¹ Uu ugunulo wa Jesu Masihi ambao MUlungu wenipa ili kuvaonyesa ahumikive mambo ambago lazima gakale vivi hehi. Wegahenda gamanyikane kpa kumuhuma malaikawe kpa muhumikiwe Johana. ² Johana weomboza ushuhuda wa chila chitu ambacho wechona kuhusiana na neno ra Mulungu na kpa ushuhuda urioombozwa kumuhusu Jesu Masihi. ³ Yudzihaswa iye asomaye kpa sauti na varatu vosi vagasikirao maneno ga ulombi uu na kutii chirichoandikpa mumu, kpa sababu wakati udzifikahehi. ⁴ Johana, kpa makanisa mafungahe garigo Asia: neema ikale kpenu na amani kula kpakpe ariyeho, ariyekalako, na andiyekudza, na kula kpa roho fungahe vario mbere za chihi cha enzi, ⁵ na kula kpa Jesu Masihi amabaye ni shahidi mng'aminifu, muvyalwa wa kpanza wa dunia ii. Kpakpe iye ahuhenzaye na yudzihwika huru kula kpa dambi zehu kula kpa milatsoye, ⁶ yudzihuhenda kukala ufwalume, makuhani va Mulungu na Babaye-kpakpe kukala utukufu na nguvu kare na kare. Amina. ⁷ Lola, yunadza na maingu; chila dzitso rindamona, hamng'enga na vosi variomudunga. Na kabila zosi za dunia vandaomboleza kpakpe. Ee, Amina. ⁸ " Mimi ni Alifa na Omega, " bwana Mulungu yunamba, " Iye ariyeho, na ariyekalako, na ambaye yunadza, Mwenye nguvu. " ⁹ Mimi, Johana-ndugu yenu na mumng'enga ashirikiye hamng'enga namng'i kahi za mateso na ufwalume na uvumirivu kamili urio kahi za Jesu; nekala kahi za chisiwa chehwacho Patimo kpa sababu ya neno ra Mulungu na ushuhuda kuhusu Jesu. ¹⁰ Nekala kahi za Roho siku ya Bwana. Nesikira nyuma yangu sauti ya dzulu here ya tarumbeta, ¹¹ ichamba, " Andika kahi za chitabu ugaonago, na ugahume kpa makanisa mafungahe, kpenda Efeso, kpenda Smirna, kpenda Pagamo, kpenda Thiatira, kpenda Sardi, kpenda Filadelfia, na kpenda Laodikia. " ¹² Nichigaluka kona ni sauti ya ani ariyekala achigomba nami, na nirihogaluka neona chinaracha dahabu cha taa fungahe. ¹³ Kahikahi ya chinara cha taa wekalamo mumng'enga here Mng'ana wa Adamu, yudzivala zurungi rire ririrofika tsini ya maguluge, na ukanda wadahabu kuzunguluka chifuache. ¹⁴ Chitswache na nyereze zekala nyeruhe here sufu nyeruhe here teluji, na matsoge gekala here mng'enge wa moho. ¹⁵ Nyayoze zekala here shaba iriyosuguiwa sana, here shaba ambayo idzichizwa kahi za moho, na sautiye yekala here sauti yamadzi manji gatsiririkago malo. ¹⁶ Wekala yubgwiririra nyenyezi fungahe mukonowe wa kulume, na kula mulomoni mng'akpe kpekela na panga kali rikataro kosikosi. Usowe wekala uching'ala here mng'anga mukali wa dzua. ¹⁷ Nirihomona, nichibgwa maguluni mng'akpe here mutu ariyefwa. Achiika mukonowe wa kulume dzulu yangu na kpamba, " Usogohe! Mimi ni wa kpanza na wa mng'isho, ¹⁸ na ambaye ninaishi. Nekala nidzefwa, ela lola, ninaishi kare na kare! Na ninazo funguo za mauti na kuzimu. ¹⁹ Kpa vivyo, gaandike urigogaona, garigoko vivi, na garatu gandigokala baada ya gaga. ²⁰ Kpa maana gadzigodzifitsa kuhusu nyenyezi fungahe urizozona kahi za mukono wangu wa kulume, na chiratu chinara cha dahabu cha taa fungahe: nyenyezi fungahe ni malaika va garatu makanisa mafungahe, na chinara cha taa fungahe ni garatu makanisa mafungahe. "