1 Khu Tseofilo, vaandu vanyiikhi vachimira mihiinsi chyu khuhaandiika makhuuva khuloondekhana khu viindu vyakholekha mu khutse. 2 Vahaandiika makhuuva khu ka khwavoolerwa na yavo valola viindu vyeene yevo nivikholekhaanga, khurhula mu lirhaanga khaandi niviirwaatsa likhuuva. 3 Khulwayako, yiwe Tseofilo, lwa inse mweene mali khurhuniiritsa vulahi vweene khuloondekhana khu viindu vyeene yevo vyoosi khurhula mu lirhaanga, ndoli nu vulahi khukhuhaandiichirakhu mu injira indahi makhuuva keene yako, 4 nikanyalikha umanye ka tooto koosi khuloondekhana khu viindu vya weechitswa. 5 Tsakalya, warhulaanga mu mukaanda kwu vusaaliisi kwa Apicha; Mukhali weewe yalaangwaangwa Lisaaveeti; khaandi yali mwiitsukhulu wa Haruni. 6 Voosi vaviri vali vaandu vyi likhola lyu vuluunji imberi wa Nyasaaye; khaandi vali vayaansitsa Nyasaaye, shichira valoondaanga malako ku Mwaami Nyasaaye, nivakhola ka yeenyanga, vuchira khukhola shiindu shitaamaanu. 7 Vali ni vashishiri khwiivulakhu mwaana woosi, shichira Lisaaveeti yali mukhali mukuumba; khaandi vo vaviri, vali vasaakhula muno. 8 Litukhu liindi , Tsakalya yali nakholaanga muhiinsi kweekwe khuli musaaliisi mu Liteembeeri, khaandi naarhweekhitsaanga muhiinsi kweekwe kwa vuli litukhu. 9 Yarhovolwa khuvirhira khu ikuura , khuli mwiima kwu vusaaliisi khutsya mu liteembeeri lyu Mwaami Nyasaaye khusaamba vubani khu vwaali. 10 Lwa isaa yatuukha yu khusaamba vubani, shituma shya vaandu vali ni vali irwaanyi, nivasaalaanga. 11 Khulwayako, ingerosi yu Mwaami Nyasaaye yalolekha khu ye, niisiinjiire khu luveka lwu mukhono muluunji kwu vwaali vwu khusaambirakhu vubani. 12 Lwa Tsakalya yalola ingerosi yeene yeyo, yali ni licheenya, naarhya. 13 Navutswa ingerosi yeene yeyo yamuvoolera," Tsakalya, lekha khurhya! Nyasaaye umali khukhuhulira lisaala lyoolyo; khaandi mukhali woowo Lisaaveeti atsyitsaanga khukhwiivulira mwaana wi shiyaayi, Uliitsa khumukulikha lyiirha Yuhaana. 14 Uliitsa khuva nu vuyaansi nu khusaangaala , khaandi vaandu vanyiikhi valiitsa khuyaansa, ni yaakhiivulwa. 15 Aliitsa khuva muundu wi tsiingulu imberi wu Mwaami; khaandi aliitsa khuvula khung'waakhu itivaayi anoho malwa.Rooho Mutakatifu aliitsa khwiitsula mu ye, khali naashishiri khwiivulwa. 16 Aliitsa khaandi khukalukhitsa Vaisraeli vanyiikhi khu Mwaami Nyasaaye, uli Nyasaaye waavo; 17 aliitsa khwiimirira imberi wu Mwaami mu tsingulu nu vunyali vunyiikhi, khuli vwu Muporofeeti Iriicha. Aliitsa khuhaambanyinya khaandi vaataata na vaana; aliitsa khukalukhanyinya vaandu veeve." 18 Tsakalya yarheeva Ingerosi, "Nyala khumanya ndi , niiva yaka kaliitsa khuva ka kyirikali? Ndi musaakhulu, khaandi mukhali waanje nu musheere mutsiriru," 19 Ingerosi yamurhevulira, "Niinse Khavulyeeri. Siinjiraanga imberi wa Nyasaaye ; na naye undumi nomolome na yiwe khukhuvoolera mang'ana malahi yaka. 20 Heensa! Utsitsaa khuhoonjeera, nu khurhamwa khulomoloma, khutuukha inyiinga lwa yaka kaliitsa khurhwekhitswa, shichira waambakhaane khusuuvira makhuuva kaanje." 21 Vaandu vali nivalindiriraanga Tsakalya vali ni licheenya, shichira Tsakalya , yiikhala khu luhoono mu Liteembeeri. 22 Tsakalya yarhula irwaanyi, vuchira khulomolomakhu khu vo; navutswa vamanya ndi Tsakalya uloli malolo mu liteembeeri. Lwa Tsakalya yarhamwa khulomoloma, yavacherera vuli shiindu shyoosi na makhono keeke. 23 Lwa Tsakalya yali naamali matukhu ku muhiinsi kweekwe kwu vusaaliisi mu Liteembeeri, yakalukha naatsya ingo weewe. 