¹ Ak ye ki legite betusiechoto kotoi laitoriat Herod kous alak che bo kaniset. ² Ak kibar eng' rotwetab chok Jakobo ne tupchetab Johana. ³ Ak ye kingogeer kole kiibaibai noto Yahudik, kotoi konam Petero agine. Ak ki betusiekab makatiat ne ma kinde mermerek , betusiechoto. ⁴ Ak kingo kagonam inendet, konde korgoret: ak kogochi askarik ang'wan konyil ang'wan korib inendet; kolen ye ibata Pasaka komutyi bik. ⁵ Kigirib Petero anyun eng' korgoret: ago kisa kaniset Jehovah mising' agobo inendet. ⁶ Ak ye kimachei komoong' Herod inendet, ko kirue Petero kwenutab askarik aeng' eng' kemounoto, koratate sirimwek aeng': ak kirib korgoret ribik eng' taitab kurget. ⁷ Ak ogeer anyun, kitonon malaikaiyatab Kiptaiyat eng' ye legite inendet, ak kiikweny lapkeiyet got: ak kiirabach karastab Petero, ak kong'eet koleji, Ng'eet chokyi. Ak kiibutyo sirimwek che kimi eunekyi. ⁸ Ak koleji malaikaiyat inendet, Ratge, indege kweoniguk ak irat. Ak kiyai ko u noto. Ak kileji, Ilaach ngorieng'ung' ak isubwa. ⁹ Ak kiwa sang' ak kosub; ak kima nai kole iman kit ne kayai malaikaiyat, ago kilen kageer ng'ang'utiet. ¹⁰ Ak kingo kagosiir ripset ne bo tai ak ne bo aeng', kobka agoi kiratut ne bo karnet ne kibunei kebendi nganaset; koyatak inegei: ak kimanda sang', ak koba kobun oret agenge; ak eng' sainoto kobagakta inendet malaikaiyat kwo. ¹¹ Ak ye kingobwat Petero, komwa kole, Kaanai nguno iman, ale, kagoyok Kiptaiyat malaikaiyandennyi ak kasorua eng' eutab Herod, ak eng' kagenisiet tugul ne bo bikab Yahudik. ¹² Ak ye kingo kagobwat komie, konyo gotab Maria kametab Johana ne kiguure kainennyi ne bo aeng' Mariko; ole kiga koyumjigei che chang' ak kosaei. ¹³ Ak ye kingogongony kurgetab kiratut, konyo chepto ne kigiguure Roda kogas. ¹⁴ Ak kingonai cheboto kutitab Petero, koma koyat kiratut amu boiboiyet, ago kilabat go, ak komwaita kole tononi Petero eng' kiratut. ¹⁵ Ak kileji ichek inendet, Amin iywek. Ago kimwa eng' kimnatet kole, u noto. Ak kimwa ichek kole, Malaikaiyandennyi. ¹⁶ Ago kites Petero kogongony: ak kingo kagoyat, kogeer inendet, ak kokwong'io. ¹⁷ Ago kiiborjine ichek eut kosisyo, ak kotetyi ole kagomutunda Kiptaiyat inendet komong' eng' korgoret. Ak kimwa kole, Omwachi ng'alechu Jakobo, ak tupchosiek. Ak kiwa agoi komosta age. ¹⁸ Ak kingo kagoech, kotoptobenso askarik mising', kole, katepto ano Petero. ¹⁹ Ak ye kingo kagocheng' Herod inendet, ama konyor, kogin ribik, ak kong'at kole kanyol kebar. Ak kichortagei eng' Judea ak kwo Kaisaria, ak kotebe oloto. ²⁰ Ak kinerekyi mising' Herod bikab Turo ak Sidon: ak kobwanji inendet eng' kabwatet agenge, ak, Kingonam chorua ak Blasto, ne kiribei ole kirue laitoriat, kosom kalyet, amu kibaei emetab laitaoriat emeng'wai. ²¹ Ak eng' betut ne kiging'at, kolaach Herod ngoroikab laitornatet, ak kotebe ng'echeratab kiruoget, ak kong'alalji bichoto. ²² Ak kibolyo bik, kole, Kutitab cheptalelit nito, ma bo chi. ²³ Eng' sainoto anyun kobir inendet malaikaiyatab Kiptaiyat, amu ma konyit Jehovah: ak kiam inendet kutik, ak kime. ²⁴ Ago kiner ng'olyotab Jehovah, ak kotesak. ²⁵ Kiweektagei Barnaba ak Saul Jerusalem, ye kingo kagoges boisieng'wai, komuti Johana, ne ki kainennyi ne bo aeng' ko Mariko.