¹ Ak kimi kaniset ne kimi Antiokia, maotik ak konetik, Barnaba, ak Simion ne kigiguure Niger, ak Lukio ne bo Kurene, ak Manaen ne ne kigigui koboto kiruogindet Herod, ak Saul. ² Ak kiboisiechin Kiptaiyat ak korugutegei, kole Tamirmiriet ne Tilil, Otabanwa Barnaba ak Saul agobo boisiet ne kiaguurji. ³ Ak ye kingo kagorugutgei ak kosaei ak kogonoor ichek eunekwai, koyokto koba. ⁴ Ak kingo kagoyokto ichek Tamirmiriet ne Tilil, kochorjigei Seleukia; ak kiba eng' oloto kobun melit agoi Kupro. ⁵ Ak ye kimitei Salamis, koamda ng'olyotab Jehovah eng' sunagogisiekab Yahudik: ak kimi koboto Johana ne kiboisiechinoti. ⁶ Ak kingo kagobun emet komugul ne kiikwen beek agoi koit Papos, konyorji oloto bonin, maotio ne bo lembech, ne Yahudiot, ne kigiguure Bar-Jeiso. ⁷ Ne kimi koboto bounindet, Sergio Paulos, chito ne ng'om. Kiguur chichito Barnaba ak Saul koba ole mi inendet, ak kimachei kogas ng'olyotab Jehovah. ⁸ Ago kigirinda ichek Bluma ng'orindet (amu u noto kainennyi ye kiweech), kigirinda bounindonoto, kocheng'ei komaas kole si manyor kayanet. ⁹ Ago kinyi Tamirmiriet ne Tilil Saul, ne kiguure Paulo, ak kiichiilji kong', ¹⁰ ak kole, Ee inye ne nyiitat ng'alset tugul ak ng'omnatet tugul ne bo kabeetet, inye weritab oindet, inye bunyotab imanda tugul, mebagaktoi imaas ortinwek che lititen che bo Kiptaiyat? ¹¹ Ak keer nguno anyun-o, mi eutab Kiptaiyat baragung'ung', ak iegu kipkoratia, si mata igeer asista eng' betusiek alak. Ak kiibutyi ngunoto mirmirindo ak mesundeito; ak kiwendot kocheng'at bik che namoti inendet eut. ¹² Kingogeer anyun bounindet kit ne kayaak, koyan, kokwong' agobo konetisietab Kiptaiyat. ¹³ Kiba anyun Paulo ak che kimi koboto inendet kobun melit eng' Papos, ak koit Perga eng' Pampulia; ak kiwa Johana koweektagei Jerusalem kobagakta ichek. ¹⁴ Ak kingobun ichek Perga, koit Antiokia ne bo Pisidia; ak kiba sunagogit eng' betutab sabato, ak koteb ng'weny. ¹⁵ Ak kingobata somanetab Ng'atutiet ak sirutikab maotik, koyokto bounikab sunagogit bik koba ole mi ichek, koleji, Che kitupche, ngotinye ng'olyo age tugul ne imuchi kotoret bichu, omwa. ¹⁶ Kotonon anyun Paulo ak koborjine eut, kole, Ogaso akwek bikab Israel, ak akwe che oiywei Jehovah. ¹⁷ Kilewen Jehovah ne bo bichu Israel kwanisiekyo, ak kotoror bichoto ye ki bunotik eng' emetab Misri, ak kiimut ichek komong' eng' eut ne kim. ¹⁸ Ak kimuitochi ichek eng' atebosiekwai eng' olo bo kenyisiek artam eng' ong'atet. ¹⁹ Ak kingo kagong'em bororiosiek tisab eng' emetab Kanan, kogochi ichek emeng'wai koek borotet, eng' olo bo kenyisiek bogol ang'wan ak konam. ²⁰ Ak kingobata tuguchu, kogochi ichek kiruogik agoi Samuel maotiot. ²¹ Ak kingobata kosom laitoriat: ak kiigochi Jehovah ichek Saul weritab Kis eng' kenyisiek artam, chito ne bo oretab Benjamin. ²² Ak kingo kagoisto inendet, kong'eetyi Daudi koek laitoriandeng'wai; ne kibaorianji agine kole, Kaanyoru Daudi weritab Jesii, chito ne iboiboi muguleldanyu, ne tun yaei magutikyu tugul. ²³ Ak kiimutyi Jehovah Israel Yetindet, Jeiso, eng' keswekab chichito, ko u arorutiet. ²⁴ Ye kiga sib koamji Johana bik tugul che bo Israel, kabatisanet ne bo sigunet, ye kitomo konyo inendet. ²⁵ Ak ki legit koges Johana bandanyi, komwa kole, Olen ai ng'o? Ma i inendet. Ago ogeer anyun, isubwa age, ne manyoljina