¹ Amu kigonde eunekwai che Chang kotet ngalek akobo tukuchoto kikosulda eng kwenunnyo, ² ko u yo kigogonech , che kii baorinik che kigeer kong'ngete taunet ak che kii kiboitinik chebo ng'olyot. ³ kiageer agine ale , kararan atetun eng siret ko kaanai agine ole kibitunda tuguk tugul kong'etee taunet ,wei inye ne itoogunot Teopilo, ⁴ asi kobiit inai eng iman ng'alechoto kiginetin. ⁵ kimi eng betusikab herod , laitoriatab judea tisiindet age ne kigiguure sakaria ne bo oretab Abija , ak kitinye chepyoset ne kibo oretab Aron; ⁶ ak kigiguree kainenyi Lisabet. Ak kibo iman icheket tuwai eng taitab Jehova, kibendote ng'atutik tugul ak tetutik chebo kiptayat, ama tinye lelut. ⁷ Ak kima tinye lakwa amu Lisabet ne ki soon ak kia ko osegitu tuwai. ⁸ Ak yo kita koyaei boisietab tisisiet eng taitab Jehova kou tetutikab ripsenyi. ⁹ Ko u ateptab boisitab tisisio; ko kigikwei inendet kwo kapkorosutab Kiptayat kobeel korosek. ¹⁰ Ak kimi sang tuiyet komugul ne bo biko kosae eng sait ne kibelee nyamdutik. ¹¹ Ak kimongji Malaikaiyatab kiptaiyat kotononi komastab tai ne bo kapkorosut ne kigibelee nyamdutik . ¹² Ak kingogeer Sakaria koimge ak kochut inendet nyokoriet. ¹³ Ago kileji malaikaiyat inendet amaiyweisie Sakaria , amu kagegosun somengung ak kosigun chepyosengung Lisabet werit ak iguure kainenyi Johana. ¹⁴ Ak inyoru boiboiyet ak kagasetabge ak boiboitu biko che chang eng sigenyi. ¹⁵ Amu tun egu ne o eng taitab Kiptaiyat, ama eei divaik nda ko maiywek, ago kinyiiti Tamirmiryet ne Tilil, kong'etee komi moetab kamet. ¹⁶ Ak wekchinige legukab Israel che chang Kiptayat Jehovah nying'wai. ¹⁷ Ak kowendot eng taitab togennyi eng tamirmiryet ak kimnatetab Elija asi kowaal mugulelwek che bo kwanisiek kotokchige lleguk ak kowaal ngelelik asi kobendat eng ng'omnatetab chebo iman asi kochochi Kiptaiyat biko che chobotin agobo inendet. ¹⁸ Ak kileji Sakaria Malaikaiyat anae nee ng'olyondenito? amu kiaositu ak kigotar kenyisiek che chang chepyosenyu. ¹⁹ Ak kiwolji malaikayat kole , aii Gabriel ne atononi eng taitab Jehovah Kagiyokwo ang'alalun ak aibun logoiwechu kororon. ²⁰ Ak keer anyun, namoksen kut amemuchi ing'alaal agoi tun betut ne bitu ng'alechu amu maiyan nag'alekchu che tun isuldoi eng betung'wai ne chamat. ²¹ Ak kiigany biko Sakaria kotokwong'io amu kenge eng kapkorosut. ²² Ak ye kingomong sang koma komuji kong'alalji icheget ak kinai icheget kole imuchi kagogeer kaborunet ne bo kwong'ut eng kapkorosut ak king'alajine bichoto eut ak konget ko namat kut. ²³ Ak yo kingakotar betusiekkab otisiennyi kowejigei gaa. ²⁴ Ak kingobata betusiechoto komanach chepyosenyi Lisabet ak kiunyge arawek mut ak komwa kolw, ²⁵ koyaiwa kou nyito Kiptaiyat eng betusiek che kinaana asi koistoeno sosisiet ne tigeno biko. ²⁶ Ak arawetab lo kookto Jehovah malaikayat Gabriel kwo kokwet ne o ne bo Galili ni kiguure Nasaret, ²⁷ kwo oritab chepto bergeiyat ne kiga kechamji murenet age ne kiguure Josep ne bo oretab Daudi ak kigiguure bergeiyandonoto Maria. ²⁸ Ak kicho ole mi cheboto ak kileji chamge inye ne ichamat mising mi Kiptaiyat akinye. ²⁹ Ago kiimge mising inendet eng ngallalenoto ak kibwat kole, egu nee kogatisioni? ³⁰ Ak kileji malaikaiyat inendet , ameiywei Maria , amu kainyoru chamet eng Jehovah . ³¹ Ak geer anyun imanachii ak tun isiche werit ne kiguure kainennyi Jeiso. ³² Egu ne o ak tun keguure weritab inendet ne toroor mising, ak kogochini kiptaiyat jehovah ng'echeretab laitornatet ne bo kwaninnyi Daudi. ³³ Ak tun laitorani eng gotab Jacobo koigeny , ama tinnye ole begune bounatennyi. ³⁴ Ak kileji Maria malaikayat egundoi ano ng'olyoni ko u nee, ako mangen muren? ³⁵ ak kiwolji malaikayat koleji chonjinin Tamirmiryet ne Tilil ak kotuchin kimnatetab inendet ne toror mising , nyoto anyun ne kiguree ne Tilil, weritab Jehovah inendet ne tun kisiche. ³⁶ Ak keer anyun , managat aine