¹ Ki yaak eng' betusiek che ki rwoochi kiruogik kole biitu rubeet eng' emet, ak ki nyo chi ne bo Bethlehem eng' Juda kwo komeny emetab Moab koboto osotiondenyi ak werikyi aeng'. ² Kainetab chichoto ko Elimelek, ak ne bo osotiondenyi ko ki Naomi. Kainaigab werikyi ko ki Malon ak Kilion, che icheket ko Epratik kobun Bethlehem eng' Juda. Ki it emetab Moab ak kotebee oloto. ³ Ak kime Elimelek manong'otiotab Naomi ak ki ng'et ak werikyi aeng'. ⁴ Ki tun werichoto osotik eng' kwonyigab Moab; ne kainetab age ko ki Orpa, ak kainetab age ko ki Ruth. Kimeny oloto olo bo kenyisiek taman. ⁵ Ki bek ak iche Malon ak Kilion, ak king'et Naomi inegee ama legukyi aeng' anan manong'otiondenyi. ⁶ Ki ng'eet inendet anyun koboto kwonyiigab werikyi komache kowektagee eng' emetab Moab, amu kiga kogas komi emetab Moab kole ki koruutochi Kamuktaindet ne Toror biikyi ak kogochi amitwogik. ⁷ Ki wo eng' komosta ne kimi ak osotigab werikyi aeng', ak koba bandang'wai koweektagee emetab Juda. ⁸ Kilej Naomi osotichoto aeng' bo werikyi, "Ngoweektagee, chi tugul, gootab kamenyi. Ngo yaiywook ne mie Kamuktaindet ne Toror, ko u ye kioyachi ne mie che kikobek ak oyaiywo. ⁹ Ngogoonak Kamuktaindet ne Toror onyoru kalyet, konyor age tugul eng' akwe eng' gootab monong'otiondenyi." Ki ng'utuut icheket, ak kowakyo ak koriryo. ¹⁰ Koleji icheket inendet, "Achicha, kiweksei kebendi tugul ole mi biiguk." ¹¹ Ago kileji Naomi, "Obechigee, tibiikyu! Amu ne si kebe tugul?Ta asiche werik alak che imuchi koek manong'otaikwok? ¹² Oba, tibiikyu, obechigee amu kwaositu ma ketuno. Mbo nda abwat ane ale takomi kamang'unet,' ak asich manong'otiot kemouni ak anyoru weriik, ¹³ ko tos ogany kot koechegitu? Tos otebi komakitunok? Achicha, tibiikyu! Ki kong'wanit miising' eng' ane kosiirok amu ki konyalila Kamuktaindet ne Toror." ¹⁴ Ki testai kowookyo icheket ak koriryo. King'utut Orpa korgenyi bo igoi ak kosaiseret, ko ki nam Ruth ak komeitochi. ¹⁵ Koleji Naomi Ruth, "Geero, kagowektage kwondab bamurtang'ung' kwo ole mi bikyi ak kamuktaindenyi. Wektegee aginye rup ne bo bamurtang'ung'." ¹⁶ Ago ki wolji Ruth koleji, "Amegimjo ile abagachin, nda ile awektage matikebe tuwai, au ole iwendi, awendi; ak ole itebe, atebe agane; egu biiguk bikyu, ak egu Kamuktaindeng'ung' Kamuktaindenyu. ¹⁷ Ole imechini amechini, ak ketupchino yoto. Ngoyaiywo Kamuktaindet ne Toror ko u noto, ak kotes kosiir, kobate meet inegee ne ibesiech ane ak inye." ¹⁸ Kingo geer Naomi kole kigakobekchi Ruth koba tuwai, ko mata komwachi kiy inendet. ¹⁹ Ki ba anyun tuwai ko koit Bethlehem. Kingo it Bethlehem, komong' nganaset komugul eng' boiboiyet amu icheket. Kole kwonyik, "Tos Naomi nito?" ²⁰ Koleji inendet icheket, "Mogureno Naomi(chebaibai). Ogureno Mara(chepnerekya), amu kiyaiywo inendet ne bo kamuktaet kito ne ng'waan. ²¹ Ki awendi anyitaat, ak kogomutwa Kamuktaindet ne Toror ami buch.Amu ne soogureno Naomi, ogere kole kibaorian Kamuktaindet ne Toror kogikyo ak konyalila inendet ne bo kamuktaet?" ²² Ki wechge anyun Naomi eng' emetab Moab koboto Ruth cheptab Moab osotiotab werinyi. Ki it Bethlehem ko katoyge kesisyetab baale.