¹ petero na yohana vali nivatsitsanga mulitempeli isa yilisaala,sa tisa ya hamukolova. ² hali nu mundu muleme khurula munda ya mama wewe nalerwa hashirivwa shi litempeli shalangwangwa shilayi. vamuvikhaho vuli litukhu asave vukhonyi khu vandu vatsitsanga mulitempeli. ³ lwa yalola petero na yohana nivenya khwinjila mu litempeli, yavasava vukhonyi. ⁴ na petero halala na yohona vamumikha tsimoni tsyavo, nivamuvolela, '' khuhenze.'' ⁵ naye yavahenza, nasuvilanga alanyola vukhonyi khurula khuvo. ⁶ navutsa petero yamuvolela, ifeza ni zahabu inze mbula, navutsa shyandi nashyo, nashyo shyakhuhenzanga. mulira lya yesu kristo mnazareti, sinjila uchende. ⁷ yamukumila mukhono kwekwe mulunji na musinjilitsa, nonoho vilenje vyevye na masikamo kanyola tsingulu. ⁸ yaruma ikulu nasinjila, naranga khujenda; naye yinjila halala navo mulitempeli, nachendanga,narumarumanga, khandi niyitsominyanga nyasaye. ⁹ na vandu vosi vamulola nachendanga niyitsominyanga nyasaye. ¹⁰ nivamanya uyu naye mundu wasavingi vukhonyi hashilivwa shilayi shi litempeli; khandi vali nilichenya nilihuka khulondekhana khu kali nikakholekhe. ¹¹ lwa mundu muleme yali nahonyinywa yali nashihandi khu petero na yohana,vandu vosi vilukhaka maliviri nivatsi havundu halangwangwa mukuru kwa solomoni, nivachenya muno. ¹² lwa petero yolola yako,yarevula navavolela, shichila shina muchenyalanga yaka? shichila shina mukhuumikhe tsimoni khukhutse, khuli ni khutse khu tsingulu tsyeru inoho khu vutakatifu vweru khulombi mundu uyu alachenda? ¹³ nyasatye wa abrahamu, khandi wa isaka, khandi wa yakobo, nyasaye wa vatata veru, naye ukhuminye murumikhili wewe yesu. naye wa mwazama nu mumwambakhana imbeli wa pilato,lwa yenya khumulakhula atsi. ¹⁴ navutsa munye mwambakhana uyu yali mutakatifu khandi mulunji, na numwenya muhelwe mulumindi. ¹⁵ khandi munye mwiira woyo yarangitsa liva mwoyo, na nyasaye yamwisimukhitsa mu vakhutsu; nakhutse khuli valolekhitsi va makhuva kenaka. ¹⁶ na khuvirila mulisuuvila mu lira lyelye, alombi mundu uyu khuva nitsingulu, wamulola uyu khandi wa mwamanya.lisuuvila mu yesu lihele mundu uyu vulamu vwamulolanga nali navwo imbeli wenyu munye vosi. ¹⁷ na khandi vamweru, inze ndamanya mwakhola vujila limanya, khandi khali vamihi venyu. ¹⁸ navutsa vindu vya nyasaye yavola imbeli khu minwa cha vaporofeti vosi, ndi kristo wewe aliitsa khusalilitswa, amali khurekhitsa lwenulu. ¹⁹ khu lwayako, mwikanile, mukalukhane, vwoni vwenyu vurulizwe; khu tsinyinga tsiukhusositsa tsitse khurula imbeli wu mwami; ²⁰ nyasaye aliitsa khumukhola muve nu vuyanzi mumatukhu ku mwene yaviritsa, khandi allitsa khumurumila yesu,ali masihi,wayali niyarovola khale. ²¹ wa katukhilanga likulu limuvukule, khutukha khutsinyinga tsyu khukalukhitsa vindu vyosi khuli vyali khurula mu liranga, vya nyasaye yamoloma khuvurila khu minwa cha vaporofeti vatakatifu khurula lilova ni liranga. ²² musa likali yavola, mwami nyasaye aliitsa khumurovolela muporofeti khuli inze khurula mu munye vene.mumuhulikhitse mu vuli shindu shyosi shyavoola. ²³ khandi kaliitsa khuva mundu ulivula khuhulikhitsa muporofeti mwenoyo aliitsa khutivitswa arulitswe mu vandu. ²⁴ nyee, khandi vaporofeti vosi khurula khu samweli navandi vosi vitsa inyuma wewe, vavola khandi makhuva khulondekhana khu ka khulolanga lwenulu. ²⁵ munye muli vana va vaporofeti na khandi vana vi lilakano lya nyasaye yalakana na vakuka veru, lwa yavolela aburahamu, khuvirila khu vitsukhulu vyovyo, tsihili tsyosi tsyi lilolva tsyilakasitswa. ²⁶ lwa nyasaye yisimukhitsa mwana wewe yesu, yamuruma khumunye khuranga amukasitse, amukalukhanyinye shya mulala wenyu khurula muvutamanu vwenyu.