Lisabet tupcheng'ung , ak tun siche werit eng osindonnyi. Ni ko arawet ne bo lo eng inendet ne kigiguure sonet. ³⁷ Amu ma mi kiy ne maimugoksei eng' Jehovah." ³⁸ Ak kileji Maria geer anyun ai chepto kiboitiot nebo Kiptaiyat . Ak ngo yaak kosupke ak ng'olyondeng'ung . Ak kiwo malaikayat kobagakta inendet. ³⁹ Kitonon anyun Maria eng betusiechoto kwo kochakta emetab tulonok , agoi emetab Judea. ⁴⁰ Ak kichut gotab Sakaria ak kogaat Lisabet. ⁴¹ ak kingogas Lisabet kagatetab Maria akobiren chereret eng moet ak kiinyi tamiririet ne Tilil Lisabet. ⁴² Ak king'alal eng kutit ne o kole iberurot inye eng chepyosok tugul ak iberurot iendet ne isiche. ⁴³ Kakikonyito ane ne tia koto cho kametab kiptayandennyu? ⁴⁴ amu keero kingoit kagatisiet itik chu, kobiren chereret eng moennyu eng boiboiyet ne o. ⁴⁵ Ak baibai chepyosonoto iyani amu tun kiotitoi tuguk che kigemwachi inendet che bunu Kiptaiyat. ⁴⁶ ak kile Maria , ilosu sobondannyu Kiptaiyat, ⁴⁷ ak kigasge tamirmiriennyu eng Jehovah Kiptaiyandennyu. ⁴⁸ Amu kigeer nyalulnatetab kiboitiondennyi ne chepto amu ogeer anyun kong'etee rani kokurno ibinwek tugul ne iberurot. ⁴⁹ Amu kagoeiwa inendet ne tinye kamuktaet tuguk che echen , ak tilil kainennyi. ⁵⁰ ak nyoru nyoetab gaat icheget che konyiti inendet kong'ete ibindo age agoi age. ⁵¹ Kigobor kimnatet eng eunnyi, ak kiyesta che menyotin eng kabwatutikab mugulelwekwai. ⁵² Kigowir ngweny bounik eng ng'echerokwai, ak kagosor che nyorotin. ⁵³ Kagobai che amei rubet tuguk che kororon, ak kagoon makorek koba buch. ⁵⁴ Kagotoret kiboitiondennyi Israel , asi konam rirenetabge. ⁵⁵ Ko u ye king'alalji kwanisiekcho eng Abraam ak iyotennyi agoi koigeny . ⁵⁶ Ak kimeng'iis ak Maria Lisabet arawek che legit somok ak koweektage kwo gaa. ⁵⁷ Ago kiit anyun betut ne sigisie Lisabet kosich werit. ⁵⁸ Ak kigas bikab orennyi ak kokwet kole kakotesyi kiptaiyat kaberuret kwonyoto ak kibaibait koboto inendet. ⁵⁹ Ak kingoit betut ne bo sisiit kobwa icheget kimuratan lakwet. Ago kimache koguure Sakaria kosubge ak kainetab kwandannyi. ⁶⁰ Ak kiwol kamet ole , ololo, kiguure Johana . ⁶¹ Ak kileji icheket inendet , mami chi eng orengwong ne keguure kainanato . ⁶² King'alajige icheget eng eunek ak kwanitab lekwet kotebee kainet ne mache kemunchi. ⁶³ Kisom kito ne kisire ak kosir kole Johana kainennyi, ak kikwong'io tugul . ⁶⁴ Koyatak anyun kutinnyi eng kasarta noto ak kotiag ng'elyeptanyi ak kong'alal kolos Jehovah. ⁶⁵ Ak kichut icheget nyogoryet tugul che kimen'ikab komosechoto ak kigimwaita ngalek chuto tugul eng emetab tulondok che bo Judea. ⁶⁶ kinde mugulelwekwai icheget tugul che kigas ng'alechu , tos eegu lekwa ne u nee nyito? Amu kimi koboto inendet eutab kiptaiyat. ⁶⁷ Ak kinyi inendet kwandannyi Sakaria Tamirmiryet ne Tilil ak kimaoten kole, ⁶⁸ iberurot Kiptaiyat Jehovah ne bo Israel amu kirutochech ak kosoor bikchi. ⁶⁹ Kago kutwech ryambutab sarunet eng gotab Daudi kiboitiondennyi, ⁷⁰ ko u ye kimwa eng kutuswekab maotickchi che tililen che kimi kong'ete eng keny, ⁷¹ asi kosorwech eng bunikcho ak eng eunekab tugul che saseech. ⁷² Asi korire kwanisiekcho, ak konaam kayamisennyi ne tilil, ⁷³ murtoetab ne kibokokchi kwandannyo Abram. ⁷⁴ asi komuch kogoneech ko kagosorwech eng eunekab bunikcho keboiechi inendet ama eng nyokoret, ⁷⁵ eng imanda ak tililindo eng taitannyi eng betusiekcho tugul. ⁷⁶ Wei lakwani kiguuren maotiotab inendet ne toror ne bo iman , amu iwendi eng taitab kiptaiyat indoo asi imuch ichob ortinwekab chi, ⁷⁷ asi kogochi bikchi naet ne bo sarunet eng nyoetab kaat nebo tengekwogikwai. ⁷⁸ Amu eng rirenosiekab Jehovah nenyo, si kochojech lapkeiyet ne bunu barak , ⁷⁹ si koluuchi icheget che teptos eng tuindo ak che mi urwetab meet si kondochi kelyekcho kotoit oretab kalyet. ⁸⁰ Ak kiet lekwanato ak kinyor kimantet eng Tamirmiriet , kimeng'ot tumoo agoi betut ne kiborjige Israel.