¹ lwa lyatukha litukhu lya pentekoste, vali halala vosi nu mwoyo mulala. ² khandi nonoho muhumu kwarula mwikulu khuli muhumu kwishihuzuzu shikali na ni kwizula munzu mwa vali nivakhale. ³ khandi tsialolekha khuvo tsinimi tsiavukhane khuli mulilo, na tsikhala khuvo shya mulala. ⁴ na vosi vizula roho mutsienukhu,nivaranga khumoloma mu tsinimi tsindi khuli roho yavaha vunyali. ⁵ khandi valiho vayahudi vamenya mu yerusalemi, vandu virulitsa khu mihinzi cha nyasaye,,khurula mu tsihili tsindi tsyosi hasi hi lilova. ⁶ lwa liyoko linielo lyahulilikhana, shituma shitsa halala,na voosi vali nilichenya shichila mundu shya mulala yahulila ni vomolomanga mu lulimi lwelwe. ⁷ vachenya khandi nivahuka niva voola, ''loli, yava voosi vamolomanga, shivali vandu vu khurula igalilaya? ⁸ shichila shina shya mulala weru khuvahulilanga kavavoolanga mu lumolo lweru lwa khwivulilwamu? ⁹ vaparathia khandi vamedi nende vaelami, khandi vandu vamenyanga mu lusomo lwa mesopotamia, nu muvuyahudi khandi kappadocia, khandi khurula luveka lwa pontus nende ivuhindi, ¹⁰ khurula mutsimbeka tsya frigia nende pamphila, khandi khurula ekepeti nu mutsisomo tsya libya nuhenzi kurene, khandi nende vacheni varuli ivuroma, ¹¹ vakirete na vaarabu, khuva hulilanga nivavoolanga mutsimolomo tsyeru mihinzi mikali cha nyasaye.'' ¹² vosi vali nilichenya nivakoyana; nivarevana vene khu vene, '' yaka kavola shina?'' ¹³ navutsa vandio vakhola shihenyehenye niva voola, ''vadandi iwaini impya.'' ¹⁴ navutsa petero yasinjila halala na vandi likhomi nu mulala, nachingula mwoyo kwekwe navolela, '' vandu va yudea na munye vosi vamenyi vu muyerusalemi, mumanye ndi, khandi muhulikhitse makhuva kanje. ¹⁵ shichila vandu yava shivadandi tawe khuli mukanakanga, shichila lwenulu ni tsisaa tsivaka tsya mavwevwe. ¹⁶ navutsa yuvu nu vuporofeti vwa vwaforofetwa nu muporofeti yoeli: ¹⁷ kalitsa khuva mmatukhu kukhumala, yahova nyasaye avoolanga,nditsa khutsukha roho kwanje khu vandu vosi: vana venyu vayayi nende vana venyu vi shikhana valitsa khu porofeta, na vavukha venyu valitsa khulola malolo, khandi vasakhulu valalora maloro: ¹⁸ na khandi khuvarumikhili vanje vasatsa nende vakhali, mumatukhu kene yako, nditsa khuvatsukhila roho kwanje, navo vitsa vaporofete: ¹⁹ na inze ndamanyinya vindu vyu khuchenyinya mumalesi ikulu khandi vilolekhitso mulilova hasi hanu; masayi, mulilo nu lwoshosho lu mwoshi. ²⁰ liuva lilakalukhanyinywa likwi shisundi, na mweli kulakwa khuli masayi,litukhu lyu mwami likali nilishili khutukha. ²¹ na kalitsa khuva mundu wosi ulianila khu lira lyu mwami alitsa khuhonyinywa.'' ²² munye vandu visiraeli, muhulile makhuva yaka; yesu wa nazareti, mundu yamanyinywa khu munye na nyasaye ni vikholwa vikali ni vindu vyu khuchenyinya ni vilolekhitso vya nyasaye yakhola khuvirila muye hakari henyu, khuli munye vene mwamanya. ²³ mundu uyu yahanwa khu munye, khulondekhana khu lyenya lya nyasaye yali niyaviritsa litsa likholekhe, khandi khulondekhana khuli yali niyamanya khale; na munye mwamuvamba khumusalaba, numumwira ni mikhono cha vandu voni. ²⁴ navutsa nyasaye yamwisimukhitsa khurula muvakhutsu, namuvoholola khurula khu vululu vwi likhutsa,shichila