24 Lwa matukhu kaandi kali ni kakhavira, mukhali weewe Lisabeti yahelitsa, vuchira khurhulakhu muunsu khu mwieli chiranu. 25 Yavoola, Nunundi Mwaami Nyasaaye ukhoonyi; umali khundulitsa mu tsisoni imbeli wa vaandu!" 26 Khu mweli kwa sita khurhula Lisabeti navelekha mwaana, Nyasaaye yarhuma Ingelosi Gaburieli khutsia mu litaala lili mu Lusomo lwa Galilaya halaangwangwa Nazareti, 27 khu mwaana wi shikhaana muchima walaangwangwa Mariya waselelwa nu muundu walaangwangwa Yosefu, wali nali mwitsukhulu wu Mwaami Daudi. 28 Ingelosi yasimukha natsia khu Mariya, namuvoolera,"Mireembe! Yiwe wakaasitswa muno, Mwaami Nyasaaye ali nayiwe!" 29 Mariya yali nilinyaakhana linyiikhi mu mwooyo khuloondekhana khu likhuuva lya ingelosi yamuvoolera, nava nilicheenya shya kavoolaanga. 30 Ingerosi yamuvoolera ,"Malya, lekha khurhya, shichira Nyasaaye umali khukhulolera tsimbavasi. 31 Utsitsaa khuverekha, na nuwiivule mwaana wi shiyaayi, wa wiitsa umukulikhe lyiirha Yeesu. 32 Aliitsa khuva ni tsingulu, khaandi aliitsa khulaangwa Mwaana wa Nyasaaye Uli Ikulu khu vyoosi. Mwaami Nyasaaye aliitsa khumwaamiihitsa khuva mwaami, khuli kuuka weewe Tawuti. 33 khaandi aliitsa khwaamiiha vyiitsukhulu va Yakopo mihika ni mihika; ma vwaami vweevwe shyuvuliitsa khuhwa!" 34 Malya yavoolera ingerosi, "Ndi mwaana wi shikhaana muchima, na ndaamanyakhu musaatsa woosi mba, yaka kanyala khwiikholekha mu injira shina?" 35 Ingerosi yamurhevulira, "Rooho Mutakatiifu aliitsa khukhukhuunikha khuli liruumbi, khaandi tsingulu tysa Nyasaaye Uli Ikulu khu vyoosi tsiriitsa khuva na yiwe. Khulwayako, khuloondekhana khu shivune yishi, Mwaana mutakatiifu mweene woyo, aliitsa khulaangwa Mwaana wa Nyasaaye. 36 Heensa mwiikho woowo Lisaaveeti atsitsaanga khwiivula mwaana wi shiyaayi, khali niiva nu musheere. Woyo wavavoolaanga nu mukhali mukuumba, ali niinda yi myeeri sita. 37 Shivulakhuho shiindu shyoosi shirhamaa Nyasaaye." 38 Malya yavoola "Ndi murhumikhi wu Mwaami Nyasaaye; nu vulahi khwiikholekha khu inse khuli uvooli."Khulwayako Ingerosi yamulekha . 39 Mu matukhu keene yako, Malya yasimukha naatsya vwaangu mu litaala liri mu shivala shyi vikulu shya Yudeya, 40 Yiinjira muunsu ya Tsakalya , naasheeritsa Lisaaveeti. 41 Lwa Lisaaveeti yavuchiirira mireembe chya Malya, mwaana yiinuuya muunda mweemwe, na tsingulu tsya Rooho Mutakatiifu, ni tsiitsula mu Lisaaveeti. 42 naavoola nu mwooyo mukali,"Uli mukhali wakaasitswa muno mu vakhali vaandi voosi, khaandi mwaana wa wiivula waakaasitswa! 43 Shichira shiina likhuuva yiri ni likholekha khu inse, ndi maama wu Mwaami waanje khwiitsa khuunjeniha? 44 Lwaambuchiiriire mireembe chyoochyo, mwaana uli muunda mwaanje yiinuuyi, ni lisaangaala. 45 Ali ni ikhaavi muundu uli ni lisuuvira ndi ku Mwaami Nyasaaye amuvoolera, kaliitsa khurhwekhitswa! 46 Malya yavoola, "Mwooyo kwaanje kwiitsoominyaanga Mwaami Nyasaaye; 47 khaandi saangaalaa mu mwooyo kwaanje, shichira Nyasaaye muhonyinyi waanje. 48 Shichira umali khuunsitsukhitsa inse murhumikhi weewe mwiicheehitsi! Khurhaanjira nuunundi vaandu va makhula koosi, valiitsa khuunaanga wakaasitswa. 49 Shichira Mwaami Nyasaaye umali khuukholera viindu vyi tsingulu. Lyiirha lyeelye ni litakatiifu; 50 aloleraanga tsimbavasi yavo voosi vamuheetsaanga luyali khurhula khu likhula lirala khutuukha khu likhula liindi. 51 Naye wakhola viindu vyu khuchenyinya khuvirhira mu vunyali vweevwe; naasalaanyinya vaandu viirola mu ka valookhitsaanga khukhola koosi mu myooyo chyaavo. 