atiakyi kweonikab kelyekyi. ²⁶ Che kitupche, lagokab keswek che bo Abraham, ak alak che mi kwenung'wong' che iywei Jehovah, kagiyokwech achek ng'olyondoni bo yetunet. ²⁷ Ichek che menyei Jerusalem, koboto bounikwai, amu kima nai inendet, anan kutuswekab maotik che kisomani eng' sabato age tugul, kosuldae kutuswechoto kiruoget ne kiiruokyi inendet. ²⁸ Ak nganda kimanyor eng' inendet ng'olyot ne igochin kome, ago kisom ichek Pilato kole, kebar inendet. ²⁹ Ak ye kingo kagoges tuguk tugul che kiga kisir agobo inendet eng' ketit, ak konde kererit. ³⁰ Ago kiing'et Jehovah inendet komong' eng' che kibek: ³¹ Ak kigeer inendet eng' betusiek che chang' ichek che kitogosu koboto inendet kobunu Galili kobkoni Jerusalem, che nguno ko baorinik eng' bik. ³² Ak kiibwok logoiywek che miach che bo arorutiet, ne kigigochi kwanisiekyo, ³³ ko u ye kigosuldochi Jehovah lagokyo noto, amu kiing'eet Jesu; ko u ye sirat eng' Tiendab Kalosunet ne bo aeng', kole, I Werinnyu, kaasichin rani. ³⁴ Ak ko ye kiing'eet inendet eng' che kibek, ma koweekyingei anyun inendet kogeny nunet, kimwa ko u ni, kole, Tun agonin kaberuroik che tililen, ak ko bo iman, che bo Daudi. ³⁵ Amu kimwa agine eng' Tiendo age kole, Matun igochini neng'ung' Ne Tilil kogeer nunet. ³⁶ Amu ye kingo kagoboisiechi Daudi kiruogutikab Jehovah eng' ibindanyi, konuuch, ak kigitub koboto kwanisiekyi, ak kogeer nunet. ³⁷ Ago mager nunet inendet ne kiing'eet Jehovah. ³⁸ Ingonaak anyun eng' akwek, che kitupche, kele, kimwawok eng' chichi nyoetab kaat ne bo tengekwogik. ³⁹ Ak kiityin imanda eng' inendet age tugul ne iyani, eng' tuguk tugul, che koma komuchi koiityok imanda Ng'atutietab Musa. ⁴⁰ Oripge anyun si manyonjok ne kigimwa eng' maotik; kele, ⁴¹ Ogeer anyun, akwek sasik, okwong'ie, ak olusye; Amu ayae boisiet eng' betusiekwok, Boisiet ne magoi oyan matiny, agot ngo mwawok chi. ⁴² Ak kingota komandoi ichek, kosom kole, tun ko ta koamji ichek ng'alechoto eng' ne nyonei. ⁴³ Ak kingo kagomanda tuiyet eng' sunagogit, kosub Paulo ak Barnaba che chang' che bo Yahudik ak che konyiti Jehovah che kiwalak kobunji Yahudik: ye kingong'alaljin ichek, kogiil kole koba tai eng' mieindab Jehovah. ⁴⁴ Ak eng' sabato ne isubi noto, koyumgei nganaset che legit tugul kole kogas ng'olyotab Jehovah. ⁴⁵ Ago ye kingogeer Yahudik tuiyosiek, koam ng'et kong', ak koesio eng' kimnatet ng'alek che kimwaei Paulo, ak komwa ng'alek che yaachen kochubis. ⁴⁶ Kong'alal anyun Paulo ak Barnaba eng' nyiganatet, kolen, Konyolu kemwawok korok ng'olyotab Jehovah. Amu ogirindoi, ak oruokyinige akwege ole manyolu onyoru sobondab koigeny, ogeer anyun, kagibe oldab Bororiosiek. ⁴⁷ Amu king'atech Kiptaiyat ko u noto, kole, Kaandein iegu lapkeiyet ne bo Bororiosiek, Si kobiit iegu yetunet agoi tabandab ng'weny. ⁴⁸ Ak kingogas Bororiosiek ng'olyondonito, koboiboitu, ak kogonyit ng'olyotab Jehovah; ak koyan tugul che kiga kelewenji sobondab koigeny. ⁴⁹ Ak kiyom ng'olyotab Kiptaiyat koronoto tugul. ⁵⁰ Ago kiinde Yahudik ng'alekab chaamset che konyiti Jehovah ak ko toogunotin, ak bik che eechen eng' nganaset, ak kong'eet usisiet kous Paulo ak Barnaba ak koon komanda eng' kiwotosiekwai. ⁵¹ Ago kilelekyi ichek temburek che mi kelyekwai, ak kiit ikonio. ⁵² Ak kinyi alamalyet boiboindo ak Tamirmiriet ne Tilil.