Ana yatuukhaho; na saanditsa Nyasaaye, navoola makhuuva khuloondekhana khu mwaana khu vaandu valiindiriraanga liitukhu lya Nyasaaye, aliitsa khuvooholora vaandu va Yerusalemi. ³⁹ Lwa Yosefu na Mariya vali vamali khukhola koosi ka malako ku Mwaami Nyasaaye kavoolaanga vakalukha ingo mu litaala lyaavo Nazareti mu lusomo lwa Galilaaya. ⁴⁰ Mwaana yaviluukha, nava ni tsingulu.Yali nu vusitsa vunyiikhi, khaandi Nyasaaye na muloolera tsimbavasi. ⁴¹ Shya vuli muhika, viivuli va Yeesu vatsiitsaanga Yerusalemi khu liitukhu lyu Mulukha kwa Pasaka. ⁴² Lwa Yeesu yali ni mihika likhomi na chiviri, yatsia halala na viivul veeve khuloondekhana khuli mwiima kwaliinji. ⁴³ Lwa valii vakhamala matukhu koosi ku mulukha tsaana,viivuli va Yeesu varaanga khukalukha ingo; navutswa muyaayi Yeesu yarhikala mu Yerusalemi . Viivuli veeve shivamanyakhu arhikalee yo mba; ⁴⁴ vakanakanaanga yirhanjirire imbeli mu shituma sha vaandu; khu vacheenda liitukhu lyoosi ni va mukhavaanga mu viikho nu muvalina vaavo. ⁴⁵ Lwa vavula khumunyoola; vakalukha , ni vatsia khumukhaava mu Yerusalemi. ⁴⁶ Kamanya kanyoolekha, khuliitukhu lya khavaka vamunyoola nali mu liteembeeri, niyikhaare hakarhi mu veechitsi va vayahuti naavahuliikhitsaanga nu khuvarheeva marheeva. ⁴⁷ Vaandu voosi va muhuliikhitsa Yeesu, vacheenyinywa shichira vucheri vwu khurhevula marheeva khweekhwe. ⁴⁸ Lwa viivuli veeve vamolola,vali ni liicheenya.Mama weewe ya murheeva "Mwaana waanje shichira shiina nu khukhola ndi? Inse na taata woowo , khuveere ni liheenda mwooyo likali muno nu khukhukhavaanga." ⁴⁹ Yeesu yavarheeva."Shichira shiina nu mukhava ?" Shyumumanyikhu kenyeekha mbe ni ndii muunsu mwa Taata wanje?' ⁵⁰ Navutswa viivuli veeve , shivahulira nu khumanya lichiipu lyelye, lya yavavoolera taawe. ⁵¹ Khulwa yako, Yeesu yakalukha navo mu litaala lya Nazareti, na hulira malako kaavo.Mama weewe yaviikha mu mwooyo kweekwe makhuuva keene yako koosi. ⁵² Yeesu ya hiindira mu muviri khaandi mu vusitsa , nayaansitsa Nyasaaywe na vaandu.