¹ Eng taunet ko kimi ngolyot ak kimi ngolyot ak Jehova, ak ki Jehovah ngolyot. ² Kimi inendet ak Jehovah eng taunet. ³ Kikiyai tukuk tukul eng inendet, ak kimakiyai kiy age tugul ne kiga keyai ne kima yai inendet. ⁴ Kimi sobondo eng inendet; ak ki lapkeiyetab bik sobonoto. ⁵ Ak iluu lapkeiyet ing mesundeito; ak kima iterter mesunteito labkeiyonoto. ⁶ Kinyo chi, ni kiyook Jehovah, ni kigiguure Johana. ⁷ Kinyo chichoto koek baoriat, si kobaorianji labkeiyet, si kobit koyan bik tugul amu inendet. ⁸ Kima ko lapkeiyonoto inendet, kobate kinyo si kobaorianji lapkeiyonoto. ⁹ Kimi lapkeiyet ni bo iman ni nyoni ngweny, ni kwengjini chi tugul. ¹⁰ Kimi ngweny inendet, ak kikiyai ngweny ing inendet ak kima nai ngweny inendet. ¹¹ Kinyonji chechi ak kimataach inendet bichoto chii. ¹² Ako tugul chi kitaach inendet, ko kiikochi kamuget koek lagokab Jehovah, choto che iyani kainenyi. ¹³ Icheget che kikisich, ama eng korotik anan eng magetab chi, ako eng magetab Jehovah. ¹⁴ Ak kiek ngolyot borto, ak komeny kwenunyo ak kikiger torornatenyi, torornatet ne bo ne kigisich inegei kobun Kwanda, ne nyitat miendo ak imanda. ¹⁵ Kibaorianji inendet Johana ak kokurso kole, inendet ni, nekiamwoitoi ale, inendet ne rubko ko egu nebo tai eng ane, amu kibo tai inendet eng ane. ¹⁶ Amu kigitaach aje tugul che bo nyienyi, ak miendo eng mieindo. ¹⁷ Amu kikigon ngatutiet eng Musa, ako kibwa miendo ak imanda eng Jeiso Kristo. ¹⁸ Mami chi ne kikogeer Jehovah kongete, kobate kikongangwech inendet werit ne kigisich inegei ne mi teget ab Kwanda. ¹⁹ Ak ni kotigonetab Johana, ye kingoyok Yahutik tisiik ak Lawik kobwa kongete Jerusalem si kotebe Johana kolenji, "i ngo inye''? ²⁰ Ako kingong Johana amatiiyo kole inendet ko ma Kristo. ²¹ Ak kitebe kolenji nee anyun? Elijah? ak kile, ma inendet. I maotiontonoto? ak kile, "achicha". ²² Ak kilenji anyun inendet, i ngo inye? si kobit keibchi wolunet icheget che kaiyokwech. Imwae ile i ngo inyendet?. ²³ Ak kile a kutitab chi ne kursei eng surkwen, olitit oretab Kiptaiyat kou ye kimwa maotiot Isaiah. ²⁴ Ak icheget che kikagiyok ko bo parisaik, ²⁵ Ako kitebe icheget inendet kolenji, "Kalya si batisianisiei ama i Kristo, anan Elijah, anan maotiondonoto?" ²⁶ Kowolji Johana bichoto kolenji, abatisianisie beek ago tononi eng kwenungwong age ne monget. ²⁷ Inendet ne rubwo ko chamat kondo amanyoljina atiach anokab kweonikyi. ²⁸ Kiyaogis tuguchuto eng Betania, Jordan komosin ole kibatisanisie Johana. ²⁹ Eng betut ne kirube, kogeer Johana Jeiso konyonjini, ak kole, ogeero Aruet ne bo Jehovah ne ibei tengektab ngweny, ³⁰ Inendet ni ne kiamwa ole rupwo chito ne egu ne tai eng ane amu kibo tai eng ane. ³¹ Kima anget ane inendet, ago si kobit kibarta inendet eng Israel, anyo anyun amu noto abatisianisie beeko. ³² Ak kibaorian Johana kole, kiageer tamirmiriet kochoruge eng Kipsengwet kou cheptuget, ak kotebe inendet. ³³ Kima anget inendet ago inendet ne kiyokwa abatisane beeko, ko inendet ne kimwaiwa kplenja, chichoto igeere kochorchinige Tamirmiriet ak kotebe, Konoto ne ibatisane Tamirmiriet ne Tilil. ³⁴ Ak kiageer, ak abaorian ale nito ko weritab Jehovah. ³⁵ Kogeny eng betut ne kirube ko kitononi Johana ak alak aeng che bo alamalienyi. ³⁶ Ak ye kingogeer Jeiso kowendoti, kole, "ogeero, aruet ne bo Jehovah!" ³⁷ Kogas alamalaichoto aeng kongalali ak korup Jeiso. ³⁸ Ak kikusgong Jeiso ak kogeer icheget korupu, ak kole ochenge nee? ak kiwolji kolenji Rabbi ( ye kiwech ko konetindet) imenye ano? ³⁹ Kolenji icheget, obwa si ogeer. kibwa anyun kogeer ole menyei, ak kotebi ak inendet betunoto. Ki olobo sait taman. ⁴⁰ Agenge eng aeng ne kigas Johana kongalali ak korup inendet, ko ki Andrea ne tupcho ak Simon Petero. ⁴¹ Kisib konyor Simon ne tupcho tuwai, ak koleji inendet kagenyoru Mesia ( yekiwech ko Kristo). ⁴² Kiimutyi inendet Jeiso ak kigeer Jeiso inendet, ak koleji i Simon weritab Johana, takegurenen Kepa "( yekiwech ko Petero)". ⁴³ Kimach anyun Jeiso kwo Galili eng betut ne kirube, ak kinyor Pilipu ak koleji "isubwa." ⁴⁴ Kibo pilipu Betsaida, nganasetab Andrea ak Petero. ⁴⁵ Kinyor Pilipu Natanael ak koleji, kagenyoru inendet ne kisir Musa eng Ngatutiet ak maotik, Jeiso ne bo Nasaret, weritab Joseph. ⁴⁶ Ak koleji Natanael inendet, tos imuchi kiy age tugul ne mie kobun Nasaret? Koleji Pilipu inendet, nyo si igerjige. ⁴⁷ Kigeer Jeiso Natanael konyonjini inendet, ak kole, "ogeer o, Israelindet iman, matinyei ng'alset." ⁴⁸ Koleji Nataniel inendet, kenaena nee?, kowolji Jeiso koleji, ye katom kogurin Pilipu ye kemi Mokoiywet kel, ko kageerin. ⁴⁹ Kowolji Natanael koleji, Rabbi, i weritab Jehovah, i laitoriatab Israel? ⁵⁰ Kowolji Jeiso koleji, iyani amu kamwaun ale, kaagerin ye kemi mogoiwet kel?, tatun igeere tuguk che echen che sirei chu. ⁵¹ Ak kimwachi inendet kolechi, amwaun iman iman ale, tatun ogeere kipsengwet koyatoksei ak kotogostoi Malaikaisiek ab Jehovah ak kochorjige weritab chi.