52 Naye wiikhitsa vu vunyaali khurhula mu visako vyaavo vyu vwaami, khaandi naachiinguula ikulu vyiicheehitsi. 53 Umali khwiikurhitsa vali ni insala ni viindu virahi, nu khukhuunga vahiinda makhono meere. 54 Umali khurhweekhitsa liraka lya yaloomba na vaakuuka veerhu, khaandi wiitsi khukhoonya murhumikhi weewe Israeli. 55 Wiitsukhiitse khulolera Apurahaamu tsimbavasi tsyeetsye, khaandi khu vyiitsukhulu veeve voosi mihika ni mihika. 56 Malya yamanya naamenya na Lisaaveeeti hiimbi khu myeeri chivaka; ma naakalukha ingo waavo. 57 Lwa litukhu lyali ni lyaakhatuukha lya Lisaaveeti khwiivula mwaanawe, yiivula mwaana wi shiyaayi. 58 Varheende veeve na vyiikho veeve, vahulira ndi Mwaami Nyasaaye umuloleere tsimbavasi tsyukhuchenyinya, nivasaanga mu lyiikhooya lyeelye. 59 Na kiikholekha khu litukhu lya munaane, viitsa khusheva mwaana; khaandi niveenya khumukulikha lyiirha Tsakalya, khuli taata weewe yali naalaangwaangwa. 60 Navutswa maama weewe yavoola," Avule khulaangwa ndyo, navutswa alalaangwa Yuhaana." 61 Vamuvoolera ,"Avulakhuho mwiikho woowo woosi , ulaangwaa ndyo!" 62 Vamanya vamanyinye vimanyinyiro khu taata weewe, ni vamurheeva ni lyiirha shiina lya yeenyaanga mwaana weewe ave naalaangwaangwa. 63 Tsakalya yarheeva shiindu shyu khuhaandiikakhu, naahaandiikakhu, "Lyiirha lyeelye ni Yuhaana." Voosi vali ni lichenya! 64 Isaa yeene yeyo, munwa kwa Tsakalya kwiikukha, lulimi lweelwe nu luvoholokha, naarhaanga khuiomoloma, nu khwiitsoominya Nyasaaye, 65 Varheende veeve voosi varhya; ma makhuuva khuloondekhana khu viindu vyeene yevo, nikalaanda vuli hawoosi mu shivala shyi vikulu shya Yudeya. 66 Vaandu voosi vahulirakhu ndyo, vakanakana makhuuva yaka nu khukaviikha mu myooyo chyaavo, nu khurheeva, "Mwaana wuyu atsitsaanga khuva mwaana wa lukanu shina?" Na kamanyikhana havulavu ndi tsingulu tsyu Mwaami Nyasaaye tsiri mu ye. 67 Taata weewe Tsakalya yiitsulwa na Rooho Mutakatiifu, ma naarhaanga khuvoola vuporofeeti vweevwe: 68 "Yiitsoominywe Mwaami Nyasaaye, uli Nyasaaye wa Israeli; shichira umali khwiitsa khukhukhoonya khutse vaandu veeve nu khukhuvoholola. 69 Ukhuheere muhonyinyi wu vunyali, Mwiitsukhulu wu murhumikhi weewe Tawuti, 70 khuli yali ni yalaaka khuvirhira mu vaporofeeti veeve vatakatiifu mu matukhu kavirha khale. 71 ndi aliitsa khukhuhonyinya khurhula khu vatsuku veerhu, khurhula khu tsingulu tsya yavo vakhuhiimaanga. 72 Yavoola uliitsa khuveera tsimbavasi vaakuuka veerhu, nu khwiitsukhitsa indakano navo iri indakatiifu, 73 Ya yali ni yiisuuhira kuuka weerhu Apurahaamu, 74 na umali khukhuhonyinya khurhula khu vatsuku veerhu, aliitsa khukhukhola khumurhumikhire vuchira vurhyi, 75 nikanyalikha khuve vatakatiifu khaandi valuunji imberi weewe khu matukhu keerhu koosi ka khushishiri mwooyo. 76 Yiwe uli Mwaana waanje , uliitsa khulaangwa muporofeeti wa Nyasaaye Uli Ikulu khu Vyoosi; shichira uliitsa khwiimira imberi wu Mwaami khumulombera injira , 77 khuvoolera vaandu veeve khuli valiitsa khuhonyinywa, nu khusamiihwa khurhula mu vwooni vwaavo. 78 Nyasaaye weerhu nu mwiirhuuliri khaandi wi tsimbavasi. Aliitsa khuchira vulavu vweevwe vuleerhaanga vuhoonyinyi vukhwaakhire. 79 khaandi vwaakhire yavo voosi vamenyaanga mu shisuundi shyi likhutsa, khukwiimirira mu injira ireerhaanga mireembe." 80 Mwaana yavirukha naava ni tsingulu mu muviri nu mu rooho; khaandi yamenya mu shaangalaangwe khutuukha lwa yalolekha havulavu khu Vaisraeli.