shikali kanyala khunyalikha akumilwe nilikhutsa tawe. ²⁵ shichila daudi yamoloma khulondekhana khuye navoola, 'ndolola mwami imbeli wanje khazozo, shichila ali khumukhono kwanje mulunji, khulwa yako shinyala khusundwa mba. ²⁶ khulwa yako mwoyo kwanje kwali nuvuyanzi khandi lulimi lwanje lwali nuvusangali. khandi muvili kwanje kulamenya mulisuuviritswa. ²⁷ shichila shulalekha mwoyo kwanje mushatisi, khandi shulahuchilila muvili ku mutakatifu wowo khukundila mushilindwa tawe. ²⁸ niwe wamanyinya limenya lichilanga vulamu nuvuvaho; khandi khuvaho khwokhwo khuchilanga sangala muno.' ²⁹ vamweru, nu vulayi inze khumulo nuvuluvilili khulondekhana khu kuka weru daudi, ndi yakhutsa narelwa mushilindwa, khandi shilindwa shyeshye shili nakhutse khali lwenulu. ³⁰ khulwa yako, yali muporofeti na khandi yali yamanya nyasaye yali yayisuha ndi aliitsa khukhola mulala khu vitsukhulu veve khuva mwami, khuli daudi yalingi' ³¹ yalola kitsa kikholekhe mumatukhu kitsanga, naye yamololma khulondekhana khu lisimukha lya kristo, ndi shiyalekhwa mushatisi, inoho muvili kwekwe shu kwakundila mushilindwa tawe. ³² yesu uyu, nyasaye yamwisimukhtsa, na khandi khutse voosi khuli valolekhitsi veve. ³³ khu lwa yako naye umali khuchingulwa nu khwikhalitsa khu luveka lu mukhono mulunji kwa nyasaye, naye shichila anyoli shihanwa shya roho mutakatifu shya tata yalaka, akhutsukhile ya kamulolanga khandi nukhuhulila. ³⁴ shichila daudi shiyanina natsia mwikulu, navutsa avoolanga, 'mwami yavolela mwami wanje, ''yikhala khu mukhono kwanje mulunji ³⁵ khutukha lwanomba vaziku vova khuva shisako shivilenje vyovyo.''' ³⁶ khu lwa yako, katukhane visiraeli vosi vamanye ndi, nyasaye umali khumukhola mwami khandi kristo, yesu wamwavamba uyu.'' ³⁷ na lwa vahulila yaka, vahulila khuli shindu shivaroza mu miyo chavo, navo vareva petero na varumwa vandi, ''vamwavo, khukhole shina?'' ³⁸ petero yavavolela, ''mwikanile mubatiswe, shya mulala wenyu, mulira lya yesu kristo, mutukhe khulekhelwa vwoni vwenyu, na mulanyola shihanwa shya roho mutakatifu. ³⁹ shichila nyasaye yalaka shihanwa yishi khumunye, nu khu vana venyu, na voosi vali ihale, va nyasaye aliitsa khulanga vitse khuye.'' ⁴⁰ na makhuva kandi manyikhi,yalolekhitsa khandi navatinyilitsa, khandi navavolela, '' mwihonyinyinye khurula khu likhula lishamu yili.'' ⁴¹ navo yavo viyema likhuva lyelye ni vasuuvila vabatiswa, khandi litukhu lyenelo vametekha himbi vandu tsielefu tsivaka. ⁴² khandi virulitsa khuhulikhitsa mekitso ka varumwa, nivakaana halala, nukhumeka mukati khandi nu mulisaala. ⁴³ varumwa vakhola vindu vinyikhi vyukhuchenyinya khandi nivilolekhitso na vuri vwiza khu vandu vosi. ⁴⁴ na vandu vosi vali nivasuuvile vikhala halala khandi vakavulana vindu vya vali navyo shilala, ⁴⁵ khandi vakulitsa vindu vya vali navyo,nivakavulanyinya hakari havo khulondekhana ni lyenya lya shavuli mulala wavo yali nalyo. ⁴⁶ khandi matukhu kosi vahonganga mu litempeli, nu mwoyo mulala. khandi vamekanga mukati mutsingo tsyavo, khandi vakavulananga shukhulia shavo nuvusangali nu mwoyo mulayi, ⁴⁷ vitsominya nyasaye khandi nivavuchililwa khu vandu vosi, na shavuli litukhu nyasaye yametanga vandu vahonyinywangwa.